Chikungunia !

Fine ena ene grand campagne et ene mobilisation à grand échelle pou débarrassé avec banne moustiques parceki selon les dire de banne experts, ça li responsable ça maladie ki appelle chikungunia. Ça fine mine la vie dimoune à Maurice et ailleurs. Ena dimoune pé encore souffert. Donc li bien dangereux.

Bé ki banne experts dire lors l’alcool ?

Eski li moins néfaste ki ça banne moustiques-là ? Tout dimoune conne dégât ki ça li créé dans la société. Acoze ça ene dimoune nepli capave faire narien. Li vine ene fardeau pou la société. Li faire so madame zenfant misère. Combien accident pé arrivé acoze ça. Et chaque semaine combien nou banne jeunes pé perdi la vie et pé laisse toute ene la famille souffert derrière zotte. C’est ene l’ennemi de tout. Donc quand nou pou décide pou débarrassé avec ça l’ennemi-là ?

Coumsa même banne casino et banne discothèque c’est banne calamités pou la société. Pena aukene bénéfice apart ene l’amusement temporaire ki détruire ou l’avenir et l’avenir ou zenfant pou tout le temps. C’est banne kitchose ki bizin pena dans ene société ki oulé faire progrès. Alors nou bizin guetté couma pou débarrassé avec ça banne genres de chikungunia-là ki pé fonctionne avec bénédiction nou banne dirigeants.

[Extrait de Al Jamiat Vol.5 No.1]