Habillement-Apparence

L’habit ne fait pas le moine

Ça li ene proverbe. Li pas ene verset Qour’aan ou bien ene hadice.

L’habillement madame

Ene madame bizin pas sorte-sorti depi dans so la caze. Li bizin considère so la caze comme ene forteresse ki protége so la chasteté et so l’honneur.
Et quand li ena pou sorti pou kit nécessité, alors li bizin couvert li bien. Couvert bien veut dire ki li couvert li depi enbas ziska la haut y compris so visage aussi. Li bizin mette ene linge ki so forme le corps pas paraite. Et li bizin ene linge ki pas attirant.

L’habillement

L’habillement ene dimoune li ena ene l’effet lors li. Par exemple si li mette costume cravate, li pou ena ene certaine l’attitude ki li capave pena li quand li mette ene kurta et ene bonnet lors la tête. Avec so kurtah et bonnet, li capave paraite ene ti pé pli humble. Et dans li même li capave senti li ene ti pé pli près avec Deen. Par contre avec banne battage et banne la mode ki en vogue et ki reste change-changé, ene dimoune li vine victime de banne maladies grave couma vantardise et l’orgueil.

Drôle mentalité

Concernant Deen, dimoune li là pou tire tout qualité prétexte pou pas faire ene kitchose ki conte so goût. Si so prétexte pas fine marché même, à ce moment-là li faire li mais li faire li pli tigite ki li capave zisse pou couvert frais. Et concernant dounia, li rode pli bon kitchose. Li pas satisfait avec le minimum. Si fallait li plonge dans l’impureté l’intérêt ziska la gorge pou li capave gagne ene pli zoli l’auto ou bien ene pli zoli la caze. Mais li pas calcule ça gravité ki li pé commette-là. Couma dire li pena pou mort et li pena aukene compte à rendé.

Pantalon la haut cheville

Mette pantalon ou pyjama ou izaar ou bien loungi la haut cheville c’est tenue ene musulman. D’après hadice, couvert cheville li ene signe de l’orgueil ki li haraam. Rassouloullah ‎(Sallallaahou A'laihi Wasallam)‎ fine mette en garde contre ça banne tenue-là et fine averti nou ki ene dimoune pareil pou mérite ene traitement bien défavorable dans aakhirat. Couvert cheville avec pantalon li grave, même si faire li sans aukene l’esprit de l’orgueil. Et si faire li par l’orgueil, li vine pli grave.

Ki ou pou repone ?

Jour Qiyaamat si Nabi ‎(Sallallaahou A'laihi Wasallam)‎ dimane ou ki faire ou pas fine laisse ou visage ressemblé mo visage, lerla ki ou pou repone ? Si li dimane ou ki de vilain ou ti trouvé dans moi pou ou pas fine faire couma moi et ki joli ou ti trouve avec lezot ki ou fine garde ou cheveu et rase ou la barbe couma banne-là, alors ki réponse ou pou ena ? Pas faire la tête dure et pas tire prétexte. Ou en tort et définitivement ou en tort.

Pardah avec papa so mamou ou papa so chacha

Question:

Eski ene tifille bizin faire pardah avec so papa so mamou ou bien avec so papa so chacha?

Réponse:

En principe ene tifille pena pou faire pardah avec so papa so mamou ou bien avec so papa so chacha. Coumsa même li pena pou faire pardah avec so mama so mamou ou bien avec so mama so chacha aussi.

[Extrait de Al Jamiat Vol.4 No.3]

Syndicate content