Talaaq

عن ابن عمر عن النبى صلى الله عليه وسلم قال ابغض الحلال الى الله الطلاق (ابو داؤد/ المستدرك للحاكم)

Traduction:

Hazrat (Abdullah) Bin 'Oumar ‎(Radiyallahou anhou‎)‎ rapporté ki Nabi ‎(Sallallaahou A'laihi Wasallam)‎‎‎‎ fine dire: Le halaal ki pli détestable au près d'Allah, c'est talaaq." (Abou Dawoud/ Al Moustadrak de Al-Haakim)

Position hadice:

Imam Abou Dawoud pas fine faire aukene remarque lors ça hadice-là. C'est ene indication de so part ki c'est ene hadice correcte. Selon le الجامع الصغير , sanad ça hadice-là li ene sanad authentique. Donc li ene hadice authentique.

Explication:

Talaaq c'est ene moyen pou mette fin à ene contrat de Nikah. Le contrat de nikah, li ene contrat ki pas couma tout contrat. Li ene contrat sacré ki unir deux le cœur, deux personnes et deux familles. Ene rupture dans ça contrat-là li affecté et blesse sentiment ene quantité dimoune. Acoze ça shariat fine toujours insisté lors la nécessité maintenir ça contrat-là. Mais c'est ene réalité ki parfois malgré zeffort et la volonté, li vine bien difficile pou continué ensemble.

Dans lezot la religion, ça contrat-là fine considéré comme ene contrat perpétuel ki pas capave cassé. Ene fois ki fine conclure li, li resté pou la vie la mort. Ça veut dire ki d'après ça système-là, ene personne li obligé vive avec so partenaire conte so gré, dans l'angoisse, dans l'amertume et dans souffrance continuellement ki ranne so la vie ene la vie l'enfer pendant toute longue so la vie sans trouve kit remède ou solution pou so souffrance et so problème. Dans ene situation difficile coumsa, so problème continué aggravé ki parfois dans désespoir, li amène vers suicide ou bien force li pou vive dans l'anarchie et dans l'infidélité. A son tour l'infidélité li débouche vers ene quantité délits et offenses social et moral. Ene société cote désespoir, l'anarchie et l'infidélité pé régné, li pas ene société propre et pure. Li pas ene société cote dimoune capave vive dans la joie avec liberté. C'est ene société infernale. Ene système ki favorise et développe ene l'état et ene climat pareil dans ene société, li pas capave être ene système juste et équilibré.

L'équilibre de l'Islam

L'Islam fine garde ene l'équilibre entre les deux aspects par qualifié talaaq de ene kitchose le plus détestable auprès d'Allah Ta'ala parmi banne kitchose ki fine décrété comme halaal. Ça signifié ki talaaq li ene kitchose indésirable ki tanque possible pas bizin alle de l'avant avec ça. Sans ene raison valable, pas bizin servi li. Li couma dire ene la porte "emergency" ou d'urgence ki bizin reste fermé tout le temps. C'est necque dans cas oblige ki bizin servi li.

De l'autre coté malgré ki li indésirable, shariah fine institué li et fine autorise servi li afin pou capave corrige, remédié et répare certaine manquement ou certaine erreur ki fine capave glissé dans conclure ça l'union-là ki dimane séparation même pou être remédié. Mais là aussi shariah fine établi certaine règles et principes pou capave servi ça système-là dans ene façon pli convenable.

Par exemple li fine laisse le pouvoir pou donne talaaq dans la main missié avec ene possibilité pou madame aussi capave libère li dans certaine cas. Coumsa même shariah fine empêche ene missié donne so madame tous les trois talaaq ene seul coup. Au lieu ça, li fine recommane li donne ene par ene afin ki ena la possibilité répare erreur et regret si jamais fine faire erreur dans jugement dans donne talaaq.

Similairement shariah fine empêche donne talaaq à ene madame quand li dans so haiz. Coumsa même d'après shariah li pas ene bon façon si ene missié donne so madame talaaq dans so période de propreté quand li fine fini alle dans ménage avec li dans ça période-là.

N.B:

Ça banne façons donne talaaq-là zotte pas bon d'après shariah. Malgré ça si kikene faire li, li compté.

Meilleur façon pou donne Talaaq

عن ابراهيم رحمه الله كانوا يستحبون ان يطلقها واحدة ثم يتركها حتى تحيض ثلاث حيض (مصنف ابن ابى شيبة)

Traduction:

Ibraheem (An-Nakh-ï) (R) rapporté ki banne-là c'est-à-dire banne Sahaba-e-Kiraam ti recommane donne ene madame ene seul talaaq (si bizin même) et ensuite laisse li (coumsa même) ziska ki li gagne so trois haiz. (Mouswannaf Ibn Abou Shaibah)

Position hadice:

D'après Ad-Diraayah de Allaamah Bin Hajar Al-Asqalaani, sanad de ça récit-là li ene sanad authentique.

Explication:

Ibraheem An-Nakh-ï li ene grand tabei ki fine vive dans l'époque banne Sahaba-e-Kiraam. Quand li dire banne-là, ça signifié banne Sahaba-e-Kiraam. Donc la pratique ki li pé faire mention de ça, c'est ene pratique ki ti en vigueur dans l'époque banne Sahaba-e-Kiraam. Alors li bizin ene pratique ki conforme avec shariah et donc ça même façon li pli recommandé pou donne talaaq d'après banne Sahaba-e-Kiraam.

Auparavant le nombre de talaaq pas ti ena aukene limite. Ene missié ti capave donne so madame la quantité talaaq ki li envi. Ça pas ti affecté so nikah quand li ti pé reprend so madame dans so nikah avant so iddat traversé. Finalement Allah Ta'ala fine révèle les versets 229 et 230 de sourah Al-Baqarah pou limite le nombre de talaaq à 3 talaaq.

Le pouvoir de 3 talaaq ki ene missié ena lors so madame, li pas nécessaire servi tout les trois pou séparé avec so madame. Li capave servi ene seul si li envi séparé. C'est-à-dire li donne so madame ene seul talaaq et li reste séparé avec li ziska ki madame-là so trois période de haiz traversé. Quand ça trois période de haiz-là fine fini traversé, madame-là pou vine en dehors nikah ça missié-là et li pou gagne droit faire nikah avec ene l'autre missié si li envi couma li capave retourne avec so ex-missié par renouvelé so nikah.

Couma ene missié li capave séparé avec so madame par ene talaaq, li capave séparé par deux ou trois talaaq aussi. Mais si li pé séparé avec so madame par 3 talaaq, li pas pou capave retourne avec li si li regretté lors ceki li fine faire. Li pou séparé avec so madame pou tout le temps. Ça c'est so pli grand désavantage. Et si li fine séparé par deux talaaq, li ena possibilité retourne avec so madame mais li fine perdi pouvoir de ene talaaq enplis dans vide parceki li ti capave faire li par ene seul talaaq. Acoze ça si ena même pou séparé, li pli bon ki ene missié li séparé par ene seul talaaq. Dans ça façon donne talaaq-là, li ena possibilité répare so erreur si jamais li fine faire li et li capave retourne avec so madame sans gaspille et abuse le pouvoir de talaaq ki shariah fine donne li. C'est la raison pou laquelle banne Sahaba-e-Kiraam ti préfère ça façon donne talaaq-là.

Talaaq d'après sounnat

عن عبد الله انه قال طلاق السنة تطليقة وهى طاهر فى غير جماع فاذا حاضت وطهرت طلقها اخرى فاذا حاضت وطهرت طلقها اخرى ثم تعتد بعد بحيضة". (النسائي)

Traduction:

Fine rapporté de (Hazrat) Abdullah (Bin Mas'oud ‎(Radiyallahou anhou‎)‎) ki li fine dire:

"Talaaq d'après sounnat, c'est ene talaaq (ki donné) quand li, c'est-à-dire madame-là, li propre sans (ki fine) ena relation sexuelle. Et quand li gagne haiz et li vine propre, li donne li ene l'autre talaaq. (Après ça) quand li gagne haiz et li vine propre, li donne li encore ene talaaq. Ensuite li observe iddat après ça, pendant ene période de haiz." (Nisaai)

Position hadice:

Tous banne narrateurs dans sanad ça hadice-là, zotte banne narrateurs authentique. Donc le hadice li ene hadice authentique.

Explication:

Si ena la nécessité pou donne talaaq, li très important pou donne li dans période de propreté sans ki fine ena relation sexuelle avec madame-là dans ça période-là. Dans ça cas-là, li pli bon si la personne donne ene seul talaaq et li laisse madame-là observe so iddat de trois haiz. Après ça, madame-là pou sorti en dehors nikah. Si la personne envi donne tous les trois talaaq, ça aussi li possible et autorisé quand même li moins recommandé. Mais li bizin pas donne tous les trois talaaq ene seul coup. Li donne li ene par ene dans chaque période de propreté sans ki li gagne relation sexuelle dans ça période de propreté-là.

Si jamais li fine donne tous les trois talaaq ene seul coup ou bien li fine donne dans période de haiz ou bien li fine donne li dans ene période de propreté ki li fine fini ena relation sexuelle avec madame-là là-dans, alors dans tous ça cas-là, li pas ene talaaq ki d'après sounnat. Li empêché donne talaaq dans ça banne façons-là. Mais malgré ki li empêché, si kikene fine donne dans ça façon-là, talaaq-là pou compté!

Talaaq en état de haiz

"يايها النبى اذا طلقتم النساء فطلقوهن لعدتهن ..." (آية ۱/ الطلاق)

Traduction:

"O Nabi ‎(Sallallaahou A'laihi Wasallam)‎‎‎‎ quand zotte ena pou donne talaaq à banne madames, donne zotte ça avant zotte iddat (haiz) …" (Sourah At-Talaaq / Verset 1)

Explication:

Dans ça ayat-là, Allah Ta'ala fine ordonne l'oummah à travers Nabi ‎(Sallallaahou A'laihi Wasallam)‎‎‎‎ pou donne banne madames talaaq avant iddat si jamais zotte bizin donné même.

D'après Hazrat Abdullah Bin Mas'oud ‎(Radiyallahou anhou‎)‎, l'ordre "donne talaaq avant iddat" ki Allah Ta'ala fine ordonné veut dire:

"الطلاق طاهرا من غير جماع"

"Donne talaaq en état de propreté sans gagne relation sexuelle (là-dans)".

Dans tafseer ça verset-là, Hazrat Abdullah Bin Mas'oud ‎(Radiyallahou anhou‎)‎ dire:

"لا يطلقها وهى حائض ولا فى طهر قد جامعها فيه ولكن يتركها حتى اذا حاضت وطهرت طلقها تطليقة فان كانت تحيض فعدتها ثلاث حيض وان كانت لا تحيض فعدتها ثلاثة اشهر وان كانت حاملا فعدتها ان تضع حملها (تفسير الطبرى)

Traduction:

"(Ça signifié) ki li bizin pas donne li talaaq quand li dans période de haiz ni (li donne li talaaq) dans ene période de propreté ki li fine fini ena relation avec li. Au lieu ça, li bizin laisse li ziska ki li gagne so haiz et li vine propre. Lerla li donne li ene seul talaaq. Astere si madame-là li encore pé gagne haiz, alors so iddat li pou trois haiz. Si li ene madame ki pas gagne haiz, alors so iddat li pou trois mois et si li enceinte, alors so iddat (li terminé) quand li accouche so ti bébé." (Tafseer At-Tabari)

Tous ça-là montré ki pas gagne droit donne talaaq:

Si madame-là li dans période de haiz,
Si madame-là li dans période de propreté ki li fine fini ena relation sexuelle avec li là-dans.

Hadice Hazrat Abdullah Bin 'Oumar ‎(Radiyallahou anhou‎)‎

"عن عبد الله بن عمر انه طلق امرأته وهى حائض على عهد رسول الله صلى الله عليه وسلم فسأل عمر بن الخطاب رسول الله صلى الله عليه وسلم عن ذلك فقال رسول الله صلى الله عليه وسلم مره فليرا جعها ثم ليمسكها حتى تطهر ثم تحيض ثم تطهر ثم ان شاء امسك بعد وان شاء طلق قبل ان يمس فتلك العدة التى امر الله ان تطلق لها النساء" (البخارى)

Traduction:

Rapporté de (Hazrat) Abdullah Bin 'Oumar ‎‎(Radiyallahou anhou‎)‎‎ ki li ti donne so madame talaaq pendant ki so madame ti en état de haiz dans l'époque Rassouloullah ‎(Sallallaahou A'laihi Wasallam)‎‎‎‎. (Hazrat) 'Oumar Bin Al-Khattaab ‎‎(Radiyallahou anhou‎)‎‎ fine dimane Rassouloullah ‎(Sallallaahou A'laihi Wasallam)‎‎‎‎ à propos ça. Rassouloullah ‎(Sallallaahou A'laihi Wasallam)‎‎‎‎ fine dire: "Ordonne li pou retourne avec li et après ça li garde li (dans so nikah) ziska ki li vine propre et li regagne haiz et li revine propre. Après ça li guetté, si li envi li garde li et si li oulé, li donne li talaaq avant li approche li. C'est ça même iddat ki Allah fine ordonne pou donne banne madames talaaq là-dans." (Sahih Boukhari)

Explication:

Dans le premier verset de Sourah At-Talaaq, Allah Ta'ala fine ordonne pou observe ene kitchose ki appelle iddat quand donne madame talaaq. D'après ça hadice-là, ça iddat ki bizin prend en considération quand pé donne talaaq, signifié ene période de propreté dans laquelle missié-là pas fine alle dans ménage avec so madame.

