"Vaut mieux suive aveuglement quelqu'un qui trouve clair ki suive ene aveugle lizié ouvert"

Ou dire ki : "Vaut mieux suive aveuglement quelqu'un qui trouve clair ki suive ene aveugle lizié ouvert", alors

Q. 1. Ki sanla ça, celui ki trouve clair et ki vaut mieux nou suive li aveuglement, et ki sanla ça aveugle ki nou pas bizin suive lizié ouvert-là ?

2. Ki preuve ou ena depuis Qour'aan, Sunnah, Ijmaa us-Sahaba ou Qiyaas ki prouvé ki ceki ou pé dire li obligatoire (c.à.d 'vaut mieux suive ...'), li correct d'après l'Islam ?

3. Est-ce ki ena kik preuve dans Sharia ki dire ki ene kikene ki pas suive aveuglement ene kikene ki trouve clair (excepté Mouhammad ‎(Sallallaahou A'laihi Wasallam)‎, li nécessairement ene aveugle (ki nou pas gagne droit suive lizié ouvert) ?

R : Avant reponne ou banne questions ki assez important et intéressant, laisse nou donne ou ene ti explication lors ça déclaration ou bien la formule ki fine faire ou pose tant de questions !

"Vaut mieux suive aveuglement quelqu'un ki trouve claire qui suive ene aveugle lizié ouvert". C'est ene causé pou faire comparaison entre deux genres de personnes:-

Ene personne la-dans, li gagne zaffaires avec ene kikene ki conne so domaine et ki ena la compétence. Alors li largue tout dans la main ça personne compétent-là.

Deuxième personne c'est ene personne ki soi disant raisonné mais ki malheureusement gagne zaffaire avec ene ki perna la compétence couma bizin dans so domaine.

La première personne, en principe, li pour réussi dans so démarche et pour la deuxième personne, pena aukene garantie ki li pour réussi. En principe li pé alle vers ene défaite. Li couma dire ene l'auto ki ena ene bon chauffeur. Dimoune ki dans sa l'auto-là li capave pé dormi mais li sure ki li pou arrive lors so destination sain et sauf. Par contre ene passager avec so lizié grand ouvert pas capave empêche li tombe dans précipice si so chauffeur ki pé amene li, li ene grand fausseur. Pour compare position ça deux genres de personnes-là nou capave dire :

"Vaut mieux voyage avec lizié fermé dans ene l'auto ki ena ene bon chauffeur ki voyage lizié grand ouvert dans ene l'auto ki ena ene fausseur."

Quand ene dimoune pé dormi dans avion, dans bus ou dans l'auto, pena personne ki dire ki li pé mal faire. Nou tout d'accord ki li ena parfaitement raison. Li pas dans l'erreur parceki dimoune ki fine prend la responsabilité pour piloter ou conduire, li ena la compétence voulue. Par contre tout dimoune intelligent et tout dimoune ki raisonné pour donne tort ça dimoune ki pé voyage avec ene ki pas ene bon chauffeur. Quand même ça passager-là pas dormi du tout et li reste éveillé pendant toute longue trajet. Dans ça l'exemple-là c'est dimoune ki ou suive ki faire la différence. Non plus ceki ou, ou été. Dans le domaine de Deen, ça l'exemple-là signifié ki ene personne ki suive ene personne ki ena la compétence, li dans meilleur position ki ene l'autre dimoune ki soi-disant li comprend mais ki par malheur pé suive ene kikene ki perna la compétence.

Pour être pli claire et pli explicite, ça appliqué lors banne prédicateurs et banne enseignants ki dire ki pas gagne droit suive banne Imam couma Imam Abou Hanifah (R), Imam Malik (R), Imam Shafi (R) et Imam Ahmad Bin Hambal (R). Et l'autre coté zotte oulé ki banne dimoune écoute zotte et suive zotte dans zotte déclaration : "Pas gagne droit suive banne Imam".

Astere si banne dimoune écoute ça banne enseignants-là ki zotte même zotte dire zotte pas Aalim et ni ena Aalim dans Maurice, ça veut dire ki banne dimoune fine arrête suive banne Imam auparavant lors déclaration banne ki pas Aalim. Ça aussi appelle suive ça. Alors ça l'exemple-là appliqué dans ça contexte-là aussi et nou capave dire ki vaut mieux banne dimoune suive aveuglement banne grands et célèbres Aimmah couma Imam Abou Hanifah (R), Imam Malik (R), Imam Shafi (R), Imam Ahmad Bin Hambal (R), banne ki Allah Ta'ala ti accorde zotte ene don extraordinaire pour comprend, analyser et interprète Qour'aan-E-Kareem et hadice de Nabi ‎(Sallallaahou A'laihi Wasallam)‎ au lieu ki suive lizié ouvert banne enseignants ki pas Aalim et ki zotte connaissance pas représente narien divant connaissance ça banne savants-là.

