Rejette hadice

Banne hanafi zotte rejette plusieurs hadice ki trouve dans Saheeh Boukhari tel couma hadice Raf-ul-Yadayn. C’est ene objection ki certaine dimoune faire, ziste pou embette banne dimoune et mette confusion dans zotte l’esprit.

Mais c’est ene objection ki bien banale. Bizin conné ki aucaine place dans Qour’aan, Allah Ta’ala pas fine donne l’ordre pou suive hadice ki trouve dans Boukhari. Coumsa même, jamais Rassouloullah ‎(Sallallaahou A'laihi Wasallam)‎ fine donne l’ordre pou suive hadice ki trouve dans Boukhari. Alors ki manière nou capave impose lors dimoune pou suive hadice ki trouve dans Boukhari ? Et ki manière nou capave permette nou critique kikene ziste acoze ki li pas suive banne hadice ki trouve dans Boukhari quand li ene kitchose ki ni ena dans Qour’aan ou dans hadice !!!

Imam Boukhari (R) fine prend naissance en 194 H ou bien 184 bananés après wafaat Rassouloullah ‎(Sallallaahou A'laihi Wasallam)‎. Banne musulmans dans ça l’intervalle-là c’était banne Sahaba-e-Kiraam, Tabeines et Taba-Tabeines. Et pas ti encore ena ça livre ki appelle Saheeh Boukhari-là. Ceki zotte fine suive dans ça l’intervalle-là, c’est hadice de Nabi ‎(Sallallaahou A'laihi Wasallam)‎. Et ça même ki bizin suive tous le temps. Donc avant critique banne hanafis ki soi-disant zotte rejette plusieurs hadice ki trouve dans Boukhari, d’abord bizin prouvé ki bizin suive hadice ki trouve dans Boukhari par Qour’aan et hadice. Nou faire ressortir ki l’ordre ki l’Oummah fine gagné dans Qour’aan et dans hadice, c’est l’ordre pou obéir Rassouloullah ‎(Sallallaahou A'laihi Wasallam)‎ et suive so l’enseignement. Ça li capave fine enregistré dans Boukhari ou bien dans ene l’autre livre.

D’ailleurs tous hadice ki Saheeh (authentique), li pas nécessairement applicable aussi, parceki li capave ene hadice ki fine fini abrogé. Si banne hanafis, d’après zotte recherche, fine trouvé ki hadice lors Raf-ul-Yadayn fine abrogé, pas capave critique zotte ki zotte fine quitte hadice Saheeh. Parceki ena banne verset Qour’aan aussi ki fine abrogé. Si kikene dire ki pé quitte boucou versets Qour’aan, ça li pas pou correct. Avant dire ça, bizin vérifié eski ça verset-là li encore applicable ou bien non.

L’objection-là, même ki li enfantin, mais li déroutant. Et li pas paraite ene objection de la part de ene ki vraiment ena connaissance dans Deen. Mais ça aussi li vrai ki pas bizin ena connaissance pou mette dimoune dans l’égarement. Acoze ça tous dimoune ki faire l’objection, pas bizin prend li pou ene dimoune ki ena connaissance. Bizin faire bien attention !

[Extrait de Al Jamiat Vol.2 No.6]