Hazrat Abdullah Bin 'Oumar ‎(Radiyallahou anhou‎)‎ ti donne so madame talaaq pendant ki li ti dans période de haiz. Acoze ça Nabi ‎(Sallallaahou A'laihi Wasallam)‎‎‎‎ fine ordonne li pou retourne avec so madame et fine conseille li pou donne li talaaq dans ene période de propreté dans laquelle li pas fine ena relation avec so madame.

Le fait ki Nabi ‎(Sallallaahou A'laihi Wasallam)‎‎‎‎ fine ordonne li pou retourne avec so madame, montré ki ça talaaq ki li ti donne so madame en état de haiz ti ene talaaq ki ti prend l'effet. C'est acoze ça même ki fine ena la nécessité pou retourné. Sinon la question retourné pas ti pou posé même.

Selon la version de ça hadice-là ki trouve dans Sounan Ad-Darqutni, li mentionné clairement ki ça talaaq ki Hazrat Abdullah Bin 'Oumar ‎(Radiyallahou anhou‎)‎ ti donne so madame dans so période de haiz ti prend l'effet.

Anas Bin Seerine dire:

"سمعت ابن عمر يقول طلقت امرأتى وهى حائض فاتى عمر النبى صلى الله عليه وسلم فسأله فقال مره فليراجعها فاذا طهرت فليطلقها ان شاء قال فقال عمر يا رسول الله افتحتسب بتلك التطليقة قال نعم" (الدارقطنى)

Traduction:

"Mo fine tanne (Hazrat Abdullah) Bin 'Oumar ‎‎(Radiyallahou anhou‎)‎‎ dire: Mo ti donne mo madame talaaq pendant ki li ti dans période de haiz. (Hazrat) 'Oumar ‎‎(Radiyallahou anhou‎)‎‎ fine vine cote Nabi ‎(Sallallaahou A'laihi Wasallam)‎‎‎‎ et fine dimane li. Alors Nabi ‎(Sallallaahou A'laihi Wasallam)‎‎‎‎ fine dire: Dire li ki li retourne avec li. Quand li vine propre, lerla li donne li talaaq si li envi. Après ça (Hazrat) 'Oumar ‎‎(Radiyallahou anhou‎)‎‎ fine dire: O Allah so Rasoul ‎(Sallallaahou A'laihi Wasallam)‎‎‎‎, eski ça talaaq-là pou compté? Nabi ‎(Sallallaahou A'laihi Wasallam)‎‎‎‎ fine dire: Oui." (Ad-Darqutni)

Younous Bin Joubair, Nafi', Sha'bi et Saalim aussi fine rapporte ça hadice-là pareil couma Anas Bin Seerine fine rapporté. Alors ça li écarte la possibilité ki Anas Bin Seerine fine capave faire confusion dans rapporte li dans ça façon-là parceki li pas tout seul dans rapporte li dans ça façon-là.

Le fait ki Hazrat Abdullah Bin 'Oumar ‎(Radiyallahou anhou‎)‎ c'est la personne ki ti concernée par ça incident-là, c'est li même ki capave conne pli bien si ça talaaq-là ti compté ou pas ti compté. Ça li ene raison très valable pou dire ki ene talaaq ki fine donné en état de haiz, li ene talaaq ki compté et li prend l'effet.

D'après ene version ki trouve dans Sahih Boukhari, Hazrat Abdullah Bin 'Oumar ‎(Radiyallahou anhou‎)‎ dire:

"حسبت على بتطليقة"

"C'est-à-dire ça ene talaaq ki ti donné-là, ti compte ene talaaq."

Ki sanla ti considère ça comme ene talaaq? Ziska preuve du contraire, li bizin Rassouloullah ‎(Sallallaahou A'laihi Wasallam)‎‎‎‎ même. Pena aukene raison pou attribué ça à ene l'autre apart Rassouloullah ‎(Sallallaahou A'laihi Wasallam)‎‎‎‎ parceki quand Nabi ‎(Sallallaahou A'laihi Wasallam)‎‎‎‎ fine désapprouve la façon ki li fine donne so madame talaaq et li fine conseille li ceki li bizin faire, alors bizin li même ki fine situé la position de ça talaaq ki Hazrat Abdullah Bin 'Oumar ‎(Radiyallahou anhou‎)‎ fine donné auparavant. D'ailleurs la version de Ad-Darqutni, li bien clair ki c'était Nabi ‎(Sallallaahou A'laihi Wasallam)‎‎‎‎ même ki ti compte ça comme ene talaaq.

Hadice Abuz-Zubeir

Ena ene hadice ki rapporté par Abuz-Zubeir et ki trouve dans Abou Dawoud.

D'après ça hadice-là li paraite ki ça talaaq ki Hazrat Abdullah Bin 'Oumar ‎(Radiyallahou anhou‎)‎ ti donne so madame, pas ti compté parceki li dire:

"ولم يرها شيئا"

"C'est-à-dire li pas fine considère li ditout."

Imam Abou Dawoud dire ki ça hadice-là fine rapporté par Younous Bin Joubair, Anas Bin Seerine, Said Bin Joubair, Zaid Bin Aslam et Mansour. Mais personne pas fine rapporte li couma Abuz-Zubeir fine rapporté. Donc ça li faire ceki Abuz-Zubeir fine rapporté vine ene hadice 'Shaaz' (isolé et étrange) ki pas capave être considéré vis-à-vis banne hadices authentiques. Banne ki prend ça hadice-là comme base pou dire ki ene talaaq ki donné en état de haiz li pas compté, zotte commette erreur grave de rejette ceki la majorité fine rapporté au profit de ene récit ki fine être rapporté dans ene façon isolé. Normalement c'est ene l'attitude ki pas compatible avec banne ki lors la vérité. Probablement c'est ça même ki fine pousse Allaamah Bin Abdul Barr (368H-463H) dire ki c'est banne innovateurs et banne égarés ki dire ki ene talaaq ki fine donné pendant période de haiz li pas compté.

Donc selon l'opinion de la grande majorité ki basé lors banne hadices authentiques, li interdit pou donne ene madame talaaq pendant ki li dans so période de haiz. Mais malgré ça si kikene fine donné, li compté et li prend l'effet.

Gravité trois talaaq ene seul coup

"عن محمود بن لبيد رضى الله عنه قال اخبر رسول الله صلى الله عليه وسلم عن رجل طلق امرأته ثلاث تطليقات جميعا فقام غضبانا ثم قال ايلعب بكتاب الله وانا بين اظهركم؟ حتى قام رجل فقال يا رسول الله صلى الله عليه وسلم الا اقتله؟ (النسائ)

Traduction:

(Hazrat) Mahmoud Bin Labeed ‎‎(Radiyallahou anhou‎)‎‎ rapporté ki Rassouloullah ‎(Sallallaahou A'laihi Wasallam)‎‎‎‎ fine gagne l'information concernant ene personne ki ti donne so madame tous les trois talaaq ene seul coup. Alors Nabi ‎(Sallallaahou A'laihi Wasallam)‎‎‎‎ fine diboute dans colère et fine dire: "Eski pou faire badinage avec Allah so kitaab (livre) quand pourtant mo encore parmi zotte?" (Nabi ‎(Sallallaahou A'laihi Wasallam)‎‎‎‎ ti tellement en colère) à tel point ki ene personne fine diboute et fine dire: "O Allah so Rasoul ‎(Sallallaahou A'laihi Wasallam)‎‎‎‎ eski mo pas touye li?" (Nisaai)

Position hadice:

Ça hadice-là so sanad li ene sanad authentique. Donc pena doute ça hadice-là li ene hadice authentique.

Explication:

Rassouloullah ‎(Sallallaahou A'laihi Wasallam)‎‎‎‎ fine en colère quand li fine conné ki ene Sahabi fine donne so madame trois talaaq ene seul coup. Si Rassouloullah ‎(Sallallaahou A'laihi Wasallam)‎‎‎‎ fine en colère, ça veut dire ki donne tous les trois talaaq ene seul coup li bizin bien grave. D'ailleurs Nabi ‎(Sallallaahou A'laihi Wasallam)‎‎‎‎ fine qualifié ça façon donne talaaq-là de badinage et joué avec Allah Ta'ala so Kitaab (livre). Faire badinage et joué avec Kitaabullah (livre Allah) c'est kufr. C'est peut-être ça même l'impression ki fine amène ene Sahabi ki ti présent là-bas pou dimane Rassouloullah ‎(Sallallaahou A'laihi Wasallam)‎‎‎‎ permission pou touye ça personne-là. Mais en réalité Rassouloullah ‎(Sallallaahou A'laihi Wasallam)‎‎‎‎ pas ti prend li dans ça sens-là. C'est zisse pou montré gravité donne talaaq dans ça façon-là ki Nabi ‎(Sallallaahou A'laihi Wasallam)‎‎‎‎ fine qualifié li de badinage avec livre Allah Ta'ala. Si Nabi ‎(Sallallaahou A'laihi Wasallam)‎‎‎‎ fine servi ene terme aussi sévère, li bizin ene kitchose bien grave et ça li sufi pou montré ki donne 3 talaaq ene seul coup li ene façon bien pas bon d'après Shariah. Rassouloullah ‎(Sallallaahou A'laihi Wasallam)‎‎‎‎ fine qualifié donne 3 talaaq ene seul coup de badinage avec Kitaabullah acoze ki Qour'aan-e-Kareem li recommane donne talaaq ene par ene. Faire ene kitchose contre ceki Qour'aan indiqué, li représente badinage avec Qour'aan-e-Kareem ki li ene péché. Donc donne 3 talaaq ene seul coup, li ene péché d'après Qour'aan et hadice.

L'attitude Hazrat 'Oumar ‎(Radiyallahou anhou‎)‎

Pendant so règne, Hazrat 'Oumar ‎(Radiyallahou anhou‎)‎ ti bien sévère avec banne ki ti pé donne 3 talaaq ene seul coup. D'après ene récit authentique ki trouve dans Sounan Said Bin Mansour, Hazrat Anas ‎(Radiyallahou anhou‎)‎ rapporté:

"ان عمر رضى الله عنه كان اذا اتى برجل طلق امرأته ثلاثا اوجع ظهره (سنن سعيد بن منصور)

Traduction:

"Quand ti pé amène kit personne ki fine donne so madame 3 talaaq cote (Hazrat) 'Oumar ‎‎(Radiyallahou anhou‎)‎‎, li ti pé fouette li lors so le dos." (Said Bin Mansour)

Explication:

Nabi ‎(Sallallaahou A'laihi Wasallam)‎‎‎‎ fine exprime so colère à l'égard ene ki fine donne so madame tous les trois talaaq ene seul coup. Hazrat 'Oumar ‎(Radiyallahou anhou‎)‎ fine alle ziska applique punition physique et corporelle.

Pou ki raison zotte fine montré zotte l'attitude aussi sévère à l'égard ene personne pareil? Li pas capave pou ene simple kitchose. Li bizin ene kitchose bien pas bon. Mais pou ki raison li pas bon donne talaaq dans ça façon-là? Eski li pas bon zisse acoze ki fine prononce tous les trois talaaq ene seul coup ou bien acoze ki so l'effet et so conséquence li bien grave? Li paraite pli logique pou dire ki c'est acoze ki so conséquence li bien grave.

Ça conséquence bien grave-là, ki li capave été apart ki la personne li alle ferme tous banne la portes pou retourne avec so madame par donne so madame tous les trois talaaq ene seul coup. Si Shariat fine ordonne pou donne li ene par ene, c'est zisse acoze ki li capave rétracté et corrige so erreur si jamais li regretté plitard lors ceki li fine faire. Ça montré ki donne tous les trois talaaq ene seul coup, li ene péché et li ene mauvais façon donne talaaq.

Mais malgré si kikene fine faire li, alors tous les trois talaaq pou compté. Si tous les trois ti compte ene seul, pas ti pou ena aukene raison pou en colère ni kit raison pou applique punition corporelle.

Position trois talaaq ene seul coup dans l'époque Rassouloullah ‎(Sallallaahou A'laihi Wasallam)‎‎‎‎

"عن عائشة ان رجلا طلق امرأته ثلاثا فتزوجت فطلق فسئل النبى صلى الله عليه وسلم اتحل للاول قال لا حتى يذوق عسيلتها كما ذاق الاول (البخارى)

Traduction:

Rapporté par Hazrat Aisha ‎‎(Radiyallahou anhou‎)‎‎ ki ene personne fine donne so madame trois talaaq. Madame-là fine remarié et l'autre-là aussi fine donne li talaaq. Kikene fine approche Nabi ‎(Sallallaahou A'laihi Wasallam)‎‎‎‎ pou conné si eski ça madame-là li halaal pou le premier mari. Nabi ‎(Sallallaahou A'laihi Wasallam)‎‎‎‎ fine dire non (li pas halaal) tanque ki ça deuxième missié-là pas goûte ene tigite de so du miel pareil couma premier-là ti goûté. (Sahih Boukhari)

Explication:

Quand ene madame li séparé de so missié par trois talaaq, li pas capave retourne avec so missié. A moins si madame-là fine marié avec ene l'autre et ça l'autre-là aussi fine donne li talaaq ou bien li fine mort. Dans ça cas-là après so iddat, li capave retourne avec so premier missié par renouvelé nikah. Mais avec ene condition ki le 2eme mari fine consomme nikah. C'est-à-dire li pas sufi ki li faire nikah seulement et li gagne talaaq pou li capave retourne avec so ex-mari. Li aussi nécessaire ki so deuxième missié fine ena relation avec li.

