Dimane conseil …

Quand ena pou dimane conseil avec kikene, bizin guette 3 kitchose dans ça dimoune-là :

1. Li bizin sincère.
2. Li bizin ene dimoune ki ena la connaissance de Deen.
3. Li bizin ena l’expérience et conne ça domaine dans ki pé dimane li conseil.

Li bizin sincère parceki si li pas sincère, li capave mal conseille ou par la jalousie. Expressément li capave mette ou dans l’erreur pou ki ou na pas réussi dans ou travail.

Li bizin ena connaissance de Deen parceki dans so guetté li capave pé dire ou ene bon kitchose mais ça kitchose-là li capave pas bon d’après shariah.

Et finalement li bizin conne ça domaine ki li pé conseille ou là-dans parceki coumsa li capave donne ou ene pli bon conseil. Ene dimoune ki sincère et ki ena connaissance dans Deen pas capave conseille ou si li pas conne le domaine bien. Donc ensemble avec la sincerité et la connaissance de Deen, bizin choisir ene dimoune ki dans le domaine. Très souvent nou faire ça erreur-là. Nou dimane conseil concernant Deen avec ene ki na perna ça connaissance-là. Pas tout dimoune ki pretanne conne Deen, ki ena connaissance de Deen. Pas tout dimoune ki causé Deen, ki conne Deen. La connaissance de Deen li vine par apprane Deen avec banne professeurs qualifiés. Donc bizin faire bien attention quand dimane conseil dans Deen.

[Extrait de Al Jamiat Vol.2 No.7]