Présence casinos, boite de nuit et banne centre haraam dans ene pays Islamique

Dirigeant ene pays soi-disant islamique fine être interrogé concernant présence casinos, boite de nuit et banne centre haraam ki trouve dans so pays. En réponse li dire ki li fine faire masjid aussi dans so pays. Au contraire ena pli boucou masjid ki banne centres haraam.

Remarque:

Ene bon dirigeant ene pays li représente couma ene papa pou so banne zenfants ki très souciant du bien être de so banne zenfants. Ene bon papa pas capave mette médicament et poison tous les deux lors la table divant so banne zenfants et donne zotte liberté choisir ceki zotte content. Coumsa même ene bon dirigeant pas capave autorise présence banne centres couma casino, taverne, boite de nuit etc. ki faire so le peuple perdi l'esprit, marche quatre patte, vine égoïste et vine ene danger public. Quand même ena banne masjid en grand nombre mais zotte pas capave joué zotte rôle couma bizin, aussi longtemps ki pou ena liberté alle dans ça banne lieux malpropre-là.

Ene pays coumsa li couma dire ene dimoune ki fine baigne avec ene bouteille parfum mais en même temps li fine frotte ene tigite malpropreté chatte lors so le corps. Normalement ça tigite malpropreté-là pou domine tous ça parfum ki li fine metté. Donc li pas important pou mette boucou parfum couma li important pou nettoye ça tigite malpropreté-là. Coumsa même ceki essentiel c'est pas augmente le nombre de masjid mais ferme ça banne centres malpropres couma casino, boite de nuit, taverne etc. quand même li bien tigite. Nou bizin concentré plis lors nettoyage ki embellissement.

Zordi jour nou trouve pé ouvert ene quantité centres éducatif mais en même temps la boisson alcoolique aussi pé faire ravage. A tel point ki nou pas hésité pou dire: "Nou pays, nou la bière."  Acoze ça dimoune-là pé mal servi l'éducation ki li fine gagné et li pé vine rusé au lieu vine sage. Banne centres éducatifs fine échoué pou joué zotte rôle ki zotte ti supposé acoze ena encore banne centres ki faire banne bon-bon dimoune marche quatre patte.

[Extrait de Al Jamiat Vol.3 No.15]