Dans ça hadice-là, Rassouloullah ‎(Sallallaahou A'laihi Wasallam)‎‎‎‎ fine compare satisfaction et sensation sexuelle avec la douceur ki ena dans du miel. Mais li fine servi le terme عسيلة (usaila) ki li le diminutif de عسل (miel) ki signifié ene tigite de la douceur de du miel. D'ailleurs Nabi ‎(Sallallaahou A'laihi Wasallam)‎‎‎‎ fine servi 'goûter' au lieu 'manger'. Goûter signifié mange ene tigite. Donc Rassouloullah ‎(Sallallaahou A'laihi Wasallam)‎‎‎‎ fine exige goûte ene tigite au minimum afin ki madame-là capave vine halaal pou so ex-mari. Couma tout kitchose, relation sexuelle aussi ena ene commencement, ene climax ou ene stage pli haut et ene la fin. 'Goûte ene tigite' li applique pou ça stage dans commencement de relation sexuelle. Et relation sexuelle li commencé apartir pénétration de حشفة (ça parti ki coupé dans circoncision de l'organe sexuel masculin). Donc d'après hadice, pénétration de ça quantité-là li indispensable pou ranne ça madame-là halaal pou so ex-missié. Li paraite ki so deuxième missié ti donne li talaaq sans ki li ti gagne relation avec li. C'est acoze ça ki Nabi ‎(Sallallaahou A'laihi Wasallam)‎‎‎‎ pas fine autorise li retourne avec so premier missié.

D'après ça hadice-là li paraite ki ça personne-là ti donne so madame tous les trois talaaq ene seul coup. Couma li possible ki li fine capave donne li ene par ene aussi. Mais perna aukene raison pou dire ki li ti donne li en trois coup tanque pena preuve. Li paraite pli normal ki li fine donne li ene seul coup tous les trois talaaq d'après le texte du hadice.

Ça l'événement-là li nuancé et ressemblé avec l'événement ene Sahabi ki appelle رفاعة (Rifaa-ah). D'après l'ordre, Hazrat Rifaa-ah ti donne so madame trois talaaq séparément. Acoze ki li ressemblé avec l'événement de Hazrat Rifaa-ah, ena banne 'Oulama fine considère tous les deux événements comme ene seul. Mais d'après Allaamah Bin Hajar (R), c'est ene l'événement tout à fait différent de l'événement de Hazrat Rifaa-ah.

Donc d'après ça hadice-là, nou trouvé ki trois talaaq ki fine donné ene seul coup, li compte trois talaaq même. Et d'ailleurs Imam Boukhari (R) fine comprend ça même. Ça li paraite bien clair d'après la façon et le chapitre dans lequel li fine présente ça hadice-là.

Et ça trois talaaq-là fine bizin compté même pou ki Nabi ‎(Sallallaahou A'laihi Wasallam)‎‎‎‎ pas fine autorise li retourne avec so ex-missié. Si trois talaaq ti compte ene seul, ça madame-là ti pou gagne droit retourne avec so ex-missié après ki so 2eme missié donne li talaaq. Li pas ti nécessaire consomme nikah. C'est necque quand ene madame li séparé avec so missié par trois talaaq ki dimane consomme nikah dans deuxième nikah pou permette li retourne avec so ex-mari.

Acoze ça li paraite pli logique pou dire ki ti donne trois talaaq ene seul coup et ça trois talaaq-là ti compte trois talaaq même.

Hadice Hazrat Hassan ‎(Radiyallahou anhou‎)‎

"عن سويد بن غفلة قال كانت عائشة الخثعمية عند الحسن بن على رضى الله عنه فلما قتل على رضى الله عنه قالت لتهنئك الخلافة قال بقتل على تظهرين الشماتة؟ اذهبى فانت طالق يعنى ثلاثا ... قال لولا انى سمعت جدى اوحدثنى ابى انه سمع جدى يقول ايما رجل طلق امرأته ثلاثا عند الاقراء اوثلاثا مبهمة لم تحل له حتى تنكح زوجا غيره لراجعتها" (السنن الكبرى للبيهقى)

Traduction:

"Hazrat Souwaid Bin Raflah rapporté ki Aishah Al-Khas-'amiyah ti dans la caze Hazrat Hassan Bin Ali ‎(Radiyallahou anhou‎)‎ (c'est-à-dire li ti dans so nikah). Alors quand (Hazrat) Ali ‎(Radiyallahou anhou‎)‎ fine être assassiné, li (Aisha) fine dire: Félicitation à ou lors Khilaafat. Hazrat Hassan ‎(Radiyallahou anhou‎)‎ fine repone: Eski lors la mort (Hazrat) Ali ‎(Radiyallahou anhou‎)‎ ki to pé exprime contentement? Allé to ena tous les trois talaaq. … (Après ça li fine regretté) li fine dire: "Si mo pas ti tanne mo nana ou bien li fine dire si mo papa pas ti rapporte moi ki li fine tanne mo nana dire 'n'importe ki dimoune ki donne so madame trois talaaq (séparément) dans banne période de propreté ou bien li donne trois talaaq ene seul coup, alors ça madame-là pas pou halaal pou ça missié-là tanque ki li pas faire nikah avec ene l'autre missié', mo ti pou retourne avec li (c'est-à-dire avec Aisha)." (As-Sounan Al-Koubra par Al-Baihaqui)

Position hadice:

Selon Al Hafiz Bin Rajab, c'est ene hadice ki so sanad li ene sanad authentique. Ena ene rawi nommé عمرو بن ابى قيس الازرق (Amr Bin Abou Qais Al-Azraq) dans so sanad. Apart ene deux ti erreur ki li commette dans rapporte hadice, li ene rawi correcte. Coumsa même nou ena ene rawi nommé سلمة بن الفضل (Salamah Bin Al-Fadhl) ki li ene rawi passable. Donc pena aukene rawi dans le sanad ki fine être rejeté par l'unanimité de tous banne savants de hadice. Plis plis zotte qualifié de banne narrateurs controversable. Banne rawi pareil zotte hadice bénéficié le degré hadice hassan ki capave servi comme preuve.

Explication:

Hazrat Hassan ‎(Radiyallahou anhou‎)‎ ti marié avec ene madame nommé Aisha. Quand Hazrat Hassan ‎(Radiyallahou anhou‎)‎ so papa Hazrat Ali ‎(Radiyallahou anhou‎)‎ fine shaheed, alors automatiquement c'est Hazrat Hassan ‎(Radiyallahou anhou‎)‎ même ki ti bizin vine Khalifah. So madame Aisha fine félicite li lors poste de Khalifah. Hazrat Hassan ‎(Radiyallahou anhou‎)‎ fine prend ça comme ene expression de contentement lors la mort Hazrat Ali ‎(Radiyallahou anhou‎)‎. Alors li fine donne so madame Aisha tous les trois talaaq ene seul coup. Après ça li fine chagrin parceki so madame Aisha pas ti félicite li par ça l'intention-là. Mais li pas fine capave faire narien acoze ki li ti ena ene hadice dans so connaissance cote Nabi ‎(Sallallaahou A'laihi Wasallam)‎‎‎‎ dire ki ene madame ki fine gagne trois talaaq ene seul coup ou bien fine gagne li séparément, pas capave retourne avec so ex-missié tanque li pas marié avec ene l'autre. Ça hadice-là montré ki trois talaaq ki fine donné dans ene seul coup, li compte 3 talaaq. Après 3 talaaq, ene madame pas capave retourne avec so missié. Li bizin d'abord consomme nikah, gagne talaaq et observe so iddat. Après iddat, si li oulé retourne avec so ex-mari, li capave renouvelé so nikah avec li et retourne avec li.

D'après ça l'événement-là li paraite ki Aisha pas ti ena aukene mauvaise intention quand li ti félicite so missié Hazrat Hassan ‎(Radiyallahou anhou‎)‎. Mais contexte et circonstance dans lequel li ti félicite Hazrat Hassan ‎(Radiyallahou anhou‎)‎, fine jouer conte li. Ça veut dire ki li ti innocent. Forcé-forcé capave dire ki fine ena ene négligence dans ene façon indélibéré.

Dans ménage, ene négligence pareil li tolérable. Malgré ça, tous les trois talaaq fine considéré comme trois talaaq valable ki fine faire ça l'effet mette séparation pou tout le temps entre missié-madame. Ça montré ki l'innocence ene madame pas empêche talaaq ki li fine gagné compté.

Hadice Hazrat Abdullah Bin 'Oumar ‎(Radiyallahou anhou‎)‎

"... قال ابن عمر رضى الله عنه يا رسول الله لو طلقتها ثلاثا كان لى ان اراجعها؟ قال: اذا بانت منك وكانت معصية" (الطبرانى)

Traduction:

"…. Hazrat Abdullah Bin 'Oumar ‎(Radiyallahou anhou‎)‎ fine dimandé: "O Allah so Rasool ‎(Sallallaahou A'laihi Wasallam)‎‎‎‎, si jamais mo ti donne tous le trois talaaq, eski mo ti pou ena droit retourne avec li?" Rassouloullah ‎(Sallallaahou A'laihi Wasallam)‎‎‎‎ fine repone: "Bé dans ça cas-là li ti pou séparé (complètement) avec toi et ça (façon donne talaaq-là) ti pou ene désobéissance." (Tabraani)

Position hadice et explication:

Dans sanad ça hadice-là ena ene rawi nommé على بن سعيد الرازى (Ali Bin Sa'eed Ar-Raazi). Selon Ad-Darqutni, li pas ene rawi solide. Mais lezot savants de hadice fine faire banne déclarations très favorable à so l'égard. Selon le ميزان الاعتدال (Meezaanul I'tidaal) de Allaamah Az-Zahabi, li ti ene hafiz de hadice ki fine bien voyagé et fine bien faire le tour pou collecté hadice. Quant à propos négatif tenu à so l'égard par Ad-Darqutni, ça pas fine être apprécié par Allaamah Az-Zahabi. Selon اسرائيل بن يونس (Israa-ïl Bin Younus) aussi, li ene narrateur authentique.

Donc d'après l'ordre pena personne ki fine cause contre li apart Ad-Darqutni. Et Ad-Darqutni aussi so critique li pas tellement ça sévère-là. Li bien minime et léger. Acoze ça so présence dans ça sanad-là li pas ene raison ki affaibli position ça hadice-là.

Ça hadice-là fine aussi rapporté dans Sounan Al-Baihaqui et Sounan Ad-Darqutni. Dans sanad ça hadice ki paraite dans Sounan Al-Baihaqui, ena le rawi عطاء الخراسانى ki selon Al-Baihaqui, li pas ene rawi correcte. Mais d'après Imam Tirmizi, Imam Nisaaï et Abou Hatim li ene rawi correcte et li déjà ene parmi banne narrateurs ki so hadice trouve dans Sahih Mouslim aussi.

Li bon à noté ki le rawi عطاء الخراسانى fine être secondé dans ceki li fine rapporté par le rawiشعيب بن زريق (Shou'aib Bin Zouraiq). C'est-à-dire d'après la version ki trouve dans Tabraani, Shou'aib Bin Zouraiq fine rapporte ça hadice-là directement avec Hazrat Hassan Al-Basri. Et d'après Sounan Al-Baihaqui et Sounan Ad-Darqutni, Shou'aib Bin Zouraiq fine rapporte ça de Hazrat Hassan Al-Basri à traversعطاء الخراسانى. Li possible ki li fine tanne ça hadice-là dans tous les deux façons. Ene à travers عطاء الخراسانى et deuxième façon directement avec Hazrat Hassan Al-Basri. Donc dans ça sens-là li possible qualifié شعيب de ene متابع (renfort) pou عطاء الخراسانى. Quant à شعيب li ene rawi authentique d'après Imam Ad-Darqutni et Ibn Hibbaan. Après tout forcé-forcé nou capave dire ki عطاء الخراسانى li ene rawi مختلف قيه (controversé). En principe ene rawi semblable so hadice li ene hadice hassan.

Ena ene l'autre rawi nommé معلى بن منصور (Mou'alla Bin Mansour) ki d'après certains, fine être critiqué et qualifié de menteur par Imam Ahmad (R). Mais li ene fausse prétention parceki c'est ene rawi ki so hadice li trouve dans Sahih Boukhari et Sahih Mouslim et lezot livres de hadice. Au contraire Imam Ahmad fine sélecté li dans la liste banne narrateurs authentiques. Banne experts dans matière de hadice coumaيحيى بن معين (Yahya Bin Ma-ine), ابو زكريا (Abou Zakariyya), العجلى (Al-'Ijli), يعقوب بن شيبة (Yaqoub Bin Shaibah), ابو حاتم (Abou Hatim), ابو زرعة (Abou Zour'ah), على بن المدينى (Ali Bin Al-Madeeni), خيثمة (Khaiçamah) et banne savants de hadice en général fine qualifié li de ene narrateur solide et authentique.

Donc de toute façon, c'est ene hadice solide et authentique surtout quand li appuyé par le fatwa ki Hazrat Abdullah Bin 'Oumar ‎(Radiyallahou anhou‎)‎ fine continué donné après. Selon ene hadice ki trouve dans Sahih Mouslim, quand kikene ti pé pose li question lors ça sujet-là, Hazrat Abdullah Bin 'Oumar ‎(Radiyallahou anhou‎)‎ ti pé repone dans ça terme suivant-là:

"اما انت طلقت امرأتك مرة او مرتين فان رسول الله صلى الله عليه وسلم امرنى بهذا وان كنت طلقتها ثلاثا فقد حرمت عليك حتى تنكح زوجا غيرك وعصيت الله فيما امرك من طلاق امرأتك"

Traduction:

"Si to fine donne to madame ene ou deux talaaq, (c'est dans ene cas pareil ki) Rassouloullah ‎(Sallallaahou A'laihi Wasallam)‎‎‎‎ ti donne moi ça l'ordre-là (c'est-à-dire pou reprend mo madame dans mo nikah). Mais si to fine arrivé donne li trois talaaq, alors to madame fine fini vine haraam lors toi tanque li pas faire nikah avec ene l'autre apart toi. Et (dans ça cas-là) to fine désobéir Allah dans l'ordre ki li fine donne toi concernant (la façon ki to bizin adopté) dans donne to madame talaaq." (Sahih Mouslim)

Li paraite ki Hazrat Abdullah Bin 'Oumar ‎(Radiyallahou anhou‎)‎ fine bizin tanne quelque chose dans ça sens-là avec Rassouloullah ‎(Sallallaahou A'laihi Wasallam)‎‎‎‎ pou ki li donne ça fatwa-là. Ça fatwa-là li ene support et ene renfort solide pou le hadice de Tabraani, Baihaqui et Darqutni ki li même fine rapporté de Nabi ‎(Sallallaahou A'laihi Wasallam)‎‎‎‎. Donc ene dans l'autre, ça hadice-là li ene preuve bien solide pou soutenir la thèse ki dans l'époque Rassouloullah ‎(Sallallaahou A'laihi Wasallam)‎‎‎‎, trois talaaq ki ti pé donné ene seul coup, ti pé compte trois talaaq même.

