L’équation

Bœuf li ene z’animau ki halaal. Mais tous z’animau ki halaal, li pas nécessairement ene bœuf. Coumsa même ene Khariji so signe ceki li faire boucou ibaadat. Eski ça signifié tout ceki faire boucou ibaadat li ene Khariji ? Jamais ! Sinon ça pou nécessite nou dire ki ene bon musulman c’est ene ki pas faire boucou ibaadat. Et ça li fausse ki pas nécessite réfuté.

Dans Qour’aan-e-Kareem, Allah Ta’ala fine faire nou conné ki so banne serviteurs privilégiés, zotte passe zotte la nuit dans faire namaz. Selon Qour’aan-e-Kareem même, banne musulmans intelligents au près d’Allah Ta’ala c’est banne ki faire zikroullah dans tout l’état et position ki zotte été.

Allah Ta’ala fine raconte nou ça, pou nou aussi nou essaye faire couma zotte fine faire. Si faire boucou ibaadat ti faire ene dimoune vine ene Khariji, alors jamais Allah Ta’ala et so Rassoul ‎(Sallallaahou A'laihi Wasallam)‎ ti pou recommande nou ça banne kitchose-là.

Donc li pas islamique pou qualifié ene dimoune ki faire boucou ibaadat de ene Khariji. Li ene façon pou décourage dimoune faire ibaadat et encourage pas faire ibaadat. Normalement na perna aukene dose de vérité ni ena kit étincelle de haqq dans ene causé pareille. Li plutôt l’égarement et déviation totale. C’est banne ki shaitaan pé absolument servi zotte pou contamine l’esprit banne dimoune innocents. Li paraite banne ki dire ene causé pareille, zotte capave sincère mais zotte perna connaissance.

Khariji

Khariji (singulier de Khawaarij) c’est ene secte ki fine paraite dans l’époque Hazrat Ali ‎(Radiyallahou anhou‎)‎. C’était ene secte égaré ki ti lève contre Hazrat Ali ‎(Radiyallahou anhou‎)‎. A tel point ki zotte fine traite Hazrat ‘Ousman ‎(Radiyallahou anhou‎)‎, Hazrat Ali ‎(Radiyallahou anhou‎)‎ et la majorité de banne Sahaba-e-Kiraam de kaafir. Selon zotte doctrine, ene personne ki commette ene Kabeerah (péché majeur) li vine ene kaafir.

Ahlous-sounnah wal-jama’ah

Mais d’après Ahlous-Sounnah Wal-Jama’ah, ene dimoune li pas vine ene kaafir par commette ene grand péché apart shirk. Acoze ça li vine ene dimoune ki so témoignage na pas accepté parceki li vine ene dimoune ki pas capave faire li confiance. Mais malgré tout ça-là li pas vine kaafir ni so nikah cassé.

D’après ene hadice dans Saheeh Boukhari et lezot livre de hadice, Allah Ta’ala pou tire ene dimoune depi dans l’enfer ki perna aukene bon travail dans so compte apart ene ti étincelle narien du tout de Imaan. Li pou tellement tigite ki banne anges aussi pas pou capave détecté ça. D’après Qour’aan, couma nou conné ene kaafir jamais pou rente dans jannat. Donc ça montré ki ene dimoune pas capave être traité de kaafir simplement acoze ki li fine commette ene grand péché. Par exemple si ene dimoune pas faire namaz, li pas vine kaafir. Oui, nou capave dire ki li fine faire ene travail couma kaafir.

Vine kaafir et faire travail couma kaafir

Ena grand différence entre vine kaafir et faire travail couma kaafir. Boire du vin, chanter, danser, pas garde la barbe ou garde li moins ki ene poignet, pantalon ki couvert cheville, suive la mode banne acteurs actrices dans l’habillement, dans la coupe cheveux, expose le corps dans public, tout ça c’est banne travail kaafir ki bien grave mais li pas faire ene dimoune vine kaafir.

Ene l’exemple

Pou comprend ça, nou ena ene l’exemple pli simple. Ene dimoune ki reprend ene cadeau ki li fine offert à kikene couma dire ene li chien ki fine re-avale so vomi. C'est-à-dire ki li fine faire pareille couma li chien mais li pas vine li chien.

[Extrait de Al Jamiat Vol.2 No.6]