Khutbah dans ene l’autre langue ?

Khutbah dans ene l’autre langue apart arabe li pas faraz, ou waajib. Bé eski li sounnat ou moustahab ? Ça aussi li difficile pou dire. Eski li moubaah ? C’est-à-dire ene pratique ki pena sawaab dans faire li ni ena péché dans pas faire li. Là nou pou ena deux tendances :

D’après ene tendance li moubaah. C'est-à-dire capave faire. Comme justification, zotte dire ki khutbah li ene message et ene message li bizin dans ene langage ki dimoune comprend. Donc «bizin» faire li dans langage banne dimoune ki concerné par ça message-là. Par exemple en Inde bizin faire li en urdu, en Angleterre en anglais et à Maurice en créole.

Nou comprend ki bizin transmette ene message dans ene langage ki dimoune concerné comprend. Mais le message de khutbah, eski li ene message ki obligé faire comprend ? Si li ene message ki obligé faire comprend, ça veut dire ki li obligé faire li dans ene langage ki dimoune-là comprend. Par exemple à Maurice li pou obligé faire li en créole ! Ça raisonnement-là pas pou corresponne et li pas compatible avec la déclaration de ça groupe-là quand zotte dire ki li moubaah parceki li évident ki ‘obligé’ veut dire ki li pou ene péché si pas fine faire li. D’ailleurs ça pou amène nou pou dire ki li pou ene péché si faire li en arabe à Maurice. Nou pense pas kikene capave fine dire ça ziska présent. Et nou pas trouvé ki kikene capave ena l’audace dire li dans l’avenir. Au plus allé, zotte capave dire ki li autorisé. Normalement zotte pou bizin donne ene justification pou ça l’autorisation-là aussi. Et zotte ena ene seul justification. Comme justification zotte pena narien apart dire ki li ene bon l’idée pou faire khutbah dans ene langage ki dimoune capave comprend li. Zotte pas capave qualifié li de ‘recommandé’ aussi. Zotte pas capave donne li ene degré pli élevé ki ‘Moubaah’.

[Extrait de Al Jamiat Vol.7 No.10]