Ça hadice-là li ene partie de ene longue hadice selon lequel Hazrat Abdullah Bin 'Oumar ‎(Radiyallahou anhou‎)‎ ti donne so madame ene talaaq pendant ki so madame ti dans so période de haiz. Rassouloullah ‎(Sallallaahou A'laihi Wasallam)‎‎‎‎ ti ordonne li pou retourne avec so madame et ti recommanne li si jamais li ena l'intention pou donne talaaq, ki li donne li dans ene période de propreté dans lequel li pas fine gagne relation avec so madame là-dans. Dans ça même l'occasion-là, Hazrat Abdullah Bin 'Oumar ‎(Radiyallahou anhou‎)‎ ti rode conné si jamais li ti donne so madame tous les trois talaaq ene seul coup, eski li ti pou ena droit retourne avec so madame. En réponse Rassouloullah ‎(Sallallaahou A'laihi Wasallam)‎‎‎‎ ti faire li conné ki malgré li pas gagne droit donne talaaq dans période de haiz et ni donne tous les trois talaaq ene seul coup, ça talaaq-là ti pou compté et so madame ti pou séparé complètement avec li.

Hadice Hazrat Mahmoud Bin Labeed ‎(Radiyallahou anhou‎)‎

Traduction:

"Eski pou faire badinage avec Allah so kitaab (livre) quand pourtant mo encore parmi zotte?" (Nabi ‎(Sallallaahou A'laihi Wasallam)‎‎‎‎ ti tellement en colère) à tel point ki ene personne fine diboute et fine dire: "O Allah so Rasoul ‎(Sallallaahou A'laihi Wasallam)‎‎‎‎ eski mo pas touye li?" (Nisaai)

Remarque:

Ça hadice-là montré ki pas gagne droit donne tous les trois talaaq ene seul coup. Mais si kikene donne li dans ça façon-là, li pou compte trois même. Si tous les trois ti compte ene seul, pas ti pou ena aukene raison pou Nabi ‎(Sallallaahou A'laihi Wasallam)‎‎‎‎ en colère. Faudré ki li compte trois même et ki li faire ene dégât irréparable pou ki Nabi ‎(Sallallaahou A'laihi Wasallam)‎‎‎‎ fine en colère parceki ça façon donne talaaq-là li rompe tout relation ene seul coup sans aukene utilité pou faire li dans ça façon-là.

Hadice Hazrat Ubaadah Bin Swamit ‎(Radiyallahou anhou‎)‎

عن عبادة بن الصامت رضى الله عنه قال طلق بعض آبائى امرأته الفا فانطلق بنوه الى رسول الله صلى الله عليه وسلم فقالوا يا رسول الله ان ابانا طلق امنا الفا فهل له من مخرج؟ قال ان اباكم لم يتق الله تعالى فيجعل له من امره مخرجا. بانت منه بثلاث على غير السنة وتسعمائة وسبع وتسعون اثم فى عنقه" (مصنف عبد الرزاق/ الطبرانى)

Traduction:

Rapporté par Hazrat Ubaadah Bin Swamit ‎(Radiyallahou anhou‎)‎ ki fine dire:

"Ene mo banne grand dimoune fine donne so madame talaaq. Alors so banne zenfants fine alle cote Rassouloullah ‎(Sallallaahou A'laihi Wasallam)‎‎‎‎ et zotte fine dimandé: O Allah so Rasoul ‎(Sallallaahou A'laihi Wasallam)‎‎‎‎, nou papa fine donne nou mama mille talaaq. Eski ena kit chemin sorti pou li? Nabi ‎(Sallallaahou A'laihi Wasallam)‎‎‎‎ fine repone: Zotte papa pas fine peur Allah Ta'ala pou Allah Ta'ala faire ene chemin sorti pou li dans so problème. So madame fine séparé complètement avec li par 3 talaaq conte principe. Et 997 talaaq pou reste ene péché dans so li cou." (Mouswannaf Abdurrazzaaq/ Tabraani)

Position hadice:

Ena ene rawi nommé عبيد الله بن الوليد (Ubaidullah Bin Al-Waleed) dans sanad ça hadice-là. Selon الهيثمى (Al-Haithami), li ene rawi faible. Mais d'après le ميزان الاعتدال (Meezaan-ul-'Itidaal) de Allaamah Az-Zahabi, c'est ene rawi ki so hadice fine être considéré d'après Imaam Ahmad Bin Hambal (R). Donc si li pas ene rawi solide, li pas ça faible-là aussi ki nécessite rejette so hadice. Capave servi li comme ene شاهد (renfort) pou le hadice rapporté par Hazrat Hassan ‎(Radiyallahou anhou‎)‎ et Hazrat Abdullah Bin 'Oumar ‎(Radiyallahou anhou‎)‎.

Explication:

Quand ene missié donne so madame ene talaaq, ça talaaq-là li compte ene seul. Coumsa même quand li donne li deux ou trois talaaq, alors li compte la quantité talaaq ki li fine donné. Si li donne plis ki trois talaaq, alors li compte trois talaaq même parceki ene missié li ena pouvoir de seulement trois talaaq. Et banne talaaq en plis-là li reste ene fardeau lors so la tête. D'après ça hadice-là, donne trois talaaq ou plis ki trois talaaq ene seul coup li ene péché. Mais ça pas empêche talaaq-là compté.

Hadice Hazrat Roukaanah ‎(Radiyallahou anhou‎)‎

ان ركانة بن عبد يزيد طلق امرأته سهيمة البتة فاخبر النبى صلى الله عليه وسلم بذالك وقال والله ما اردتُ الاواحدة فقال رسول الله صلى الله عليه وسلم والله ما اردتَ الا واحدة؟ فقال وكانة والله ما اردتُ الا واحدة فردها اليه رسول الله صلى الله عليه وسلم فطلقها الثانية فى زمان عمر والثالثة فى زمان عثمان" (ابو داؤد)

Traduction:

(Hazrat Roukaanah) Bin Abd Yazeed ‎‎(Radiyallahou anhou‎)‎‎ ti donne so madame Suhaimah talaaq "Al-Battah". Li fine informe Nabi ‎(Sallallaahou A'laihi Wasallam)‎‎‎‎ de ça kitchose-là et li fine dire:"Par Allah, mo pas ti ena aukene l'intention (par dire Al-Battah) apart ene seul talaaq." Lors ça Rassouloullah ‎(Sallallaahou A'laihi Wasallam)‎‎‎‎ fine dimane li:"Par Allah! To pas ti ena aukene l'intention apart ene seul talaaq?" (Hazrat) Roukanaah ‎‎(Radiyallahou anhou‎)‎‎ fine repone: ""Par Allah, mo pas ti ena aukene l'intention apart ene seul talaaq." Alors Rassouloullah ‎(Sallallaahou A'laihi Wasallam)‎‎‎‎ fine faire so madame retourne avec li. Après ça li fine donne so madame deuxième talaaq dans l'époque Hazrat 'Oumar ‎(Radiyallahou anhou‎)‎ et troisième talaaq dans l'époque Hazrat Usmaan ‎(Radiyallahou anhou‎)‎." (Abou Dawoud)

Position hadice:

Imam Shafi' (R) fine rapporte ça hadice-là de so chacha Mohammad Bin Ali de Abdullah Bin Ali Bin Saa-ib de Nafi' Bin Ujair de Hazrat Roukanaah ‎(Radiyallahou anhou‎)‎.

Imam Shafi' fine qualifié so chacha Mohammad Bin Ali et Abdullah Bin Ali Bin Saa-ib de banne rawi authentique. Ibn Hibbaan fine mentionne نافع بن عجير (Nafi' Bin Ujair) dans la liste banne Sahabah. Coumsa même ça hadice-là fine rapporté par Zubeir Bin Saeed de Abdullah Bin Ali aussi. Ene dans l'autre, les deux vine dans ene niveau ki permette servi li comme ene preuve.

Explication:

'Al-Bataah" c'est ene formule ki ti pé utilisé pou donne talaaq. Ça ti pé signifié ene talaaq couma li ti pé signifié trois talaaq aussi. Hazrat Roukanaah ‎(Radiyallahou anhou‎)‎ fine servi ça même formule pou donne so madame talaaq. Mais li pas ti ena l'intention de 3 talaaq. Li ti ena l'intention donne ene seul talaaq. Rassouloullah ‎(Sallallaahou A'laihi Wasallam)‎‎‎‎ fine faire li faire serment ki li ti ena l'intention ene seul talaaq. Quand li fine faire serment ki li ti ena l'intention ene seul talaaq, alors Rassouloullah ‎(Sallallaahou A'laihi Wasallam)‎‎‎‎ fine accepté li et fine autorise li retourne avec so madame.

Ça hadice-là montré ki si Hazrat Roukanaah ‎(Radiyallahou anhou‎)‎ ti ena l'intention pou donne trois talaaq, alors ça aussi ti pou compté et li ti pou compte trois talaaq même. Sinon pas ti ena aukene nécessité pou Nabi ‎(Sallallaahou A'laihi Wasallam)‎‎‎‎ faire li faire serment ki li ti ena l'intention ene seul talaaq. Donc ça hadice-là li ene preuve ki dans l'époque Nabi ‎(Sallallaahou A'laihi Wasallam)‎‎‎‎ trois talaaq ti compte trois talaaq même.

Mise au point:

D'après ene récit ki fine rapporté par ene l'autre sanad, Hazrat Roukanaah ‎(Radiyallahou anhou‎)‎ ti donne so madame 3 talaaq ene seul coup. Rassouloullah ‎(Sallallaahou A'laihi Wasallam)‎‎‎‎ ti autorise li retourne avec so madame. Si ça récit-là li correct, alors li capave servi comme ene preuve pou banne ki dire ki trois talaaq ki pé donné dans ene seul coup, ti pé compte ene seul talaaq dans l'époque Nabi ‎(Sallallaahou A'laihi Wasallam)‎‎‎‎.

Mais Imam Abou Dawoud pas fine considère ça récit-là comme ene récit authentique. Li dire ki ça hadice ki نافع بن عجير et Abdullah Bin Ali fine rapporté selon lequel Hazrat Roukanaah ‎(Radiyallahou anhou‎)‎ ti donne talaaq Al-Battah, li pli authentique parceki selon li:

"لانهم ولد الرجل واهله اعلم به ان ركانه انما طلق امرأته البتة فجعلها النبى صلى الله عليه وسلم واحدة"

Traduction:

"A coze ki ça banne-là (c'est-à-dire نافع بن عجير et عبد الله بن على), c'est zenfants de la personne concernée. Normalement la famille ene dimoune li conne dimoune-là so problème pli bien. Donc (d'après zotte) Hazrat Roukanaah ‎(Radiyallahou anhou‎)‎ ti donne so madame talaaq Al-Battah ki Nabi ‎(Sallallaahou A'laihi Wasallam)‎‎‎‎ ti considère li ene seul talaaq."

Allaamah Bin Hajar Al-Asqalaani fine exprime so appréciation pou ça justification ki Imam Abou Dawoud fine avancé. Allaamah Abou Bakar Al-Jassaas ‎(Radiyallahou anhou‎)‎ fine qualifié banne récit ki dire ki Hazrat Roukanaah ‎(Radiyallahou anhou‎)‎ ti donne so madame 3 talaaq de منكر (étrange). Allaamah Ibn Houmaam aussi fine qualifié li de ene hadice منكر.

Ki faire ça hadice-là li منكر?

Si ça fine qualifié de ene hadice منكر, c'est acoze ki li oppose le récit ki fine rapporté par banne narrateurs solide et authentique ki Hazrat Roukanaah ‎(Radiyallahou anhou‎)‎ ti donne so madame talaaq Al-Battah avec l'intention de ene seul talaaq. Non pli li ti donne trois talaaq. Ça veut dire Hazrat Roukanaah ‎(Radiyallahou anhou‎)‎, en vérité, li ti donne so madame talaaq Al-Battah avec l'intention ene seul talaaq.

Comment ce fait-il ki Al-Battah fine changé par trois talaaq?

La formule Al-Battah capave signifié trois talaaq couma li capave signifié ene talaaq aussi. Li paraite ki ene certain rawi fine rapporte ça hadice-là de par so sens. Li pas fine respecté la formule exact de ça hadice-là. Alors li fine interprète le mot Al-Battah par trois talaaq.

Récit pli authentique

Mais selon le récit pli authentique, Hazrat Roukanaah ‎(Radiyallahou anhou‎)‎ pas ti donne trois talaaq. Li ti donne talaaq Al-Battah avec l'intention pou donne ene seul talaaq ki Rassouloullah ‎(Sallallaahou A'laihi Wasallam)‎‎‎‎ fine accepté li sous serment et fine autorise li retourne avec so madame.

