La barbe

Ki veut dire Sounnat?

Sounnat signifié principe. Dans langage de Shari'ah, quand nous dire Sounnat, par ça nous signifié le principe de nous bien aimé Nabi ‎(Sallallaahou A'laihi Wasallam)‎.

Sounnat Mouakkadah

Ene principe: (1) ki nous Nabi ‎(Sallallaahou A'laihi Wasallam)‎ fine pratiqué régulièrement et (2) ki li pas fine négligé jamais apart dans banne cas oblige et (3) ki li fine ordonne so Oummat pou mette li en pratique et (4) ki l'Oummah fine recevoir li par ene source ki ena ene certaine pourcentage de réserve - alors ene principe pareil appelle Sounnat Mouakkadah ou bien Sounnat-ul- Houda.

Sounnat Ghair Mouakkadah

Par contre ene principe ki Rasouloullah ‎(Sallallaahou A'laihi Wasallam)‎ fine pratiqué régulièrement mais parfois fine déjà quitte li aussi sans aukene obligation, appelle li Sounnat Ghair Mouakkadah.

Néglige ene Sounnat Mouakkadah

Néglige ene Faraz ou ene Waajib li ene péché. Coumsa même néglige ene Sounnat Mouakkadah aussi li ene péché. Mais le péché ki gagné dans néglige ene Faraz ou ene Waajib li pli grave ki le péché ki gagné dans néglige ene Sounnat Mouakkadah. Mais néglige ene Sounnat Mouakkadah li vine ene péché quand prend l'habitude quitte li. Par contre néglige ene Faraz ou ene Waajib ene seul fois même li suffit pou gagne péché.

Donc ene personne ki néglige ene Faraz ou ene Waajib ou bien li prend l'habitude néglige ene Sounnat Mouakkadah, li ene Faasiq (pervers). Le Shahaadah (témoignage) de ene Faasiq li pas acceptable d'après Shari'ah.

Pas garde la barbe

Garde la barbe en sus d'être ene Sounnat (principe) de Rasouloullah ‎(Sallallaahou A'laihi Wasallam)‎ li bénéficié le statut de ene "Shi'ar" (symbole) de l'Islam. Selon les `Oulama, personne parmi banne "Mujtahideen" pas fine autorise taille la barbe avant ki li arrive longueur ene poignet. C'est à dire li wajib pou laisse la barbe poussé juska ki li vine ene poignet. Quand li vine pli long ki ene poignet, capave taille ceki en plus. Donc celui ki pas garde la barbe ou bien celui ki garde la barbe moins ki ene poignet, li ene faasiq d'après Shari'ah. So témoignage pas acceptable parceki au point de vue islamique li pas ene personne digne de foi. Mais ça pas ene raison pou sous estime ene frère ki pena la barbe et faudré pas considère ça quelques lignes-là comme ene insulte pou banne ki pas pratique li. Li capave pas pé garde la barbe acoze li pas conne so l'importance et so nécessité dans l'Islam. Donc c'est le devoir de celui ki conné pou avise banne ki pas conné. C'est ene façon d'être sincère envers ene frère musulman pou mette li en garde contre tout kitchose ki capave faire li du tort. Bizin prend ça quelques lignes dans ene optique de vouloir le bien-être de ene l'autre frère.

La barbe moins ki ene poignet

Ene personne ki so la barbe moins ki ene poignet, bizin faire ene z'effort encore pou capave faire li vine dans la longueur de ene poignet. Si dans l'immédiat, li na pena la volonté pou faire li, faudré pas li tire ça quantité ki li ena-là. Ça quantité-là aussi li mérite d'être apprécié dans le sens ki c'est le commencement de la fin ki recommandé. Donc ene la barbe ki moins ki ene poignet, malgré li pas reponne à l'exigence de sounnat, bizin être encouragé afin ki li vine dans la longueur voulue.

Taqwa et la barbe

Ene personne ki ena la barbe pas nécessairement li pli bon ki ene personne ki pena la barbe. Oui, la pratique de garde la barbe li pli bon ki la pratique de pas garde la barbe. La pratique de garde la barbe li forme parti dans taqwa. Ene personne ki vraiment ena taqwa pas capave être sans la barbe. L'absence de la barbe indique ene manque dans taqwa. Ene personne sans la barbe pas capave être ene bon "Mouttaqui" couma ene personne pas capave vine ene bon Mouttaqui par seulement garde la barbe. Pou être simple nous capave dire ki ene bon Mouttaqui bizin ena la barbe mais ene ki ena la barbe pas nécessaire li ene bon Mouttaqui.

Comparaison

Deux musulmans ki nous pas conne zotte la vie privée ni nous ena kit détails lors zotte mais ene fine garde la barbe et l'autre pas fine garde la barbe - quand nous faire comparaison entre les deux, nous pou bizin donne priorité à celui ki fine garde la barbe.

Garde la barbe et faire péché

Ena bannes frères ki tire zotte la barbe par prétexte ki zotte pas pé capave respecté zotte la barbe à coze ki zotte pé continué faire banne actes indésirables. Dans ene situation pareille, faudré pas tire la barbe. Bizin arête ça bannes actes indésirables-là. Li pareil couma ene personne ki arrête prend médicament acoze ki li pas pé capave prend précaution. Ça li pli néfaste pou li. Coumsa même faudré pas tire la barbe dans ene situation pareil. Au contraire bizin faire z'effort pou arrête faire péché. Si li continué garde la barbe, ça pou enfreine so désir pou commette péché juska ki li pou mette ene fin à ça. Li pareil couma fine rapporté dans Mousnad Ahmad par Hazrat Abou Hourairah ‎(Radiyallahou anhou‎)‎ ki kikene fine dimane Rasouloullah ‎(Sallallaahou A'laihi Wasallam)‎ apropos ene personne ki faire namaz le soir mais le matin li coquin. Rasouloullah ‎(Sallallaahou A'laihi Wasallam)‎ fine reponne :

"Ça Ibaadat ki li faire-là pou empêche li faire ça mauvais action-la très bientôt." 

[Extrait de Al Jamiat Vol.1 No.6]