Nourriture halaal

Ene nourriture halaal c’est ene kitchose ki pure et propre et ki fine gagne li à travers ene moyen ki shariat fine autorisé.

D’après shariat, porc, du sang et ene zanimau ki pas fine faire li zabah d’après principe de shariat, li impure et malpropre. Dons pas gagne droit consomme ça banne kitchose-là.

Coumsa même la monnaie ki ene dimoune gagné comme l’intérêt, li ene la monnaie haraam. Donc pas gagne droit consomme li. Apart ça, ene la monnaie ki ene dimoune gagné dans joué le course, dans joué dans casino ou bien par coquin dimoune, li ene la monnaie haraam ki pas gagne droit consommé.

Consomme nourriture halaal li très important. Faudré pas minimise so l’importance acoze ki li paraite difficile pou gagne kitchose halaal. Ça li tellement important ki banne Nabi aussi fine gagne l’ordre pou observe li. Ene Nabi consomme ene kitchose ki pas bon, ça li impossible. Mais malgré ça si Allah Ta’ala fine adresse zotte lors ça sujet-là, c’est zisse pou montré so degré de l’importance.

Doah ki nou dimandé, li dépanne lors ceki nou mette dans nou l’estomac. Ene dimoune ki so nourriture pas halaal, so doah pas qaboul (accepté). Nou bizin pose nou la question ki manière ene dimoune capave heureux acoze so du bien ou soit acoze so fortune, quand bonheur li trouve dans la main Allah Ta’ala. Et Allah Ta’ala li ranne la vie dimoune heureux par accepté zotte doah.

Ene dimoune ki ena boucou la monnaie ki li fine mal gagné, pas capave etre heureux acoze so fortune. Ça li vine ene kitchose zisse pou gardé ça. Pena narien apart malheur là-dans. Parceki pena bénédiction Allah Ta’ala lors ça qualité dimoune-là. Ça montré ki nourriture haraam li ranne ene dimoune bien malheureux. Vaut mieux mange du pain sec ki halaal ki ou mange la viande, poisson, briani ki haraam.

[Extrait de Al Jamiat Vol.4 No.12]