Donc li pas correct servi hadice Hazrat Roukanaah ‎(Radiyallahou anhou‎)‎ pou dire ki trois talaaq ti compte ene seul talaaq. Au contraire li ene preuve solide pou dire ki trois talaaq ti compte trois talaaq même dans l'époque Nabi ‎(Sallallaahou A'laihi Wasallam)‎‎‎‎. C'est la raison pou laquelle Nabi ‎(Sallallaahou A'laihi Wasallam)‎‎‎‎ fine prend so déclaration sous serment pou assuré ki li pas ti signifié trois talaaq avant donne li l'autorisation pou retourne avec so madame.

Ziska là nou fine étudié six hadice de six différent Sahaba-e-Kiraam ki prouvé ki trois talaaq donné dans ene seul coup ti compte trois talaaq même dans l'époque Rassouloullah ‎(Sallallaahou A'laihi Wasallam)‎‎‎‎.

Aster nou pou guette ki l'attitude banne Sahaba fine adopté concernant ça sujet-là après Nabi ‎(Sallallaahou A'laihi Wasallam)‎‎‎‎.

Trois talaaq dans ene seul coup et banne Sahaba-e-Kiraam

L'attitude Hazrat 'Oumar ‎(Radiyallahou anhou‎)‎

"عن زيد بن وهب انه رفع الى عمر رجل طلق امراته الفا وقال انما كنت العب فعلاه عمر رضى الله عنه بالدرة وقال انما يكفيك من ذلك ثلاثة" (مصنف عبد الرزاق/ سنن البيهقى/ الدارقطنى)

Traduction:

Zaid Bin Wahab rapporté ki ene personne fine présente devant Hazrat 'Oumar ‎(Radiyallahou anhou‎)‎ ki ti donne so madame mille talaaq et fine dire: "Mo ti pé necque badiné." Hazrat 'Oumar ‎(Radiyallahou anhou‎)‎ fine donne li coute fouette et fine dire li: "C'est necque trois même ti assez pou toi là-dans." (Mouswannaf Abdurrazzaaq, Sounan Al-Baihaqui, Ad-Darqutni)

Position hadice:

C'est ene hadice ki tous banne narrateurs dans so sanad zotte banne narrateurs authentique. Donc pena doute ki ça hadice-là li ene hadice authentique.

Explication:

Selon la version ki trouve dans le Mouswannaf Abdurrazzaaq, ene personne fine joine ene l'autre personne ki ti content faire badinage. Alors li fine dimane li si eski li fine donne so madame talaaq et combien talaaq li fine donné. En réponse, dans badinage li fine dire ki li fine donne so madame 1000 talaaq. Quand li fine présenté cote Hazrat 'Oumar ‎(Radiyallahou anhou‎)‎, Hazrat 'Oumar ‎(Radiyallahou anhou‎)‎ fine donne li coute fouette et fine faire li conné ki malgré li fine dire ça dans badinage, so madame fine fini gagne talaaq. Et li fine faire li conné ki c'est seulement trois talaaq ki li ti sufi depi dans ça 1000 talaaq-là. Ça prouve trois kitchose:

Premièrement d'après Hazrat 'Oumar ‎(Radiyallahou anhou‎)‎, trois talaaq ou bien plis ki trois talaaq ki donné dans ene seul coup, li compte trois talaaq même.
Deuxièmement talaaq ki donné dans badinage, li valable et li prend l'effet.
Troisièmement donne tous les trois talaaq ene seul coute li ene pratique ki conte Shariah. Acoze ça Hazrat 'Oumar ‎(Radiyallahou anhou‎)‎ fine fouette ça personne ki ti faire ça.

Fatwa de Hazrat 'Oumar ‎(Radiyallahou anhou‎)‎

"عن شقيق انه سمع انسا يقول قال عمر فى الرجل يطلق ثلاثا قبل ان يدخل بها قال هى ثلاث لا تحل له حتى تنكح زوجا غيره"

(سنن سعيد بن منصور/ مصنف عبد الرزاق/ شرح معانى الآثار / سنن البيهقى)

Traduction:

"Rapporté par Shaqeeq ki li fine tanne Hazrat Anas ‎‎(Radiyallahou anhou‎)‎‎ dire ki Hazrat 'Oumar ‎‎(Radiyallahou anhou‎)‎‎ ti pé dire concernant ene dimoune ki fine donne (so madame) trois talaaq avant li alle dans ménage avec li ki ça li compte trois talaaq. Ça madame-là pas halaal pou li tanque ki li pas marié avec ene l'autre missié." (Sounan Saeed Bin Mansour, Mouswannaf Abdurrazzaaq, Sharh Ma-anil Athaar, Sounan Al-Baihaqui)

Position hadice et explication:

C'est ene hadice authentique. Ça récit authentique-là permette nou déduire aisément sans aukene ambiguïté et sans aukene difficulté ki d'après Hazrat 'Oumar ‎(Radiyallahou anhou‎)‎, trois talaaq ki donné ene seul coup, li compte trois même.

Fatwa Hazrat Usmaan ‎(Radiyallahou anhou‎)‎

"عن معاوية بن ابى يحيى قال جاء رجل الى عثمان بن عفان فقال طلقت امرأتى الفا فقال بانت منك بثلاث" (زاد المعاد لابن القيم)

Traduction:

Mou'awiyah Bin Abou Yahya rapporté ki ene dimoune fine vine cote Hazrat Usmaan ‎(Radiyallahou anhou‎)‎ et fine dire: "Mo fine donne mo madame mille talaaq." Hazrat Usmaan ‎(Radiyallahou anhou‎)‎ fine repone: "Li fine séparé de toi par trois talaaq." (Zaadul-Ma-ad par Ibnul Qayyim)

Position hadice:

Ibnul Qayyim fine amène ça hadice-là dans so Zaadul-Ma-ad sans faire kit remarque lors-là. Li paraite pli probable ki d'après li pena narien à reproché avec le sanad. Sinon nou conné ki li pas laisse allé ene kitchose ki pas correct d'après li.

Fatwa Hazrat Ali ‎(Radiyallahou anhou‎)‎

عن عبد الرحمن بن ابى ليلى عن على رضى الله عنه فيمن طلق امرأته ثلاثا قبل ان يدخل بها قال لا تحل له حتى تنكح زوجا غيره (سنن البيهقى)

Traduction:

"Abdurrahmaan Bin Abou Laila rapporté de Hazrat Ali ‎(Radiyallahou anhou‎)‎ ki li fine dire concernant ene personne ki fine donne so madame trois talaaq, ki ça madame-là li pas halal pou li tanque ki li pas faire nikah avec ene l'autre missié." (Sounan Al-Baihaqui)

Position hadice:

Ibnul Qayyim fine rapporte ça hadice-là dans so livre ki appelle اغاثة اللهفان (Ighaathatul-Luhfaan) sans faire kit commentaire lors so sanad. C'est ene indication de so part ki li ene hadice correcte.

Ibnul Qayyim fine rapporte ene l'autre hadice de Hazrat Ali ‎(Radiyallahou anhou‎)‎ dans so زاد المعاد (Zaadul-Ma'ad). Selon ça hadice-là, Habeeb Bin Abou Thabit dire:

جاء رجل الى على بن ابى طالب فقال انى طلقت امرأتى الفا فقال له على كرم الله وجهه: بانت منك بثلاث واقسم سائرهن بين نسائك"

Traduction:

"Ene personne fine vine cote Hazrat Ali Bin Abou Talib ‎‎(Radiyallahou anhou‎)‎‎ et fine dire: Mo fine donne mo madame mille talaaq. Alors Hazrat Ali ‎(Radiyallahou anhou‎)‎ fine dire: Li fine séparé de toi par 3 talaaq. Et partage le reste entre to banne madames."

Ici aussi Ibnul Qayyim pas fine dire narien lors so sanad. C'est ene indication de so part ki li correcte de par so sanad. Ene fatwa similaire de Hazrat Ali ‎(Radiyallahou anhou‎)‎ fine rapporté par شريك بن ابى نمر (Shareek Bin Abou Namir) ki trouve dans Mouswannaf Abdurrazaaq. Ça sanad-là aussi li passable et assez correcte. Dans l'ensemble, li ene hadice assez fort et solide.

Explication:

Ene madame ki fine séparé avec so missié par ene ou deux talaaq, li gagne droit retourne avec so missié. Dans certaine cas ça retour-là capave faire li sans renouvelé nikah couma dans certaine cas bizin refaire nikah. Mais si ene madame séparé avec so missié par trois talaaq, li pas pou ena droit retourne avec so ex-missié. A moins si li remarié avec ene l'autre et ça l'autre-là li consomme nikah. Après ça li donne talaaq et madame-là observe iddat. Après iddat, si madame-là et so ex-missié tous les deux intéressé, zotte capave retrouve zotte ensemble par refaire nikah avec tout so formalités. Mais à aukene moment pas gagne droit arrange ene nikah zisse avec le but pou madame-là retourne avec so ex-missié.

Selon ça récit-là, d'après Hazrat Ali ‎(Radiyallahou anhou‎)‎, quand ene missié donne so madame trois talaaq ene seul coup, so madame li sorti en dehors so nikah et li pas gagne droit retourne avec li tanque ki li pas remarié avec ene l'autre missié. Ça montré ki d'après Hazrat Ali ‎(Radiyallahou anhou‎)‎, trois talaaq ki fine donné dans ene seul coup, li compte trois talaaq même. Sinon d'après principe pas ti bizin exige marié avec ene l'autre pou capave retourne avec so ex-missié.

Fatwa Hazrat Abdullah Bin Mas'oud ‎(Radiyallahou anhou‎)‎

"عن علقمة قال جاء رجل الى ابن مسعود فقال انى طلقت امرأتى تسعة وتسعين وانى سألت فقيل لى قد بانت منى فقال ابن مسعود: لقد احبوا ان يفرقوا بينك وبينها قال فما تقول رحمك الله. فظن انه سيرخص له. فقال ثلاث تبينها منك وسائرها عدوان" (مصنف عبد الرزاق/ سنن البيهقى)

Traduction:

Alqamah rapporté ki ene dimoune fine vine cote (Hazrat Abdullah) Bin Mas'oud ‎‎(Radiyallahou anhou‎)‎‎ et fine dire: "Mo fine donne mo madame 99 talaaq. Mo fine renseigné et mo fine gagne l'information ki mo madame fine séparé avec moi". Lors ça (Hazrat Abdullah) Bin Mas'oud ‎‎(Radiyallahou anhou‎)‎‎ fine dire: "(Coumsa) Banne-là fine envie mette séparation entre toi et li!" La personne fine dire: "Et ou, ki ou dire?" Li fine pensé ki li pou faire ene concession pou li. Alors (Hazrat Abdullah) Bin Mas'oud ‎(Radiyallahou anhou‎)‎ fine dire: "Trois talaaq fine sépare li de toi et le reste li ene désobéissance." (Mouswannaf Abdurrazzaaq/ Sounan Al-Baihaqui)

Position hadice:

Selon Ibn Hazm, c'est ene hadice ki bénéficié ene degré très avancé de l'authenticité.

Explication:

D'après la version ki trouve dans Al-Baihaqui et dans Sharh Ma-anil Athaar, li faire mention de 100 talaaq au lieu 99 talaaq. Mais ça pas faire aukene différence parceki l'essentiel c'est ki la personne ti donne plis ki 3 talaaq. Ene personne donne trois talaaq ou bien plis ki trois talaaq, c'est necque trois talaaq même ki pou compté parceki ene personne li ena seulement le pouvoir de trois talaaq même. Ça hadice-là montré ki selon Hazrat Abdullah Bin Mas'oud ‎(Radiyallahou anhou‎)‎, trois talaaq ki donné dans ene seul coup li compte trois même. Coumsa même quand ene dimoune li donne plis ki trois talaaq, c'est necque trois talaaq même ki compté.

D'après ça hadice-là, li paraite ki c'était ene notion tout à fait normal dans l'époque Hazrat Abdullah Bin Mas'oud ‎(Radiyallahou anhou‎)‎ ki trois talaaq ki fine donné dans ene seul coup li compte trois même. C'est acoze ça même tous banne personne ki ça dimoune-là ti contacté, zotte ti dire li ki so madame fine séparé complètement avec li.

L'époque de Hazrat Abdullah Bin Mas'oud ‎(Radiyallahou anhou‎)‎ c'était ene l'époque cote ti encore ena banne Sahaba-e-Kiraam et ti ena banne tabeines en abondance. Donc ça montré ki selon l'idée et notion ki ti prévaloir en général chez banne Sahaba-e-Kiraam et banne tabeines dans l'époque Hazrat Abdullah Bin Mas'oud ‎(Radiyallahou anhou‎)‎, trois talaaq ki donné en ene seul coup ti compte trois même.

Fatwa Hazrat Abdullah Bin 'Oumar ‎(Radiyallahou anhou‎)‎

"عن ابن عمر قال من طلق امرأته ثلاثا طلقت وعصى ربه" (مصنف عبد الرزاق)

Traduction:

"Fine rapporté ki Hazrat Abdullah Bin 'Oumar ‎(Radiyallahou anhou‎)‎ fine dire: Celui ki donne so madame trois talaaq, so madame li gagne talaaq et par cela la personne fine désobéir so Rabb." (Mouswannaf Abdurrazzaaq)

Position hadice et explication:

C'est ene hadice sahih (authentique).

