Salaat-ut-Tahajjud

عن ابى امامة رضى الله عنه عن رسول الله صلى الله عليه وسلم قال: "عليكم بقيام الليل فانه دأب الصالحين قبلكم وقربة الى ربكم ومكفرة للسيئات ومنهاة عن الاثم" (الترمذى)

Traduction :

Hazrat Abou Umamah ‎(Radiyallahou anhou‎)‎ rapporté ki Rassouloullah ‎(Sallallaahou A'laihi Wasallam)‎‎‎‎ fine dire : « Prend l’habitude faire namaz dans la nuit parceki ça li ene principe de banne personnage pieux ki fine passé avant zotte. C’est ene moyen de rapprochement avec ou Rabb, ene moyen pou efface banne péché et ene moyen de protection conte péché. (Tirmizi)

Position hadice :

Dans so sanad ena ene rawi nommé عبد الله بن صالح ki selon banne ‘Oulama, li ene rawi مختلف فيه (controversé). C’est ene rawi assez fort et passable d’après Ibn-ul-Qattaan. Al-Hakim fine qualifié ça hadice-là de ene hadice saheeh (authentique) ki satisfaire les critères de Imam Boukhari. Donc ça hadice-là au moins li bizin ene hadice hassan.

Explication :

D’après ça hadice-là li paraite ki namaz tahajjud li ene namaz obligatoire parceki Nabi ‎(Sallallaahou A'laihi Wasallam)‎‎‎‎ fine servi la formule عليكم ki normalement servi pou impose ene kitchose. Malgré ça banne ‘Oulama pas fine prend li dans ça façon-là et pas fine qualifié li de obligatoire parceki namaz tahajjud fine traverse par plusieurs étapes. C'est-à-dire dans commencement li ti obligatoire. Ça fine continué ziska ene banané. Finalement ça fine amendé et fine vine ene namaz supplémentaire. Ça li prouvé par ene hadice ki trouve dans Sahih Mouslim et ki rapporté par Hazrat Aisha ‎(Radiyallahou anhou‎)‎.

Hadice Hazrat Aisha‎ (Radiyallahou anhou‎)‎

Hazrat Aisha ‎(Radiyallahou anhou‎)‎ dire :

... ان الله عز وجل افترض قيام الليل فى اول هذه السورة فقام نبى صلى الله عليه وسلم واصحابه حولا وامسك الله خاتمتها اثنى عشر شهرا فى السماء حتى انزل الله فى آخر هذه السورة التخفيف فصار قيام الليل تطوعا بعد فريضته ..." (مسلم)

 « … Allah Azza Wa Jalla ti faire namaz dans la nuit obligatoire dans commencement ça sourah-là (sourah Al-Mouzzammil). Alors Nabi ‎(Sallallaahou A'laihi Wasallam)‎‎‎‎ et so banne Sahabah (compagnons) fine pratique ça pendant ene banané. Allah Ta’ala fine retenir (la révélation de) la partie finale (de sourah Al-Mouzzammil) dans le ciel pendant 12 mois ziska ki li fine révèle concession dans la fin ça sourah-là. Finalement namaz dans la nuit fine vine ene namaz volontaire après ki li ti obligatoire… »  (Sahih Mouslim)

Selon ene hadice ki trouve dans Sahih Boukhari et ki rapporté par Hazrat Hafsah ‎(Radiyallahou anhou‎)‎, ene fois Rassouloullah ‎(Sallallaahou A'laihi Wasallam)‎‎‎‎ ti dire à l’égard de Hazrat Abdullah Bin ‘Oumar ‎(Radiyallahou anhou‎)‎ :

"نعم الرجل عبد الله لو كان يصلى من الليل ..."

 « Abdullah li ene très bon dimoune. Ti à bon si li ti faire namaz dans la nuit… »

Dans ça hadice-là aussi Nabi ‎(Sallallaahou A'laihi Wasallam)‎‎‎‎ fine exprime so vœux et so désir ki Hazrat Abdullah Bin ‘Oumar ‎(Radiyallahou anhou‎)‎ faire namaz dans la nuit. Ça montré ki namaz pendant la nuit li ene namaz volontaire et supplémentaire. Li pas obligatoire. Sinon Nabi ‎(Sallallaahou A'laihi Wasallam)‎‎‎‎ ti pou mette impé plis l’emphase lors-là. Coumsa même d’après ene hadice ki trouve dans Sahih Boukhari, Rassouloullah ‎(Sallallaahou A'laihi Wasallam)‎‎‎‎ fine vine cote Hazrat Ali ‎(Radiyallahou anhou‎)‎ et Hazrat Fatimah ‎(Radiyallahou anhou‎)‎ dans la nuit et fine trouve zotte pé dormi. Alors li fine encourage zotte pou faire namaz dans la nuit mais li pas fine impose ça lors zotte. Si ça namaz-là ti obligatoire, Nabi ‎(Sallallaahou A'laihi Wasallam)‎‎‎‎ pas ti pou laisse zotte dormi sans faire namaz.

