Lire 11 fois Ya Noor et soufflé lors lizié ou bien lire 11 fois Ya Qayyoum et soufflé lors la tête après banne namaz faraz

Question:‑

Ki Shariat dire lors la question lire 11 fois Ya Noor et soufflé lors lizié ou bien lire 11 fois Ya Qayyoum et soufflé lors la tête après banne namaz faraz?

Réponse:‑

C'est ene genre de Rouq-ya ki permette dans shariah. Rouq-ya c'est ene formule ki récité pou soufflé lors kit parti le corps dans le but pou gagne guérison de kit maladie ou bien dans le but pour reste protégé de kit difficulté. Ça genre de Rouq-ya li autorisé par le sens général ene hadice rapporté dans Mouslim Shareef cote Rasouloullah ‎(Sallallaahou A'laihi Wasallam)‎ fine dire:

"Perna narien de mauvais avec Rouq-yah tanque ki na perna aukene kitchose de Shirk là-dans."

An Noor ou bien Al Qayyoum c'est deux attributs Allah Ta'ala. Lire ça deux attributs-là après namaz faraz pour kit but précis bizin permette parceki pena narien là-dans apart invoque Allah Ta'ala par so banne attributs. Et invoque Allah Ta'ala par so banne attributs li ene kitchose très louable et recommandé.

"Et Allah Ta’aah, ena banne joli noms. Donc invoque li par ça banne noms-là ... " (S7 V 180)

Alors lire Ya Noor ou Ya Qayyoum après namaz faraz li permette étant donné ki ça li approuvé et autorisé par le hadice rapporté dans Mouslim Shareef.

Quant à Rouq-ya interdit et qualifié de shirk, li appliqué lors banne Rouq-ya ki ti en vigueur à l'époque de Jahiliyyah. C'était banne Rouq-ya ki ti pratiqué par banne moushrik ki ti contenir banne noms de banne idoles et banne kitchoses de shirk.

[Extrait de Al Jamiat Vol.1 No.10]