1er, 7eme et 15eme wagon

Mo camarade! To bizin sincère envers to même d’abord. Sinon ki message de sincérité to pou capave donne to prochain? Dire moi avec toute sincérité, eski c’est par recherche ki to dire pas bizin suive aukene Imam pou suive Deen? Eski pas par taqleed même ki to empêche faire taqleed? Autant ki mo conne toi, to pas capave faire ene déclaration aussi sérieux par to même. To bizin fine suive kikene aveuglement pou to dire ki pas bizin suive kit Imam.

C’est à dire en faisant taqleed de banne couma Allaamah Ibn Taymiyah de 6eme ou bien 7eme siècle et Albani de 15eme siècle to pé empêche faire taqleed ene Imam aussi célèbre couma Imam Abou Hanifah (rahmatoul-laahi ‘alayh) ki fine prend naissance seulement 70 ans après le wafaat de Rasouloullah ‎(Sallallaahou A'laihi Wasallam)‎. Eski to pé réalisé ceki to pé faire? Ça même appelle sappe dans caraille tombe dans difé. Entier to la vie fine roulé dans taqleed et dans suive aveuglement. Dans accepté ou pas accepté ene hadice to fine suive aveuglement. Oui to fine suive aveuglement banne ki to ena confiance lors zotte connaissance. Bé laisse to banne camarade aussi suive banne ki zotte ena confiance lors zotte connaissance.

Si to ena confiance lors Allaamah Ibn Taymiyah ou bien Albani, mo aussi mo ena confiance lors Imam Abou Hanifah (rahmatoul-laahi ‘alayh). Finalement mo trouvé ki nou tous les deux pareil dans même train. Seul différence ena ki mo dans ene compartiment ki bien près avec locomotive et toi to dans septième ou bien 15eme wagon. Mo fine ena la chance suive ene qui bien près avec Rassouloullah ‎(Sallallaahou A'laihi Wasallam)‎ et toi to fine préfère reste impé pli loin. Chakene so chance. Chakene so destin. Mo bien satisfait cote mo été. Mais mo perna aukene objection si to vine avec moi!

[Extrait de Al Jamiat Vol.1 No.11]