Double rôle

Quand ene dimoune vive deux différent qualité, nou dire li pé amène double rôle. Ça façon amène la vie-là li pas apprécié par banne ki amène ça qualité la vie-là aussi. Eski pas ça même ki appelle hypocrisie ? C'est ene vilain manière ki banne hypocrite aussi pas apprécié. Imagine ene coup si ou madame dans ou la caze amène double rôle. Sans doute li pou pénible et insupportable. Bé ki manière nou capave permette nou même amène ene la vie pareille ? Dimoune bizin sincère dans la vie. Quand li sincère li pou ena la franchise aussi. C'est ene dimoune sincère même ki pou ene dimoune franc.

Quant à ene dimoune ki pas sincère, li pou toujours montré ene qualité et li pou cachiette ene l'autre. Li pou vive ene façon dans cachiette et ene l'autre façon dans public. Li pou dire ene kitchose ki li pena li dans le coeur. C'est ça même double rôle ki banne musulman pé joué zordi jour. Si li ene musulman, alors ça pas empêche li vive couma kaafir. Li fête so l'année, so noël, so l'anniversaire etc. so tenue, so l'habillement, so façon mangé-boire, tout couma kaafir. Dans ene la main pavillon l'Islam et dans ene l'autre pavillon shaitaan. Si nou pas capave permette nou accepté ene ki faire double rôle, alors ki manière nou croire ki Allah Ta'ala pou accepté ça. Qour'aan dire nou rente dans entier l'Islam avec nou entier le corps. C'est ça même ki appelle sincère. C'est par cela ki nou pou sincère envers nou Rabb, nou Rasoul ‎(Sallallaahou A'laihi Wasallam)‎, envers nou Deen et envers nou même et entier l'humanité. Vive ene la vie double rôle li conte la décence et la pudeur et surtout quand nou pé vive ça avec nou véritable bien-aimé Allah Ta'ala.

[Extrait de Al Jamiat Vol.6 No.1]