Reflexion

To dire dimoune ki pas bizin suivre aucaine imam. Suivre ziste Qour'aan et Hadith. Bé ki faire to donne lesson et ki faire to faire causerie? Ki to pé attane, banne dimoune ecoute toi et suive toi? Be to meme to dire pas suivre banne imam (moujtahid). Ki, to pli top ki ene mujtahid toi? To fine arrive degré Ijtihad toi? To conné meme ki veut dire Ijtihad et ki critere ene moujtahid bizin ena? Pourtant banne dimoune ki pé ecoute to causerie et pé suivre to lesson, zotte pas conne arabe zotte. Sa banne la aussi couma zotte capave dire ki zotte pé suivre zis Qour'aan et Hadith - tandis ki zotte pas conne arabe? Zotte ecoute et avale aveuglement sans faire aucaine recherche. Et après tou ki recherche ki zotte pou capave faire - puisque zotte pas conne arabe.

Si pas gagne droit suivre ene imam ki fine arrive éne degré Ijtihad ki entier oummah reconaite so potentiel et competence, bé pli pas gagne droit suive éne n'importe couma toi ki pas conne abcd meme dans shari'ah. Et arabe aussi to pas conné parceki to faire khoutbah en creole. Sa mo conné parceki to meme to fine dire ki si pena ene personne aussi ki conne arabe dans l'assemblé, lerla gagne droit faire khoutbah dans ene l'autre langue apart arabe.

Bé d'après ceki to pé dire to pas bizin donne lesson et pas bizin faire causerie. Tout dimoune bizin nek prend ene copie Qour'aan et ene serie de banne Hadith et sa aussi en arabe SVP.

Allah Ta'ala pé dire: "O banne ki fine amene iman, ki faire zotte dire ene kitchose ki zotte pas faire?" (Surah As-Swaff S61/V2)

[Extrait de Al Jamiat Vol.1 No.9]