Daroud shareef

Avoye daroud et salaam lors nou bien-aimé Nabi ‎(Sallallaahou A'laihi Wasallam)‎ li ene grand ibaadat. C’est ene ibaadat ki faire nou approché avec Nabi ‎(Sallallaahou A'laihi Wasallam)‎ et faire nou gagne so mouhabbat et so l’amitié. Dans ene hadice Nabi ‎(Sallallaahou A'laihi Wasallam)‎ dire ki la personne pli proche avec moi jour qiyaamat c’est ene personne ki fine avoye pli boucou daroud lors moi.

Gagne frottement ek banne vedettes, élites et célébrités c’est ene désir ki tout dimoune même ena. Acoze ça dimoune pas guette divant derrière quand li gagne ene l’occasion semblable. Li considère ça ene l’occasion en or. Li accepté pou débourse ene somme assez conséquent pou li même et pou so la famille afin ki li capave réalise so désir et so ambition. Nou bien aimé réel c’est Allah Ta’ala. Ki sanla vine après Allah Ta’ala ? Ena kikene égal à nou Nabi ‎(Sallallaahou A'laihi Wasallam)‎ ? Ceki ene musulman bizin content plis ki tout après Allah Ta’ala c’est nou bien aimé Nabi ‎(Sallallaahou A'laihi Wasallam)‎ parceki pena narien égal à Nabi ‎(Sallallaahou A'laihi Wasallam)‎ dans la création. Donc le désir pou approché avec Nabi ‎(Sallallaahou A'laihi Wasallam)‎ li bizin ene désir inégal et incomparable. D’après hadice le moyen pou atteine ça but-là c’est avoye daroud en abondance lors Nabi ‎(Sallallaahou A'laihi Wasallam)‎.

C’est ene ibaadat ki capave faire li dans posture ki ene dimoune oulé. Pena ene posture spécial ki imposé par Shariat. Ene dimoune capave faire li marche-marché, diboute-dibouté couma li capave faire assizé aussi. D’ailleurs nou faire li dans posture assizé même dans namaz. Qour’aan-e-Kareem so tilawat aussi li recommandé pou faire li dans posture assizé couma nou assizé dans Qaidah. Si tilawat de Qour’aan-e-Kareem li recommandé pou faire li assizé alors pena narien ki pas bon dans faire Salaat-o-Salaam en posture assizé. Qualifié la façon faire Salaat-o-Salaam en posture assizé de manque de respect li injustifié. Faire li assizé li ene façon tout à fait normal et approuvé par Shariat. Pena aukene recommandation spécial de la part de Shariat pou faire li en posture diboute. C’est ene pratique ki nou l’esprit trouve ça bon. Mais li bon conné ki Nabi ‎(Sallallaahou A'laihi Wasallam)‎ pas ti content ki banne Sahaba zotte diboute quand li ti pé présente devant zotte. Banne Sahaba ‎(Radiyallahou anhou‎)‎ ti au courant de ça. Acoze ça zotte pas ti pé faire li pourtant na pas ti ena personne pli cher à zotte ki Nabi ‎(Sallallaahou A'laihi Wasallam)‎. Donc faudré pas impose ene posture spécial pou faire ça ibaadat-là. Impose ene façon ki pas imposé par Shariat c’est bid’ah. C’est ene grand ibaadat ki bizin pas mélange li avec bid’ah.  Beauté et splendeur ene ibaadat li trouve dans faire li d’après sounnat. Ene ibaadat couma Salaat-o-Salaam ki concerne Nabi ‎(Sallallaahou A'laihi Wasallam)‎, aussi pou ena so l’effet ki bizin si faire li d’après sounnat. Et ça c’est la façon ki banne Sahaba-e-Kiraam, Tabeines, Taba-Tabeines et banne Oulama-e-Kiraam d’auparavant fine faire li.

D’après principe nou bizin lire seulement Attahiyyaat lors deuxième rakaat de ene namaz ki ena 3 ou 4 rakaat. Si jamais nou lire Allahoumma Swalli ‘ala Mouhammad après attahiyyaat, alors d’après Imam Abou Hanifah (R), ça li nécessite sajdah sahou. Kikene capave dire eski li ene erreur pou lire daroud dans namaz ? Si li pas ene erreur alors ki faire li nécessite sajdah sahou ? Banne Oulama fine expliqué ki Daroud Shareef c’est ene grand ibaadat mais malgré ça si ça fine nécessite sajdah sahou c’est acoze ki pas fine faire li d’après sounnat de Nabi ‎(Sallallaahou A'laihi Wasallam)‎. Donc chaque ibaadat ena ene manière pou li. Faudré pas impose ene façon de nou coté. Sinon li pou ene erreur.

Pena aukene musulman lors ça la terre-là ki capave permette li refuse accepté Salaat-o-Salaam. Soit li bizin accepté li ou bien li bizin pas ene musulman. Mais zotte capave ena divergence dans facon faire li. Si ene musulman pas accepté faire li dans ene façon spécifique ki pas imposé par shariat, li pou ena parfaitement raison. Dans ça cas-là li pou ene malhonnêté intellectuelle pou qualifié li de ene ki pas croire dans Salaat-o-Salaam. C’est ene manigance pou induire le public dans l’erreur et faire zotte croire dans ceki pas existé. Li couma dire qualifié Imam Abou Hanifah (R) de ene ki pas d’accord avec daroud shareef acoze ki li applique sajdah sahou quand lire li dans certaine l’occasion dans namaz. Couma nou conné, ça kitchose-là li pas vrai. Coumsa même li pas correcte pou qualifié kikene de ene ki pas d’accord avec Salaat-o-Salaam zisse acoze ki li pas faire li dans ene posture spécifique ou bien dans posture diboute ki nou appelle Qiyaam.

Parfois arrivé ki ene dimoune li capave emporté par émotion à tel point ki li pas capave tenir alors li diboute. C’est ene l’état d’esprit ki nou appelle li « Haal ». Bé ça personne-là so cas li différent. Pas capave blâme li mais pas capave généralise li aussi. Faudré pas tout dimoune déclaré ki li dans ça catégorie-là. Li pou ene mensonge si ene dimoune déclare être dans ene état d’esprit ki li pas été. Agir avec malhonnêteté et mensonge dans ene ibaadat couma Salaat-o-Salaam li pli pas bon.

[Extrait de Al Jamiat Vol.7 No.1]