Controle depense

Avec ene ti rente, ene dimoune capave faire boucou kitchose dans so la vie - mais à condition ki li perna gros dépense à faire. Par contre si li ena gros dépense, ene belle rente aussi na pas suffit. Ena des fois li capave perna ene sous dans so poche dans au milieu mois. Li bizin rode prêté.

D’après ça l’exemple/comparaison-là, ceki ene dimoune bizin contrôlé pour so progrès, c’est so dépense ; parceki li paraite pli facile pou ene dimoune contrôle so dépense ki li augmente so revenue. Donc dans contrôle et diminué so dépense li capave dresse so position financière.

Ena ene quantité dépense ki inutile ki ene dimoune faire. Et ça li défonce so budget. Couma banne dépense dans mariages, fiançailles, l’anniversaires - tous ça-là ti bizin pas faire. Mais dimoune-là li guette so plaisir avant tout. Ena même dire ou “Ki ena apart mangé-boire amusé dans la vie ? Amusé ! Pou dimain ava guetté!” Ça banne qualité dimoune-là zotte raisonnement li ene raisonnement irresponsable.

Quand ene dimoune vive pou so l’amusement et divertissement, finalement li vine ene fardeau et ene nuisance pou la société. Li bizin travail dur pou capave satisfaire so banne exigences, so banne besoins et so banne fantaisies. Ça travail dur-là augmente so la fatigue et so stress. Li pas garde suffisamment le temps pou donne so madame z’enfant. Ça manque de contacte-là li affecté relation conjugale et familiale ki capave termine en ene rupture cote surtout banne z’enfant ki paye le pot cassé.

Si arrivé ene dimoune li ene responsable ou bien ene haut gradé dans kit établissement ou bien kit département, alors li gagne so butin pou amusé et pou diverti par prend banne “rewards” et bribe. Astere ça la monnaie ki ene dimoune fine gagné par verse so la sueur, ça li alle gaspillé par banne ki fine prend ça en bribe, dans le course, dans casino ou dans la boisson ou dans lezot l’amusement. A son tour “bribe” li ouvert chemin pou banne ki perna la compétence, régné dans tous banne secteurs et départements. Finalement c’est tout ene peuple et toute ene nation ki subir banne conséquences graves et indésirables ki capave causé par banne responsables incompétents ki fine installe zotte lors la force zotte la monnaie. Acoze ene poigné jouisseurs et divertissements, c’est toute ene nation ki souffert. Voila couma banne ki faire banne dépenses inutiles zotte faire la société en entier du tort. Peut être dans ce même sens ki Allah Ta’ala appelle ça catégories de personnes-là banne frères de shaitaan :

“Certainement banne ki faire mal dépenses, zotte banne frères shaitaan …” (S17 V27)

[Extrait de Al Jamiat Vol.2 No.3]