La sincérité

Zordi jour dimoune ena ça mauvais manière déclare être ceki li pas été. Ene politicien pou vine dire ou ki li pé travail dans l'intérêt supérieur du pays. Mais nou tous conné ki d'abord li travail pou so l'intérêt personnel. D'ailleurs banne politiciens même fine dire ki la politique c'est ene question de l'intérêt personnel. Ça pas veut dire ki perna dimoune sincère. Capave ena li mais bien tigite dans tigite.

Ene 'Aalim vine dire ou ki li sincère dans ceki li pé dire. Mais en réalité li pé arrange so terrain. Très souvent li dire banne kitchose pou sécurise so position. Li peur pou dire la vérité parceki li conné ki dans dire la vérité, li capave vine en plis. Par exemple nou ena ene groupe de jeunes ki déclare pé tini flambeau de la guidance mais ceki mauvais avec zotte, zotte critique certaines kitchose ki trouve dans fazail-e-a'maal. Mais ça même kitchose, quand zotte trouve li dans livre Sheikul Islam Allaamah Bin Taimiyah, zotte flambeau teigne et zotte arrête là-même. Peut-être zotte peur ki zotte capave perdi travail ou bien zotte capave arrête gagne l'aide depi l'extérieur. Ici aussi nou trouvé ki nou ena banne 'Oulama sincère bien tigite dans tigite.

Ene commerçant li pou toujours flatte so marchandise. Bien rare li pou ena le courage dévoile banne défauts ki ena dans so marchandise. La plupart du temps li déclare pé perdi. Ici aussi banne commerçants sincère zotte bien tigite dans tigite.

Finalement nou remarqué ki la sincérité li ene kitchose bien rare dans ça le monde-là. C'est ça même kitchose ki ti permette banne dimoune auparavant vive en paix. Et si zordi nou perna la paix, c'est acoze ki nou manque ça kitchose-là. Et si nou envi vive en paix, nou pou bizin faire maximum zeffort pou gagne ça. Malheureusement banne ki ena la volonté pou développe ça dans zotte, zotte bien tigite dans tigite.

[Extrait de Al Jamiat Vol.3 No.11]