Ena banne ‘Oulama ki dire ki namaz tahajjud li obligatoire. Mais en réalité c’est namaz witr ki zotte appelle li tahajjud ou bien Salaat-ul-Lail. C’est dans ça sens-là ki zotte dire tahajjud li obligatoire. Et ça li justifiable. Sinon si nou prend tahajjud dans le sens banne namaz nafil ki ene dimoune li faire dans la nuit, alors en li même li pas obligatoire.

Salaat-ul-Lail

عن ابى هريرة رضى الله عنه قال قال رسول الله صلى الله عليه وسلم: "... وافضل الصلاة بعد الفريضة صلاة الليل" (مسلم/ ابو داؤد)

Traduction :

Hazrat Abou Hourairah ‎(Radiyallahou anhou‎)‎ rapporté ki Rassouloullah ‎(Sallallaahou A'laihi Wasallam)‎‎‎‎ fine dire : « … et meilleur namaz après namaz faraz c’est namaz pendant la nuit. » (Mouslim/Abou Dawoud)

Explication :

Ça signifié ki namaz faraz ena supériorité lors namaz pendant la nuit. Coumsa même ça montré ki namaz dans la nuit ena supériorité lors banne namaz sounnat mou’akkadah et namaz witr. Mais la grande majorité de banne ‘Oulama fine interprète صلاة الليل par صلاة الوتر. Donc dans ce sens li tout à fait normal pou dire ki salaat-ut-tahajjud li meilleur ki banne sounnat mou’akkadah. D’après ça explication-la, pena narien dans ça hadice-là ki dire ki namaz tahajjud li meilleur ki banne sounnat mou’akkadah. Mais si nou prend li dans le sens de banne namaz nafil ki ene dimoune faire dans la nuit, alors sounnat mou’akkadah pou ena priorité.

Ena ene deuxième interprétation. Selon ça interprétation-là, namaz faraz li inclure banne namaz sounnat mou’akkadah ki ena avant et après namaz faraz parceki banne sounnat c’est banne complémentaire pou namaz faraz. Normalement quand mentionne ene kitchose, ça li comprend so complémentaire aussi. Donc d’après ça interprétation-là, ça hadice-là signifié ki namaz pli valeureux après namaz faraz et so complémentaire ki comprend banne sounnat mou’akkadah et witr, c’est namaz dans la nuit.

Ça aussi li possible ki namaz dans la nuit li supérieure à banne namaz sounnat mou’akkadah parceki ene dimoune li bizin faire pli boucou zeffort pou levé dans la nuit. Par ça rapport-là définitivement ça namaz-là li ena ene degré de supériorité lors banne namaz sounnat mou’akkadah. Mais en général d’après shariah banne sounnat mou’akkadah li pli important ki namaz tahajjud parceki sounnat mou’akkadah li ene complémentaire de banne namaz faraz. Li couma dire ene dimoune ki pé garde roza dans plein l’été. Normalement roza dans ene plein l’été li ene roza bien difficile. Acoze ça li mérite ene certaine valeur mais pas acoze ça ki li vine pli valeureux ki ene roza faraz ki fine observé dans l’hiver zisse pendant quelque heures et ça aussi avec facilité. Par exemple ene zeleve ki passe bien fort dans ene certaine sujet, li capave faible divant ene l’autre ki fine passe faible dans ça sujet-là mais seulement en général so résultat li pli favorable ki résultat ça premier-là.

Hadice Hazrat Iyaas Bin Mou’awiyah ‎(Radiyallahou anhou‎)‎

عن اياس بن معاوية المزنى رضى الله عنه ان رسول الله صلى الله عليه وسلم قال: لا بد من صلاة بليل ولو حلب شاة وما كان بعد صلاة العشاء فهو من الليل (الطبرانى)

Traduction:

Hazrat Iyaas Bin Mou’awiyah Al-Muzni ‎(Radiyallahou anhou‎)‎ fine rapporté ki Rassouloullah ‎(Sallallaahou A'laihi Wasallam)‎‎‎‎ fine dire:

« Bizin ena ene tigite namaz dans la nuit quand même pou ene quantité le temps ki permette tire dilait avec ene cabri. Et tout ceki vine après namaz Esha li compte (dans faire namaz) pendant la nuit. » (Tabrani)

Position hadice :

Tous banne narrateurs dans sanad ça hadice-là zotte banne narrateurs authentiques. Ena ene narrateur nommé Mouhammad Bin Ishaaq ki so position ene ti pé controversé. Mais malgré ça li pas ene rawi ki pas capave considère so hadice. Donc après tous les pours et les contres, c’est ene hadice hassan.

