Encore ene kitchose

Ena encore ene kitchose ki boucou parmi nou pas pense pou cachiette. C'est nou le corps. Longtemps, dimoune pas ti conné. Acoze ça zotte pas ti conné couma habillé. Mais azordi avec tout connaissance ki nou ena, nou déclare pas conne habillé. Allah Ta'ala fine crée nou couma Insaan. Différence entre Insaan et banne les zotte créatures c'est l'habillement. Nou bizin non seulement habillé mais nou bizin habille convenablement aussi.

Pou capave habille convenablement, nou bizin conne la quantité ki nou bizin cachiette depi dans nou le corps au minimum. Ene z'homme li bizin cachiette so le corps depi enbas so nombril juska so genou. Ça quantité-là li bizin cachiette li, même divant ene z'homme pareil couma li. Sport li pas ene excuse. Là-bas aussi li bizin cachiette ça quantité-là. Couma ene z'homme bizin cachiette ça quantité-là depi dans so le corps, coumsa même li pas gagne droit guette kikene avec ene short. Ça montré ki pas gagne droit guette match football parceki tous banne joueurs zotte avec short. Li bien malheureux pou constaté ki nou la guerre pou banne simple-simple ti zaffaire et l'autre coté nou faire banne kitchose haraam lors la plaine et divan télévision sans ki nou rende nou compte. Si ene z'homme pas gagne droit guette ene l'autre z'homme dans ene tenue pareil, eski ene madame pou en droit guetté? Astere si ene z'homme pas gagne droit vine divant ene z'homme avec so short, eski li pou gagne droit vine divant ene madame dans ene tenue pareil?

Et eski ene tifille ou ene madame pou gagne droit marche dans public avec so li pied découvert? Définitivement non. Ene madame li ene "aurah". Ça signifié ki li ene kitchose ki bizin reste cachiette. Ene madame musulmane pas gagne droit dévoile li non seulement divant banne z'hommes étrangers, mais li bizin aussi cachiette li juska même avec banne madames non musulmanes aussi. Divant ene madame musulmane pareil couma li, li bizin cachiette so le corps depi so nombril juska genou au minimum.

[Extrait de Al Jamiat Vol.1 No.7]