D'après ça hadice-là, celui ki donne so madame trois talaaq ene seul coup, ça talaaq-là li porté lors so madame et so madame li séparé avec li. Selon la version de Al-Baihaqui, Hazrat Abdullah Bin 'Oumar ‎(Radiyallahou anhou‎)‎ fine dire:

"اذا طلق الرجل امرأته ثلاثا قبل ان يدخل بها لم تحل له حتى تنكح زوجا غيره" (سنن البيهقى)

"Quand ene missié donne so madame trois talaaq avant ki li alle dans ménage avec li, ça madame-là pas vine halaal pou li tanque ki li pas marié avec ene l'autre missié."(Sounan Al-Baihaqui)

Position ça talaaq ki ene madame gagné avant ki so missié alle dans ménage avec li, li pli sensible ki ça talaaq ki ene madame gagné après avoir consomme nikah. Normalement quand ene madame gagne talaaq après avoir consomme nikah, li bizin observe so iddat avant li sorti complètement depi dans nikah so missié. Parceki iddat li applique pou ene madame ki so nikah fine fini consommé. Quant à ene madame ki so nikah pas fine consommé, li pena aukene iddat à observé. Alors acoze ça li vine en dehors nikah so missié à peine li gagne talaaq. Donc quand trois talaaq li porté lors ene madame ki so missié pas fine alle dans ménage avec li, malgré ki li sorti toute suite depi dans nikah sans observe iddat, alors ça li pou pli porté lors ene madame ki so nikah fine consommé parceki li ena pou observe iddat ki encore tini li dans nikah so missié dans certaine mesure. Ça montré ki d'après Hazrat Abdullah Bin 'Oumar ‎(Radiyallahou anhou‎)‎, trois talaaq ki fine donné ene seul coup, li compte trois même. Et surtout ça li applique pli bien pou ene madame ki so nikah fine fini consommé. D'après ene hadice ki trouve dans Sahih Boukhari et Sahih Mouslim, Hazrat Abdullah Bin 'Oumar ‎(Radiyallahou anhou‎)‎ ti pé donne le fatwa suivant:

"اما انت طلقت امرأتك مرة او مرتين فان رسول الله صلى الله عليه وسلم امرنى بهذا وان كنت طلقتها ثلاثا فقد حرمت عليك حتى تنكح زوجا غيرك وعصيت الله فيما امرك من طلاق امرأنك" (مسلم/البخارى)

"Si to fine donne to madame ene ou deux talaaq, alors (c'est dans ça cas-là ki) Rassouloullah ‎(Sallallaahou A'laihi Wasallam)‎‎‎‎ ti ordonne moi (pou retourne avec mo madame) mais si to fine donne li trois talaaq alors li vine haraam lors toi tanque li pas marié avec ene l'autre missié apart toi. Et (par cela) to fine désobéir Allah Ta'ala dans l'ordre ki li fine donne toi concernant la façon ki to bizin donne to madame talaaq." (Sahih Boukhari/Sahih Mouslim)

Fatwa Hazrat Abdullah Bin Amr ‎(Radiyallahou anhou‎)‎

"عن عطاء بن يسار قال جاء رجل يسأل عبد الله بن عمرو بن العاص عن رجل طلق امرأته ثلاثا قبل ان يمسها قال عطاء فقلت انما طلاق البكر واحدة فقال لى عبد الله بن عمرو انما انت قاص الواحدة تبينها والثلاث تحرمها حتى تنكح زوجا غيره" (مؤطا الامام مالك/ مصنف عبد الرزاق/ شرح معانى الآثار للطحاوى/ سنن البيهقى)

Traduction:

"'Ata Bin Yaçaar rapporté ki ene personne fine vine pou dimane Hazrat Abdullah Bin Amr Bin Al-Aas ‎‎(Radiyallahou anhou‎)‎‎ concernant ene personne ki fine donne so madame trois talaaq avant ki li touche li. 'Ata dire ki mo fine dire: Ene jeune fille so talaaq li compte ene seul. Alors Hazrat Abdullah Bin Amr ‎(Radiyallahou anhou‎)‎ fine dire moi: To necque ene orateur toi. Ene talaaq-là li sépare li (depi dans nikah so missié) et trois talaaq li faire madame-là vine haraam (pou so missié) tanque ki li pas marié avec ene l'autre missié apart li." (Mou'atta Imam Malik, Mouswannaf Abdurrazzaaq, Sharh Ma-anil Athaar, Sounan Al-Baihaqui)

Explication:

Pou ene talaaq porté lors ene madame, ça madame-là bizin dans nikah ça personne-là. Si ene dimoune donne talaaq ene madame ki pas dans so nikah, alors ça talaaq-là pas porté parceki talaaq li vine après nikah pareil couma aqeeqah vine après naissance ti bébé. Coumsa même si ene dimoune donne so madame talaaq pendant ki li dans iddat, alors ça talaaq-là pou compté. Donc pou talaaq compté, madame-là bizin soit dans nikah ou bien au moins dans iddat.

Ki veut dire iddat ?

Iddat c'est ene l'intervalle transitoire ki ene madame observé après ki so missié fine donne li talaaq avant li sorti depi dans nikah so missié. Iddat li applique pou ene madame ki so nikah fine fini consommé.

Position talaaq avant consomme nikah

Quant à ene madame ki so nikah pas fine consommé, li pena iddat à observé si so missié donne li talaaq. Li sorti toute suite depi dans nikah so missié à peine so missié fine donne li talaaq. Astere si so missié fine donne li trois talaaq ene seul coup, ena deux possibilité là-dans : soit li fine donne li talaaq par dire li "To ena to 3 talaaq" ou bien par dire li en trois fois "To ena talaaq, to ena talaaq, to ena talaaq". Dans le premier cas, ça madame-là li pou séparé avec so missié par trois talaaq et le fatwa de Hazrat Abdullah Bin Amr ‎(Radiyallahou anhou‎)‎ li concerne ça façon donne talaaq-là. Mais si so missié fine donne li trois talaaq par dire li en trois fois "To ena talaaq, to ena talaaq, to ena talaaq", dans ça cas-là ça madame-là sorti en dehors nikah so missié par ene seul talaaq. Ça deuxième talaaq et troisième-là li pas porté parceki madame-là pena aukene iddat à observé. C'est-à-dire après premier talaaq même li fine vine complètement en dehors nikah. Ça deuxième et troisième talaaq-là fine prononcé quand madame-là pas ti ena aukene lien avec so missié.

Hazrat Al-Hakam rapporté:

"ان عليا وابن مسعود وزيد بن ثابت قالوا اذا طلق البكر ثلاثا فجمعها لم تحل له حتى تنكح زوجا غيره فان فرقها بانت بالاولى ولم تكن الاخريان شيئا" (مصنف عبد الرزاق)

"(Hazrat) Ali ‎(Radiyallahou anhou‎)‎, (Hazrat Abdullah) Bin Mas'oud ‎(Radiyallahou anhou‎)‎ et (Hazrat) Zaid Bin Thabit ‎(Radiyallahou anhou‎)‎ fine dire: Quand ene jeune fille gagne trois talaaq et (so missié) li donne ça (trois talaaq-là) ensemble (c'est-à-dire li dire trois talaaq ene seul coup), alors ça madame-là li pas halaal pou li tanque ki li pas marié avec ene l'autre missié apart li. Mais si li donne li ça talaaq-là séparément (par dire li ki to ena talaaq, to ena talaaq, to ena talaaq), alors ça madame-là li séparé (de so missié) par premier (coup ki li dire so madame "to ena talaaq"). Et ça deux derniers (coup ki li fine dire to ena talaaq)là pas pou (compte) narien." (Mouswannaf Abdurrazzaaq)

C'est-à-dire quand premier coup li fine dire li "to ena talaaq", alors par ça même ene talaaq-là, ça madame-là fine vine en dehors nikah. Etant donné ki so nikah pencore consommé, li pena iddat à observé. Acoze ça quand li fine dire: "To ena talaaq" la deuxième fois et troisième fois, ça pas fine porté parceki ça madame-là ti totalement en dehors nikah so missié.

Si 3 talaaq ki fine donné en ene seul mot dans ene seul coup compte 3 même pou ene madame ki so nikah pencore consommé, alors ça pou applique pli bien pou ene madame ki so nikah fine fini consommé.

Fatwa Hazrat Abdullah Bin Abbaas ‎(Radiyallahou anhou‎)‎

عن مجاهد قال كنت عند ابن عباس فجاءه رجل فقال انه طلق امرأته ثلاثا قال فسكت حتى ظننت انه رادها اليه ثم قال ينطلق احدكم فيركب الحموقة ثم يقول يا ابن عباس يا ابن عباس وان الله قال: "ومن يتق الله يجعل له مخرجا" وانت لم تتق الله فلا اجد لك مخرجا عصيت ربك وبانت منك امرأتك وان الله قال يايها النبى اذا طلقتم النساء فطلقوهن لعدتهن" (ابو داؤد)

Traduction:

Mujahid rapporté : « Mo ti cote (Hazrat Abdullah) Bin Abbaas ‎(Radiyallahou anhou‎)‎. Alors ene dimoune fine vini et fine dire ki li fine donne so madame trois talaaq. Lors ça Hazrat Abdullah Bin Abbaas ‎(Radiyallahou anhou‎)‎ fine reste tranquille à tel point ki mo fine gagne l'impression li pou retourne li so madame (c'est-à-dire li pou ranne ene verdict ki permette so madame retourne avec li). Ensuite Hazrat Abdullah Bin Abbaas ‎(Radiyallahou anhou‎)‎ fine dire: "Ena parmi zotte ki alle commette l'imbécillité et après li plaigné O Ibn Abbaas! O Ibn Abbaas! Pourtant Allah fine dire: "Celui ki obéir Allah, li pou faire ene chemin sorti pou li." Mais toi, to pas fine obéir, alors mo pas trouve aukene chemin sorti pou toi. To fine désobéir to Rabb. (Allé) To madame fine séparé complètement avec toi." Allah fine dire: "O Nabi! Quand ou ena pou donne banne madames talaaq, alors donne zotte talaaq dans zotte iddat (période de propreté avant alle dans relation)." (Abou Dawoud)

Position hadice et explication:

C'est ene hadice sahih (authentique).

D’après ceki la majorité de banne zélèves de Hazrat Abdullah Bin Abbaas ‎(Radiyallahou anhou‎)‎ couma Mujahid, Saeed Bin Jubair, Ata, Malik Bin Al-Haarith, Amr Bin Deenaar fine rapporté, Hazrat Abdullah Bin Abbaas ‎(Radiyallahou anhou‎)‎ ti considère trois talaaq ki fine donné ene seul coup comme trois talaaq même ki empêche le couple vive ensemble. Et ça l’interdiction-là li resté tanque ki madame-là pas marié avec ene l'autre et gagne so séparation avec li avant li retourne avec so premier missié.

D'après ene hadice dans Abou Dawoud, Mouhammad Bin Iyaas rapporté:

"ان ابن عباس وابا هريرة وعبد الله بن عمرو بن العاص سئلوا عن البكر يطلقها زوجها ثلاثا فكلهم قال لا تحل حتى تنكح زوجا غيره" (ابو داؤد)

(Hazrat Abdullah) Bin Abbaas ‎‎(Radiyallahou anhou‎)‎‎, (Hazrat) Abou Hourairah ‎(Radiyallahou anhou‎)‎ et (Hazrat) Abdullah Bin Amr Al-Aas ‎(Radiyallahou anhou‎)‎ fine être interrogé a propos ene jeune fille (ene madame ki pencore consomme nikah) ki so missié fine donne li trois talaaq, alors chakene parmi zotte fine dire ki ça madame-là nepli reste halaal pou li tanque ki li pas marié avec ene l'autre missié. (Abou Dawoud)

Fatwa Hazrat Abou Hourairah ‎(Radiyallahou anhou‎)‎

عن معاوية بن ابى عياش الانصارى انه كان جالسا مع عبد الله بن الزبير وعاصم بن عمر قال فجاءهما محمد بن اياس بن بكير فقال ان رجلا من اهل البادية طلق امرأته ثلاثا قبل ان يدخل بها فما ذا تريان؟ فقال عبد الله بن الزبير ان هذا الامر ما بلغ لنا فيه قول فاذهب الى عبد الله بن عباس وابى هريرة فانى تركتهما عند عائشة فسألهما ثم أتنا فاخبرنا فذهب فسألهما فقال ابن عباس لابى هريرة افته يا ابا هريرة فقد جائتك معضلة فقال ابو هريرة الواحدة تبينها والثلاث تحرمها حتى تنكح زوجا غيره وقال ابن عباس مثل ذلك" (مؤطا الامام مالك)

Traduction:

Mou'awiyah Bin Abou Ayyaash Al-Ansaari rapporté ki li ti assizé acote Hazrat Abdullah Bin Az-Zubeir ‎‎(Radiyallahou anhou‎)‎‎ et Asim Bin 'Oumar ‎‎(Radiyallahou anhou‎)‎‎ quand Mouhammad Bin Iyaas Bin Boukair fine vini et fine dire: « Ene personne depi dans la campagne fine donne so madame 3 talaaq avant li alle dans ménage avec li. Ki zotte pensé (lors là)? » Hazrat Abdullah Bin Az-Zubeir ‎(Radiyallahou anhou‎)‎ fine repone: « C'est ene problème ki nou pas fine gagne aukene renseignement lors-là. Alle guette (Hazrat) Abdullah Bin Abbaas ‎‎(Radiyallahou anhou‎)‎‎ et (Hazrat) Abou Hourairah ‎‎(Radiyallahou anhou‎)‎‎. Mo fine quitte zotte cote (Hazrat Aisha) ‎‎(Radiyallahou anhou‎)‎‎ et dimane zotte et après ça vine faire nou conné.» Alors li fine allé et fine dimane zotte. (Hazrat Abdullah) Bin Abbaas ‎(Radiyallahou anhou‎)‎ fine adresse (Hazrat) Abou Hourairah ‎(Radiyallahou anhou‎)‎ et fine dire: "O Abou Hourairah! Repone li. Vraiment c'est ene problème compliqué ki fine vine cote toi". Alors (Hazrat) Abou Hourairah ‎(Radiyallahou anhou‎)‎ fine repone: « Ene talaaq li suffit pou sépare li c’est à dire madame-là (depi dans nikah so missié) et trois talaaq pou faire li vine haraam lors (so missié et li pou continué reste haraam) tanque ki li pas marié avec ene l'autre missié apart li? » Et Hazrat Abdullah Bin Abbaas ‎‎(Radiyallahou anhou‎)‎‎ aussi fine dire pareille (couma Hazrat Abou Hourairah ‎(Radiyallahou anhou‎)‎). (Mou'atta Imam Malik)

Explication:

D'après ça hadice-là li paraite ki Hazrat Abou Hourairah ‎(Radiyallahou anhou‎)‎ et Hazrat Abdullah Bin Abbaas ‎(Radiyallahou anhou‎)‎ ti d'accord lors le fait ki trois talaaq li sépare ene madame de so missié complètement malgré ki ça madame-là so nikah pencore consommé et ki ça madame-là pas gagne droit retourne avec so missié tanque li pas faire nikah avec ene l'autre missié. Quand zotte ti donne ça fatwa-là, zotte ti cote Hazrat Aisha ‎(Radiyallahou anhou‎)‎. Li paraite ki pas fine ena aukene objection de la part Hazrat Aisha ‎(Radiyallahou anhou‎)‎ lors ceki zotte fine déclaré. Ça veut dire ki li aussi fine d'accord avec ça. Et l'autre coté Hazrat Abdullah Bin Az-Zubeir ‎(Radiyallahou anhou‎)‎ et Asim Bin 'Oumar ‎(Radiyallahou anhou‎)‎ aussi fine bizin au courant de ça parceki c'est zotte même ki ti envoye Mouhammad Bin Iyaas Bin Boukair pou dimane ça renseignement-là avec Hazrat Abdullah Bin Abbaas ‎(Radiyallahou anhou‎)‎ et Hazrat Abou Hourairah ‎(Radiyallahou anhou‎)‎. Donc apparemment zotte aussi zotte fine bizin d'accord avec le fatwa. Ça amène nou pou comprend ki ça fatwa-là fine bénéficié l'approbation de 5 Sahaba-e-Kiraam.