Explication :

D’après ça hadice-là, faudré pas laisse ene la nuit passé sans faire namaz dans ene partie là-dans. Mais shariat fine accorde ene facilité ki tous dimoune capave faire li parceki li pas nécessaire ki ene dimoune li lève dans au milieu la nuit pou mette ça pratique-là diboute. Parceki d’après ça hadice-là, tous banne namaz ki ene dimoune faire après namaz Esha, li compte dans namaz pendant la nuit. Donc banne nafil ki ene dimoune faire après namaz Esha, li compte dans Salaat-ul-lail. Li vrai ki ene namaz ki ene dimoune faire dans dernier partie la nuit li ena ene récompense énorme et apart.

Différence entre namaz tahajjud et Salaat-ul-Lail

D’après so sens littéral, Salaat-ul-Lail li applique pou tous banne namaz ki ene dimoune faire apartir couché du soleil ziska avant soubh swadiq. Mais d’après hadice, ça li applique pou namaz ki faire dans l’intervalle après namaz Esha ziska soubh swadiq. D’après principe, Namaz tahajjud c’est ça namaz ki faire après avoir faire ene sommeil dans la nuit après Esha. Etant donné ki ça namaz-là li faire dans la nuit, capave appelle li Salaat-ul-Lail ou bien Qiyaam-ul-Lail aussi. Nou pou remarqué ki Salaat-ul-Lail li pli général ki Salaat-ut-tahajjud. C'est-à-dire tout tahajjud li Salaat-ul-Lail. Mais tout Salaat-ul-Lail pas capave être Salaat-ut-tahajjud.

Nombre de rakaat de namaz tahajjud

عن ابى سلمة بن عبد الرحمن انه سئل عائشة كيف كانت صلاة رسول الله صلى الله عليه وسلم فى رمضان؟ قالت ما كان يزيد فى رمضان ولا فى غيره على احدى عشرة ركعة يصلى اربعا فلا تسئل عن حسنهن وطولهن ثم يصلى اربعا فلا تسئل عن حسنهن وطولهن ثم يصلى ثلثا (البخارى / مسلم)

Traduction :

Abou Salamah Bin Abdurrahmaan fine dimane Hazrat Aisha ‎‎(Radiyallahou anhou‎)‎‎ couma Rassouloullah ‎(Sallallaahou A'laihi Wasallam)‎‎‎‎ so namaz ti été pendant ramadhan ? Hazrat Aisha ‎(Radiyallahou anhou‎)‎ fine repone : « Li pas ti ena l’habitude faire plis ki 11 rakaat ki ce soit dans ramadhan ou en dehors ramadhan. Li ti faire 4 rakaat. Pas dimane so beauté et so longueur ! Ensuite li ti pé 4 rakaat. Pas dimane so beauté et so longueur ! Après ça li ti pé faire 3 rakaat. » (Boukhari/Mouslim)

Explication :

Ena différent hadice ki fine être rapporté concernant le nombre de rakaat ki Nabi ‎(Sallallaahou A'laihi Wasallam)‎‎‎‎ ti pé faire dans la nuit. A la lumière de ça hadice-là, li paraite ki en principe Nabi ‎(Sallallaahou A'laihi Wasallam)‎‎‎‎ ti pé pratique 8 rakaat + 3 rakaat witr. Parfois li fine faire moins ki ça aussi. Ça ti varié selon l’occasion et circonstance. D’après ene hadice ki trouve dans Niça-ï, Ibn Majah, Abou Dawood et Ibn Hibbaan, li recommandé pou faire au minimum deux rakaat aussi. Donc li dépanne lors chaque dimoune so condition et so facilité. C'est-à-dire li faire la quantité ki li capave. Mais li pli bon si li faire 8 rakaat. Li pas mal si ene dimoune faire 4 rakaat aussi. Si kikene pas capave même, alors au moins li faire 2 rakaat. Shariah fine laisse toute option ouvert pou facilite dimoune profité avec ça namaz-là d’après so capacité.

 Préparé par M.R.Meerun