Bourhaan de Al Jamiat conte Bouhtaan de nafsaniyyat

Ene dimoune ki pé noyé, li pou essaye attrape tout ti zaffaire avec l'espoir pou sauve so la vie. Ça même ki pé arrive ene groupe d'individu désorienté ki nepli conné couma pou lave zotte péché et couvert zotte défaut. Alors façon pli correct pou zotte, c'est déclenche ene bouleversement pou faire dimoune blié l'essentiel. Récemment ça banne individu-là fine mette ene "bouhtaan" (fausse accusation) lors Al Jamiat ki selon zotte Al Jamiat pé invente aayat Qour'aan. Quant à nou au Al Jamiat, nou croire sincèrement et nou déclaré haut et fort ki ajouté, retiré ou invente kitchose dans Qour'aan c'est purement kufr ki nou dimane Allah Ta'ala protége nou de ça.

Si nou fine dire: "Dans Qour'aan-e-Kareem, Allah Ta'ala fine promette banne ki reste dans so l'obéissance ki li pou accorde zotte so aide dans ene façon miracle" dans Al Jamiat Vol 3 No 11, nou conné ceki nou fine dire li pas ene verset dans Qour'aan et ni nou fine présente li comme ene verset Qour'aan. Et banne ki habitué lire Al Jamiat ou bien banne lezot publication de Al Jamiat zotte conne très bien ki quantité méticuleux nou été quand traduire verset Qour'aan ou bien kit hadice. Nou ena l'habitude mette li entre parenthèse ou entre guimé ( " " ) et si nou ajoute kit mot pou clarifié le sens, nou mette li entre braquette zisse pou distingue li du texte réel. Nou redire encore et d'ailleurs c'est nou même ki bizin dire li parceki nou encore vivant et apart Allah Ta'ala c'est nou même ki cone pli bien ceki ena dans nou le cœur ki jamais nou fine présente ça comme ene verset. Plutôt nou fine présente ça comme ene sens général ki fine puisé apartir boucou banne versets Qour'aan et surtout du verset 2/3 du sourah At-Talaaq.

Par faire ene objection pareil, nou banne "frères" faire nou gagne honté. 10-15 bananés zotte fine apprane mais Boukhari Shareef zotte pas fine réussi lire. Si zotte ti lire li bien, jamais zotte ti pou faire ene objection pareil. Nabi ‎(Sallallaahou A'laihi Wasallam)‎ fine bien dire ki celui ki reste tranquille fine gagne najaat (salut). Ça banne-là fine cause plis ki bizin. Acoze ça dimoune pé gagne l'occasion conne zotte …

Selon ene hadice ki trouve dans Sahih Boukhari, ene fois ene madame ki appelle Umm Yaqoub ‎(Radiyallahou anhou‎)‎ fine oulé conné avec Hazrat Abdullah Bin Mas'oud ‎(Radiyallahou anhou‎)‎ la raison pou laquelle li maudit banne madames ki faire tatouages, épile sourcils et ki faire lime zotte les dents. En réponse Hazrat Abdullah Bin Mas'oud ‎(Radiyallahou anhou‎)‎ fine dire: "Ki ena pou mo pas maudit banne ki Rassouloullah ‎(Sallallaahou A'laihi Wasallam)‎ fine maudit et banne ki fine maudit dans Allah Ta'ala so Kitaab (livre)." Umme Yaqoub fine oulé conne le verset ki ena ça, alors Hazrat Abdullah Bin Mas'oud ‎(Radiyallahou anhou‎)‎ fine faire référence à verset 7 de sourah 59 cotte Allah Ta'ala dire: "… Tout ceki Rasoul donne zotte, prend li et tout ceki li empêche zotte évite li …"

Tous banne ki Allah Ta'ala fine accorde zotte le faveur pou conne Qour'aan par cœur, zotte conné ki dans Qour'aan pena aukene verset dans lequel Allah Ta'ala fine maudit banne ki faire tatouage etc. Mais malgré ça Hazrat Abdullah Bin Mas'oud ‎(Radiyallahou anhou‎)‎ fine dire ki ça li trouve dans livre Allah Ta'ala. Grand merci Allah Ta'ala ki pas ti ena banne imbécile dans ça l'époque-là. Sinon zotte ti pou mette blâme lors Hazrat Abdullah Bin Mas'oud ‎(Radiyallahou anhou‎)‎ ki (Na-ouzoubillah) li pé invente aayat Qour'aan couma zordi jour nou banne prédicateurs sans comprend pé oulé faire comprend par zotte vilain manière goré. Autant ki nou conné pena aukene Sahabi, Tabei, Imam ou savant de hadice pendant 14 siècle ki fine osé dire ki Hazrat Abdullah Bin Mas'oud ‎(Radiyallahou anhou‎)‎ fine invente aayat Qour'aan. Par mette ene blâme pareille lors Al Jamiat, banne prédicateurs sans comprend fine commette l'erreur ki personne pas fine commette pendant 1400 banané. Ene grand félicitation pou ça record ki zotte fine cassé-là parceki zotte fine ena l'audace pou isole zotte complètement avec stand et l'attitude ki fine toujours être adopté pendant 1400 banané. Et ça c'est travail ene ki boucou arrogant ou soit ene ki bien imbécile.

[Extrait de Al Jamiat Vol.4 No.4]