D'après ene l'autre version de ça hadice-là ki trouve dans Mou'atta Imam Malik même, quand Hazrat Abou Hourairah ‎(Radiyallahou anhou‎)‎ et Hazrat Abdullah Bin Abbaas ‎(Radiyallahou anhou‎)‎ fine faire li conné ki so madame fine vine haraam lors li, la personne fine dire:

"فانما كان طلاقى اياها واحدة"

"Mo ti ena droit à ene seul talaaq."

C'est-à-dire mo fine prononce 3 talaaq mais en réalité mo ti supposé donne li ene seul talaaq. Par cela la personne fine envi attire l’attention Hazrat Abou Hourairah ‎(Radiyallahou anhou‎)‎ ki d’après principe li bizin compte ene seul talaaq parceki li fine donne talaaq conte le principe et conte ceki li ti bizin faire. Lors ça Hazrat Abdullah Bin Abbaas ‎(Radiyallahou anhou‎)‎ fine dire:

"ارسلت من يدك ما كان لك من فضل"

"To fine largue trois talaaq en plis ki to ti ena depi dans to la main."

C'est-à-dire to ti supposé donne li ene seul mais quand to fine donne li le reste-là aussi, alors ça aussi to fine perdi li.

A la lumière de ça hadice-là, li paraite ki la personne ti donne so madame trois talaaq en ene seul mot, c'est-à-dire li ti dire so madame "To ena trois talaaq". Acoze ça malgré ki li pas ti encore consomme nikah, tous les 3 talaaq fine prend l'effet. Par contre si li ti donne li 3 talaaq par répète li trois fois, c'est-à-dire par dire li "To ena talaaq, To ena talaaq, To ena talaaq", alors dans ça cas-là c'est necque le premier talaaq ki ti pou compté. Quant à deuxième et troisième talaaq, pas ti pou compté parceki madame-là ti pou fini sorti complètement en dehors nikah par premier talaaq même. Et pou ene madame ki so nikah fine fini consommé, dans tous les deux cas, tous les trois talaaq pou compté.

D’après ça hadice-là nou trouvé ki ça prétexte ki dimoune habitué faire ki mo fine donne trois talaaq mais mo ti ena l’intention ene seul, c’est ene prétexte inutile ki pas capave servi pou empêche ça trois talaaq-là compté.

Fatwa Hazrat Imraan Bin Houçaine ‎(Radiyallahou anhou‎)‎

ان رجلا اتى عمران بن حصين رضى الله عنه وهو فى المسجد فقال رجل طلق امرأته ثلاثا وهو فى مجلس قال اثم بربه وحرمت عليه امرأته ..." (سنن البيهقى)

Traduction:

Ene personne fine vine cote Hazrat Imraan Bin Houçaine ‎(Radiyallahou anhou‎)‎ quand li ti dans masjid et fine dire: Ene dimoune fine donne so madame trois talaaq dans ene seul place? Hazrat Imraan Bin Houçaine ‎(Radiyallahou anhou‎)‎ fine repone: "Ça dimoune-là fine désobéir so Rabb et so madame fine vine haraam lors li …" (Al-Baihaqui)

Explication:

Ça hadice-là montré ki li pas bon donne trois talaaq dans ene seul coup. C'est ene péché pou donne talaaq dans ça façon-là. Mais si kikene fine donne li dans ça façon-là, li compte trois talaaq même.

Fatwa Hazrat Al Mougheerah Bin Shou'bah ‎(Radiyallahou anhou‎)‎

عن قيس بن ابى حازم قال سأل رجل المغيرة بن شعبة عن رجل طلق امرأته مائة قال ثلاث تحرم وسبع وتسعون فضل (البيهقى/ مصنف ابن ابى شيبة)

Traduction:

Qais Bin Abou Haazim rapporté ki ene personne fine dimane (Hazrat) Al Mougheerah Bin Shou'bah ‎(Radiyallahou anhou‎)‎ apropos ene dimoune ki fine donne so madame cent talaaq. Hazrat Al Mougheerah Bin Shou'bah ‎(Radiyallahou anhou‎)‎ fine repone:" Trois talaaq li ranne (madame-là) haraam (lors so missié) et (le reste) 97 talaaq li enplis." (Al-Baihaqui/Mouswannaf Ibn Abou Shaibah)

Explication:

Ziska là nou fine gagne témoignage de la part de banne Sahaba-e-Kiraam couma Hazrat 'Oumar ‎(Radiyallahou anhou‎)‎, Hazrat Usmaan ‎(Radiyallahou anhou‎)‎, Hazrat Ali ‎(Radiyallahou anhou‎)‎ , Hazrat Abdullah Bin Mas'oud ‎(Radiyallahou anhou‎)‎, Hazrat Abou Hourairah ‎(Radiyallahou anhou‎)‎, Hazrat Abdullah Bin Abbaas ‎(Radiyallahou anhou‎)‎, Hazrat Abdullah Bin 'Oumar ‎(Radiyallahou anhou‎)‎, Hazrat Abdullah Bin Amr ‎(Radiyallahou anhou‎)‎, Hazrat Abdullah Bin Az-Zubeir ‎(Radiyallahou anhou‎)‎, Hazrat Aisha ‎(Radiyallahou anhou‎)‎, Hazrat Asim Bin 'Oumar ‎(Radiyallahou anhou‎)‎, Hazrat Imraan Bin Houçaine ‎(Radiyallahou anhou‎)‎, et Hazrat Al Mougheerah Bin Shou'bah ‎(Radiyallahou anhou‎)‎ :

a) Ki trois talaaq ki donné dans ene seul coup li compte 3 même.

b) Ça madame ki fine gagne ça talaaq-là li sorti complètement en dehors nikah so missié.

c) Li pas gagne droit retourne avec so missié tanque li pas faire nikah avec ene l'autre.

De l'autre coté nou pas trouve aukene trace dans ene façon authentique et catégorique de kit Sahabi ki fine dire le contraire. Donc ça aussi li ene genre de ijma ki banne 'Oulama conne li par الاجماع السكوتى (Al Ijma-as-Soukouti). C'est-à-dire ene consensus ki basé lors verdict de la part de certains sans être contesté par les autres. Ça prouvé ki dans l'époque Rassouloullah ‎(Sallallaahou A'laihi Wasallam)‎‎‎‎, trois talaaq ki ti pé donné dans ene seul coup ti pé compte trois talaaq même. Coumsa même dans l'époque banne Sahaba-e-Kiraam aussi ene talaaq ki ti donné dans ça façon-là ti pé compte trois talaaq même. Donc banne ki dire trois talaaq li compte trois talaaq, zotte ena parfaitement raison.

Eski trois talaaq dans l'époque Nabi ‎(Sallallaahou A'laihi Wasallam)‎‎‎‎ ti pé compte ene seul talaaq?

عن ابن عباس قال كان الطلاق على عهد رسول الله صلى الله عليه وسلم وابى بكر وسنتين من خلافة عمر طلاق الثلاث واحدة فقال عمر بن الخطاب ان الناس قد استعجلوا فى امر قد كانت لهم فيه اناة فلو امضينا عليهم فامضاه عليهم (مسلم)

Traduction:

(Hazrat Abdullah) Bin Abbaas ‎‎(Radiyallahou anhou‎)‎‎ rapporté ki dans l'époque Rassouloullah ‎(Sallallaahou A'laihi Wasallam)‎‎‎‎, dans l'époque (Hazrat) Abou Bakr ‎‎(Radiyallahou anhou‎)‎‎ et ziska deux ans pendant règne de (Hazrat) 'Oumar ‎‎(Radiyallahou anhou‎)‎‎, trois talaaq ti compte ene seul talaaq. Après ça Hazrat 'Oumar ‎(Radiyallahou anhou‎)‎ fine dire: "Banne dimoune fine (trop) pressé dans ene kitchose ki zotte ti ena (tout) le temps. Ti à bon si nou applique ça (trois talaaq) lors zotte." Donc li fine applique li lors zotte. (Sahih Mouslim)

Explication:

D'après ça hadice-là, dans l'époque Rassouloullah ‎(Sallallaahou A'laihi Wasallam)‎‎‎‎ trois talaaq ki ti pé donné ene seul coup, ti compte ene seul talaaq.

Pourtant nou ena ene quantité hadice ki montré ki trois talaaq ti pé compte trois talaaq même. En plus de ça nou ena fatwa de ene quantité Sahaba-e-Kiraam aussi ki montré ki trois talaaq li compte trois même. Et surtout Hazrat Abdullah Bin Abbaas ‎(Radiyallahou anhou‎)‎ li même personnellement ti pé donne fatwa ki 3 talaaq li compte trois talaaq même. Pourtant c'est li même ki pé rapporte ça hadice-là ki ça ti compte ene seul auparavant. Ki explication capave donné pou ene dilemme pareil.

Eski fine ena amendement? Ça li impossible parceki amendement pas capave ena après Rassouloullah ‎(Sallallaahou A'laihi Wasallam)‎‎‎‎ et ni kikene ena droit faire li aussi. Donc nou ena deux options:

Soit nou accepté banne hadice, banne fatwa et consensus de banne Sahaba-e-Kiraam lors le fait ki trois talaaq li compte trois talaaq même et nou néglige le hadice ki rapporté par Hazrat Abdullah Bin Abbaas ‎(Radiyallahou anhou‎)‎. Ou bien nou néglige tous banne hadice, tous banne fatwa de Sahaba-e-Kiraam et zotte consensus zisse pou prend ça ene seul hadice-là.

D'après le principe établi, li pas correct du tout ki nou rejette tous banne hadice et banne fatwa et ijma de banne Sahaba-e-Kiraam acoze ene seul hadice. Parceki ijma li ene preuve bien bien solide ki Rassouloullah ‎(Sallallaahou A'laihi Wasallam)‎‎‎‎ même fine donne garantie et l'assurance ki ça pas capave existé lors ene pratique ou ene principe ki fausse ou bien ki pas fondé. Acoze ça Nabi ‎(Sallallaahou A'laihi Wasallam)‎‎‎‎ fine invite l’oummah pou suive toujours "As-Sawaad Al-A’zam" (la pli grande majorité) et fine lance ene avertissement très sévère pou banne ki isole zotte de ça. Quant à hadice ki Hazrat Abdullah Bin Abbaas ‎(Radiyallahou anhou‎)‎ fine rapporté, c'est ene خبر واحد.

خبر واحد c'est ene hadice ki paraite bien étrange et bien isolé parceki li rapporté par seulement ene deux rawi dans l'époque de Sahaba-e-Kiraam et Tabeines. Ene hadice pareil li perdi so la force vis-à-vis banne hadice ki fine rapporté par plusieurs Sahaba-e-Kiraam et surtout quand le sens de ça banne hadice-là li bénéficié l'appuye de l'ijma de Sahaba-e-Kiraam. C'est banne raisons pou lesquelles banne 'Oulama pas fine permette zotte considère le hadice de Hazrat Abdullah Bin Abbaas ‎(Radiyallahou anhou‎)‎. Parceki accepté ça ene seul hadice-là li nécessite:

Rejette tous banne hadice de Rassouloullah ‎(Sallallaahou A'laihi Wasallam)‎‎‎‎ ki dire ki trois talaaq compte trois talaaq même,
Rejette ijma de banne Sahaba-e-Kiraam,
Rejette banne fatwa de banne Sahaba-e-Kiraam.

Si nou suive ene procédure pareil, finalement li pou mette en doute l'intégrité de banne Sahaba-e-Kiraam et par extension li démolir l'authenticité de l'Islam ki basé lors l'intégrité de banne Sahaba-e-Kiraam. Parceki ça pou amène nou pou comprend ki na-ouzoubillah banne Sahaba-e-Kiraam fine alle l’encontre de l’enseignement de Nabi ‎(Sallallaahou A'laihi Wasallam)‎‎‎‎ couma li pou donne l’impression ki ça Deen-là dans bien des cas pas fine être pratiqué depi so commencement même. Donc ça li deconnecté pratique et connaissance de entier oummah ki li fine gagné de Nabi ‎(Sallallaahou A'laihi Wasallam)‎‎‎‎ à travers banne Sahaba-e-Kiraam.

