Toi mousalmaan!

• Depi quand to conné ki to bien être trouve dans la main kikene!
• Depi quand to conné ki kikene capave faire to l'avenir!
• Depi quand to conné ki to mangé-boire li lors responsabilité kikene!
• Depi quand to conné ki solution to problème li trouve dans kikene so stratégie ou so l'intelligence!
• Eski bizin dire toi Allah ki faire tout?
• Eski bizin dire toi ki to destin, to bien être, to mangé boire et solution de tout to banne problèmes li trouve uniquement dans so la main?

Là élection pé approché. Ça toi to guetté ki sanla to pou qualifié ou disqualifié li par to la croix. Mais pas pensé ni essaye faire croire ki ene insaan pareille couma toi capave tire toi depi dans problème ki to été. Mo donne toi garantie si nou même nou vine majorité dans parlement, là aussi nou problème pas pou résoudre. Ena ene quantité l'exemple dans ça le monde-là cotte nou même nou au pouvoir et nou même nou en majorité, mais to pou remarqué ki nou problème fine reste entier.

Eski to banne problèmes pou résoudre quand to encore dans l'alcool, dans la drogue, dans zina, dans mensonge, dans faire dominere, dans pas respecté droit lezot, dans coquin etc.? Jamais to problème pou résoudre tanque to pas arrête faire ça banne bêtise-là! Ki sanla ki élu et ki sanla ki pas élu, to solution pas trouve là-dans. To bizin guetté eski to capave faire toi élu dans lizié Allah Ta'ala. Si to fine réussi faire li, veut dire ki to fine gagne la victoire. Sinon to fine échoué.

Donc to ena ene seul solution pou tout to banne problèmes. To vine ene vrai serviteur pou to Rabb et to suive ceki li fine dire d'après le modèle ki nou bien aimé Nabi ‎(Sallallaahou A'laihi Wasallam)‎ fine présenté. A ce moment-là tout to banne problèmes pou résoudre. A ce moment-là to même to pou à la tête de tout. A ce moment-là to même to pou ena la victoire partout. To bizin rappel tout le temps ceki to Rabb pé dire dans verset 139 de sourah 3:

"Pas découragé ni chagrin. C'est zotte même ki pou pli là haut si zotte banne vrai croyants."

[Extrait de Al Jamiat Vol.4 No.1]