Zordi jour ena ene quantité dimoune pensé ki zotte fine comprend Deen et ki zotte capave faire recherche. Et comme bagage dans Deen, zotte pas fine apprane plis ki ene deux traductions là-haut là-haut. Zotte bizin conné ki pratique Deen par suive banne Aimmah li tellement nécessaire et tellement important ki banne grand grand savants de tafseer, savants de hadices et banne grand juristes pas fine trouve aukene chemin apart suive ene Imam. Par exemple, Allamah Abou Bakr Al-Jassaas, Ibn Khuzaimah, Abou Thour, Allamah Tahawi, Allamah An-Nawawi, Allamah Qartabi, Allamah Ibn Hajar Al-Asqalami, Allamah Badruddeen Al-Aini, Allamah Jalaluddeen As-Souyouti etc. zotte tous finne suive banne Imaam.

Nous bizin admette ki c'est ene vérité ki boucou nou banne jeunes pas conné. C'est parceki banne enseignants zotte pé cachiete ça vérité-là. Pas conné ki l'intérêt zotte ena dans cachiette ça vérité-là. Peut être acoze ki si banne jeunes et le public en général pour conne ça, alors zotte pour raisonné et zotte pour dire ki si banne grand grand colosse coumsa, fine suive Imam alors nou, ki nou été pour pas suive. Donc ça l'exemple-là li appliqué dans ça contexte-là aussi ki vaut mieux suive aveuglements banne Aimmah auparavant ki bien avisé, ki suive lizié ouvert banne ki absolument pas conné.

Réponse 1:

Ça quelqu'un ki trouve claire et ki vaut mieux suive li aveuglement-là c'est banne Moujtahid. Ene Moujtahid c'est ene kikene ki Allah Ta'ala fine accorde li ene l'aptitude extraordinaire à ene degrés très avancé pour comprend, analyser et interprète Qour'aan-e-Kareem et hadice de Nabi ‎(Sallallaahou A'laihi Wasallam)‎. Banne ki pas fine atteine ça degrés de l'aptitude-là, zotte couma banne aveugle comparé à connaissance ki ene Moujtahid ena. Li couma ene girafe ki bien haute dans li même mais ki paraite couma ene nain narien du tout divant même ene ti colline aussi. Ça veut dire ki quand nou ena banne Aimmah Moujtahid couma les 4 Aimmah, alors vaut mieux nou suive zotte, même si ena pour suive zotte aveuglement, au lieu suive banne prédicateurs ou enseignants de nos jours ki de par zotte connaissance, compétence et la piété, zotte pas pareil couma ça banne-là.

Réponse 2:

Allah Ta'ala dire dans Qour'aan-e-Kareem:

"Dimane banne ki conné quand ou pas conné". (S21:V7)

D'après ça verset-là quand ene dimoune pas conné et ki pena connaissance, li bizin dimane ene ki conné. L'essentiel c'est suive Deen. Si ou pas capave conne par ou même, alors ou bizin essaye conne li par kikene. Et nou conné ki li pas dans capacité tous dimoune pour suive Deen sans dimane kikene. Alors banne ki pena capacité, zotte bizin suive Deen par suive ene kikene ki conné. Si ene dimoune bizin nécessairement suive Deen par so propre recherche, alors ene quantité pas pour capave pratique Deen. Parceki pas tout dimoune ki ena capacité. Allah Ta'ala pas impose kitchose ki en dehors capacité so serviteur. Ça signifié ki banne ki pena capacité, bizin suive Deen par suive ene l'autre ki conné. Astere quand bizin suive même, ki faire pas suive banne ki pli conné couma les 4 Aimmah? Ki faire bizin arrête suive banne Aimmah auparavant lors déclaration banne enseignants ki pas même conne le vrai porté de zotte déclaration aussi? Dans ene hadice Rasouloullah ‎(Sallallaahou A'laihi Wasallam)‎ fine dire:

"Ki, faire banne-là pas fine demandé quand zotte pas ti conné." (Abou Dawood)

Ça hadice-là aussi pé montré ki quand pas conné bizin dimandé.

Réponse 3:

Ça li depanne dans ki catégorie ça quelqu'un-là été. Si li ene Moujtahid, li bizin suive so propre recherche. Mais si li pas ene Moujtahid, li bizin suive ene ki Moujtahid. Divant connaissance ene Moujtahid, li pou absolument ene dimoune ki pas conné. Alors d'après Qour'aan-e-Kareem, li bizin suive ene ki conné.

"Dimane banne ki conné quand ou pas conné." (S21/V7)

[Extrait de Al Jamiat Vol.1 No.6]