Ene nouveau fitna

Ena ene causé ki dehors ki dire ki  “perna ‘Aalim dans Maurice”. Ene causé pareille perna aucaine utilité apart crée ene grand fitna dans la communauté. Parceki banne kaafir aussi ti refuse accepté nou Nabi ‎(Sallallaahou A'laihi Wasallam)‎ comme envoyé d’Allah ziste pou gagne raison dans pas suive li. Coumsa même, ça mauvais causé-là pou faire so l’effet. Le public pou amene so la vie couma ça faire li plaisir. Li pas pou écoute personne parceki perna ‘Aalim dans Maurice. Ça pou crée ene l’anarchie totale.

Nou capave dire ki perna ‘Aalim couma banne ‘Aalim dans l’époque longtemps. Mais acoze ça, vine dire ki perna ‘Aalim, c’est ene fausseté ki indique la mauvaise foi de la personne ki dire ça. Si jamais nou permette nou dire ça, alors nou bizin dire ki perna dimoune dans Maurice parceki perna banne bon dimoune couma ti ena dans l’époque longtemps. Si ene dimoune permette li dire ça, alors li ena droit dire ça concernant so propre personne, pas concernant so camarade. Parceki chaque personne conne so racine pli bien ki n’importe ki sanla. Quant à nou, nou reconnaite ki nou z’enfant Hazrat Adam ‎(Alaihis Salaam)‎‎ couma nou conné ki ena ene quantité ‘Aalim ki capave enseigne le public en général ceki zotte bizin dans Deen.

[Extrait de Al Jamiat Vol.2 No.1]