Alors banne 'Oulama fine conclure ki trois talaaq ki donné dans ene seul coup, li compte trois talaaq même depi tout le temps. Jamais ti ena la question 3 talaaq compte ene seul.

Et zotte fine donne plusieurs explications pou le hadice de Hazrat Abdullah Bin Abbaas ‎(Radiyallahou anhou‎)‎ ki pretanne le contraire. Là-dans ena deux explications ki paraite pli plausible:

Selon la première explication ki paraite pli plausible dans ça deux-là, le hadice de Hazrat Abdullah Bin Abbaas ‎(Radiyallahou anhou‎)‎ ti applique lors ene certaine façon particulier pou donne talaaq. C'est-à-dire dans l'époque Rassouloullah ‎(Sallallaahou A'laihi Wasallam)‎‎‎‎, quand ene personne ti pé donne talaaq par répète le mot talaaq trois fois, alors li ti capave pé servi ça trois fois-là avec l'intention pou donne 3 talaaq même ou bien li ti pé répète li trois fois zisse pou mette l'emphase mais avec l’intention pou donne ene seul talaaq. Pas pou donne 3 talaaq.

Alors acoze l'honnêteté banne Sahaba-e-Kiraam, Rassouloullah ‎(Sallallaahou A'laihi Wasallam)‎‎‎‎ ti pé accepté zotte quand zotte dire ki zotte ti ena l'intention ene seul talaaq. C'est dans ça façon donne 3 talaaq ki dans certaine cas, Rassouloullah ‎(Sallallaahou A'laihi Wasallam)‎‎‎‎ ti pé compte li ene seul talaaq. Mais Hazrat 'Oumar ‎(Radiyallahou anhou‎)‎ fine constaté ki mentalité dimoune pé changé et nepli ena l'honnêteté couma longtemps et zotte capave fine donne li avec l'intention 3 talaaq mais zotte vine dire ki zotte fine répète li zisse pou mette l'emphase. Alors après consultation avec banne Sahaba-e-Kiraam, li fine passe la loi ki la question de talaaq pou dépanne lors ceki ene dimoune fine déclaré sans guette so l'intention, c'est-à-dire si li fine répète li trois fois, ça pou compte 3 talaaq. Pas pou accepté ki li ti donne ça avec l'intention pou mette l'emphase. Ça explication-là ti approuvé par ene hadice ki trouve dans Mouswannaf Abdurrazzaaq selon lequel Hazrat 'Oumar ‎(Radiyallahou anhou‎)‎ ti adresse banne Sahaba-e-Kiraam en ce terme:

... قد اكثرتم فى هذا الطلاق فمن قال شيئا فهو على ما يتكلم به (مصنف عبد الرزاق)

"… Zotte fine trop exagéré dans ça zaffaire talaaq-là. Astere n'importe ki sanla ki li dire, ça pou être interprété d'après ceki li fine déclaré." (Mouswannaf Abdurrazzaaq)

C'est-à-dire le verdict pou basé d'après ceki li fine déclaré sans considère l'intention ki li fine faire. Si li fine prononce le mot talaaq trois fois, ça pou compte trois fois même. Pas pou accepté ki li ti dire ça trois fois-là zisse pou mette l'emphase lors ene seul talaaq. Peut être c'est ça même décision de Hazrat 'Oumar ‎(Radiyallahou anhou‎)‎ ki fine capave être exprimé parنسخ (amendement) mais en réalité li pas ene amendement. C'est necque ene changement de verdict acoze changement dans condition et dans mentalité dimoune. Le verdict de Nabi ‎(Sallallaahou A'laihi Wasallam)‎‎‎‎ ki 3 talaaq ti pé compte ene seul talaaq, ti basé lors ene certaine condition. Quand ça condition-là fine changé dans l'époque Hazrat 'Oumar ‎(Radiyallahou anhou‎)‎ avec changement ki fine ena dans mentalité dimoune, alors automatiquement verdict aussi fine bizin changé.

Deuxièmement:

Dans l'époque Nabi ‎(Sallallaahou A'laihi Wasallam)‎‎‎‎, banne Sahaba-e-Kiraam ti ena l'habitude donne talaaq avec la formule البتة (Al-Battah). Ça formule-là ti signifié trois talaaq couma li ti ena la possibilité signifié ene seul talaaq aussi. L'époque Nabi ‎(Sallallaahou A'laihi Wasallam)‎‎‎‎ ti ene l'époque exemplaire. Ene l'époque cote ti ena taqwa, la piété et l'honnêteté à ene stage bien avancé ki jamais pou ena li.

Dans ça l'époque-là quand kikene ti pé servi la formule "Al-Battah" et li vine dire ki li ti dire ça avec l'intention ene seul talaaq, Rassouloullah ‎(Sallallaahou A'laihi Wasallam)‎‎‎‎ ti pé accepté li. Par exemple Hazrat Roukanah ti donne so madame talaaq avec la formule "Al-Battah". Mais li fine faire serment lors requête Nabi ‎(Sallallaahou A'laihi Wasallam)‎‎‎‎ ki li ti ena l'intention ene seul talaaq ki Rassouloullah ‎(Sallallaahou A'laihi Wasallam)‎‎‎‎ fine accepté. Donc en réalité c'est la formule "Al-Battah" ki ti pé compte ene seul talaaq dans certaine circonstance dans l'époque Rassouloullah ‎(Sallallaahou A'laihi Wasallam)‎‎‎‎ ki Nabi ‎(Sallallaahou A'laihi Wasallam)‎‎‎‎ ti pé accepté li si kikene ti donne li avec ça l’intention-là.

Li paraite ki ça hadice-là fine rapporté de par so sens. C'est-à-dire kikene fine comprend trois talaaq par la formule Al-Battah et conséquemment li fine rapporte li couma li fine comprend. C'est-à-dire au lieu li dire ki Al-Battah ti pé considéré couma ene seul talaaq, li fine rapporté ki trois talaaq ti pé considéré couma ene seul talaaq.

Mais dans l'époque Hazrat 'Oumar ‎(Radiyallahou anhou‎)‎, mentalité dimoune fine commence détérioré. L'honnêteté fine commence déprécié. Hazrat 'Oumar ‎(Radiyallahou anhou‎)‎ fine remarqué ki ça fine déprécié à tel point ki li difficile faire dimoune confiance dans ceki li dire. Zotte pas pou sincère et honnête dans exprime zotte l'intention. Li très probable ki zotte pou servi la formule "Al-Battah" avec l'intention pou donne 3 talaaq mais après ça zotte pou dire ki zotte ti ena l'intention ene seul talaaq. Donc Hazrat 'Oumar ‎(Radiyallahou anhou‎)‎ fine passe la loi en présence tous banne Sahaba-e-Kiraam ki ene talaaq ki pou donné avec la formule "Al-Battah" pou être considéré comme 3 talaaq.

Prise de position de Hazrat 'Oumar ‎(Radiyallahou anhou‎)‎

Ça prise de position-là ti en présence banne Sahaba-e-Kiraam. Si ça décision-là ti contraire à kit principe dans Shariah ou bien li ti en opposition avec verdict de Rassouloullah ‎(Sallallaahou A'laihi Wasallam)‎‎‎‎, jamais nou ti pou trouve ene Sahabi aussi d'accord avec ça. Mais quand nou trouvé ki tous banne Sahaba-e-Kiraam fine d'accord et fine faire ijma lors ça sujet-là, ça montré ki ça décision-là li ene décision correct ki compatible et encadré avec le sounnah de Nabi ‎(Sallallaahou A'laihi Wasallam)‎‎‎‎. Li pas ene nouveauté dans Deen.

Acoze ça, pou le célèbre Mouhaddice (savant de hadice) Allaamah Bin Hajar Al-Asqalaani, le verdict ki 3 talaaq li compte 3 talaaq même li basé lors ijma ki fine établi dans l'époque Hazrat 'Oumar ‎(Radiyallahou anhou‎)‎. Et l'opposition à ça verdict-là li représente le rejet de ijma de banne Sahaba-e-Kiraam.

Banne Sahaba-e-Kiraam fine comprend Deen pli bien ki n'importe ki sanla. Zotte fine comprend la pratique et le verdict de Nabi ‎(Sallallaahou A'laihi Wasallam)‎‎‎‎ et so porté pli bien ki n'importe ki sanla. Rejette ceki banne Sahaba-e-Kiraam fine décidé avec l'unanimité représente rejette la vérité et adopté la fausseté. C’est ene façon montré conne Deen pli bien ki banne Sahaba-e-Kiraam. C’est ene façon montré conne prend décision pli bien ki Hazrat 'Oumar ‎(Radiyallahou anhou‎)‎. Pena aukene prétention pli dans l’égarement et dans noireté ki ene prétention pareil.

Récapitulation:

Trois talaaq ki donné en ene seul coup ti compte trois talaaq même depi tout le temps. Dans l'époque Nabi ‎(Sallallaahou A'laihi Wasallam)‎‎‎‎ aussi li ti compte trois talaaq même.
Dans l'époque Nabi ‎(Sallallaahou A'laihi Wasallam)‎‎‎‎ quand ene dimoune ti pé donne so madame talaaq par répète le mot talaaq trois fois avec l'intention trois talaaq, ça ti pé compte 3 talaaq même.
Dans l'époque Nabi ‎(Sallallaahou A'laihi Wasallam)‎‎‎‎ quand ene personne ti pé donne so madame talaaq par répète le mot talaaq trois fois zisse pou mette l'emphase mais avec l'intention ene seul talaaq, alors acoze zotte l'honnêteté, Nabi ‎(Sallallaahou A'laihi Wasallam)‎‎‎‎ ti pé croire zotte dans ceki zotte ti pé dire et ti pé compte li ene seul talaaq.
Coumsa même dans l'époque Nabi ‎(Sallallaahou A'laihi Wasallam)‎‎‎‎ quand ene dimoune ti pé donne so madame talaaq avec la formule "Al Battah" avec l'intention pou donne trois talaaq, ça ti compte trois talaaq même. Par contre si kikene servi ça formule-là pou donne ene seul talaaq, alors dans ça cas-là ti pé compte li ene seul talaaq lors confiance ça dimoune-là.
Mais dans l'époque Hazrat 'Oumar ‎(Radiyallahou anhou‎)‎, mentalité dimoune fine commence changé. Hazrat 'Oumar ‎(Radiyallahou anhou‎)‎ fine constaté ki presque tout dimoune même pé répète le mot talaaq trois fois avec l'intention pou donne trois talaaq même. Coumsa même li fine remarqué ki presque tout dimoune fine commence servi la formule "Al Bataah" avec l'intention pou donne trois talaaq. Acoze changement dans mentalité dimoune et manque de l'honnêteté et changement dans l’habitude en général, li fine vine de plus en plus difficile pou faire dimoune confiance et pou différencié entre ceki pé cause vrai et entre ceki pé dire quelque chose de contre vérité. Et pas ti capave aussi mette ene la loi séparé pou ene ti minorité et assuré en même temps ki ça pas mal servi par la grande majorité. Acoze ça après consultation avec banne Sahaba-e-Kiraam, Hazrat 'Oumar ‎(Radiyallahou anhou‎)‎ fine passe la loi ki si kikene donne talaaq avec la formule "Al Bataah" ou bien par mentionne le mot talaaq trois fois, alors ça pou compte trois talaaq même. Dans ça cas-là, pas pou considère dimoune-là so l'intention.
Si banne Sahaba-e-Kiraam fine prend ene décision pareil, c'est acoze ça condition ki ti prévaloir dans zotte l'époque. Zotte ti confiant ki si ça même condition et ça même mentalité-là ti prévaloir dans l'époque Rassouloullah ‎(Sallallaahou A'laihi Wasallam)‎‎‎‎, alors li (c.à.d Rassouloullah ‎(Sallallaahou A'laihi Wasallam)‎‎‎‎) aussi ti pou prend même décision. La décision ki zotte fine prend et le critère ki zotte fine base zotte décision lors là, li tout à fait "haqq" parceki zotte fine arrive à ça point-là par l'unanimité et ijma'. L'unanimité et ijma' de Sahaba-e-Kiraam pas capave établi lors fausseté et l'égarement d'après le dire même de Rassouloullah ‎(Sallallaahou A'laihi Wasallam)‎‎‎‎. Donc decision ki banne Sahaba-e-Kiraam fine prend par l’unanimité li lors haqq parceki Nabi ‎(Sallallaahou A'laihi Wasallam)‎‎‎‎ même fine dire ki Sahaba-e-Kiraam pas capave unanime lors ene kitchose ki pas haqq.
Donc trois talaaq ki donné par servi le nombre "trois" ou par répète le mot talaaq trois fois, li compte trois talaaq même d'après Qour'aan, hadice et ijma' de banne Sahaba-e-Kiraam et banne 'Oulama de tous l'époque en général et aussi d’après les quatre célèbre Aimmah.
Dans Qour'aan ou bien dans hadice ou soit d'après banne fatwa banne Sahaba-e-Kiraam, pena aukene part quelque chose d’authentique et de concrète ki montré quand ene dimoune donne 3 talaaq en ene seul coup par mentionne le nombre 3 avec l'intention de 3 talaaq, ça li compte ene seul talaaq. Ça façon donne talaaq-là de tout le temps ti considère trois talaaq même.
Continué vive ensemble après ki fine fini donne tous les trois talaaq quand même dans ene seul coup, li ene façon pou vive dans zina. Et donne ene fatwa ki autorise vive après trois talaaq, li représente donne patente pou vive dans zina.

Préparé par M.R.Meerun

Divorce