Bon maniere

Ene dimoune ki ena Deen dans li, li bizin ena bon manière aussi. Parceki bon manière li pas ene l'autre kitchose apart Deen. Li ene parti dans Deen. Alors vine pretanne ki un tel dimoune dans Deen pena bon manière, li ene fausse prétention. Ena deux kitchoses la-dans. Soit so jugement pas bon ou bien dimoune-là na pena Deen même dans li. Ou bien capave ena ene troisième possibilité. Li capave ena ene conception erronée et difformée de Deen et de bon manière.

Bon manière ki été?

Bon manière pas veut dire montré tous dimoune ou 32 le dents. Bon manière pas veut dire vine ene "yes"man et accepté tout ceki dire ou couma ene marionnette. Rié cote ti bizin exprime mécontentement li pas ene bon manière. C'est manque de l'amour propre ki faire ene dimoune continué reste insensible cote li ti bizin montré so désapprobation. Coumsa même faire colère inutilement li indique ene déséquilibre dans la personne. Ene personne ki ena manque de l'amour propre ou déséquilibre dans li, pas capave ene dimoune ki ena bon manière. Par conséquent, li pas ene dimoune dans Deen.

Bon manière c'est ene l'équilibre moral ki faire ene dimoune agir selon circonstance dans la façon appropriée. So vitesse li réglé selon la route ki li pé faire. Li pas passe première lors palier et 4éme lors la montée. Li pas faire figure cote li ti bizin content. Ni li exprime so satisfaction cote li ti bizin bouleversé.

Dimoune ki ena bon manière

Ene dimoune ki ena bon manière, li reste toujours humble. Li pas fière ni li vantard. Li conne accepté so l'erreur cote li dans l'erreur. Li pas ene dimoune ki persisté lors l'erreur quand li conné li dans l'erreur. Ene dimoune ki ena bon manière pou révolté, pou bouleversé et pou en colère quand li trouve kikene pé mette la main lors l'honneur et dignité so banne proche. Si dans ene moment pareil, la personne li reste insensible, le bras croisé avec so 32 le dents dehors, tout dimoune pou dire li ene personne sans l'amour propre et sans pudeur.

Si ene C.P pas capave tolère kikene fume gandia ou faire shooting dans la main divant li, coumanière ene bon musulman ki naturellement bizin ena bon manière, capave permette li assize à table cote l'alcool pé servi? Ki manière li capave reste tranquille sans éprouve ene pincé d'amertume et dégoût dans le coeur et lors visage quand li trouve so madame, so tifille ou so soeur pé marche lors la rue avec ene le corps découvert à plis ki 50 pou cent ou plus?

Donc bon manière pas veut dire necque riyé causé et pas dire narien. Bon manière pas veut dire la tolérance. Bon manière veut dire faire colère cote bizin faire colère. Exprime l'appréciation pou banne kichoses appréciables. Tolère ceki tolérable. Mais la tolérance pou ene kitchose intolérable li pas ene tolérance louable. C'est ene lâcheté et manque de l'amour propre ki condamnable. Ene dimoune ki ena bon manière c'est ene dimoune ki bien servi so banne facultés. Bien servi veut dire servi selon contexte dans la façon appropriée.

Couma gagne bon manière?

Ene dimoune pas capave apprane nager juste par guette dans livre. Coumsa même ene dimoune pas capave ena bon manière necque par lire et apprane dans livre. Li bizin apprane bon manière par reste ene bon boute le temps en compagnie ene ki ena bon manière et suive so l'instruction. Sans sa li pratiquement impossible.

"Ene musulman plus parfait c'est eue ki ena pli bon manière ..." (Tirrnizi)

"Pena aukene kitchose ki pou peze pli lourd lors balance ki bon manière." (Tirmizi)

"Ene dimoune li ena manière so camarade intime. Alors chacun parmi ou bizin guette bien dimoune ki li pé fréquenté." (Tirmizi)

[Extrait de Al Jamiat Vol.1 No.8]