La vie après la mort

Quand ene z’enfant rempli so l’estomac avec tout qualités gonnage, li pas capave mange ceki li bizin. Quand mette bon mangé aussi divant li, li perna aukene désir pou ça mangé-là. Et si force li faire li mangé, li ena chance vomi li.

Coumsa même quand ene dimoune li rempli so le cœur et so l’esprit avec banne gonnage couma l’orgueil, la jalousie etc. li gagne ene dégoût pou banne bon kitchose. Allah Ta’ala dire :

“Et quant à banne ki ena ene maladie dans zotte le cœur, alors ça (révélation de ene kit sourah) li augmente ene l’autre mal propreté lors zotte mal propreté (ki zotte ti déjà ena avant) …” (S9 V125)

Acoze ça li très important ki ene dimoune li prend banne mesures nécessaires pou nettoye so l’intérieur de banne manières et caractères indésirables. Sinon ça pou empêche li bénéficié et profité avec banne bon paroles de Deen. Ene kitchose ki capave crée la volonté dans nou pou nou nettoye nou et nou vine vers Deen et reste dans l’obéissance Allah Ta’ala, c’est la croyance dans la vie après la mort ki nou appelle li “Iman lors Aakhirat”.

La dimension de sincérité dans Deen li dépanne lors le degré de conviction et de croyance ki ene dimoune ena lors la vie après la mort. Acoze ça li très très important pou développe ça croyance-là.

[Extrait de Al Jamiat Vol.2 No.6]