Salaat-ul-Asr

“Celui ki fine ratte namaz Asr, couma dire li fine perdi so famille et so du bien.”  (Tirmizi)

Dans ça le monde-là, ene dimoune li ena support so la famile ki li ene source de la joie, de contentement et de soutien moral. Ene dimoune ki perna ene la famille, li ene dimoune malheureux et misérable.

Si ene dimoune li perna ene la famille, peut-être li capave compense ça manquement-là dans ene certaine mesure et dans ene certaine genre par so du bien ki li ena.  Mais si ene dimoune li perna ça aussi, veut dire ki li ene dimoune vraiment malheureux. Ça l’état-là ene dimoune capave expérience li quand li dans ene pays ou ene l’endroit étranger acote li perna so la famille, ni li conne kikene et ni li ena casse dans so poche. Li même conné dans ki difficulté li été. Et pire si li dans ene l’endroit acote personne pas conne personne. Chakene conne pou li.

Ene dimoune ki quitte namaz assar, selon Rasouloullah ‎(Sallallaahou A'laihi Wasallam)‎, li pou subir la misère et difficulté couma ça dimoune-là. C'est-à-dire ene dimoune ki quitte namaz assr, li pou souffert pareille couma ene dimoune ki fine perdi so la famile et so du bien, li souffert.

Par cela nou capave comprend ki si Allah Ta’ala faire ene dimoune ki manque namaz assar souffert dans ça façon-là, alors li pas étonnant si Allah Ta’ala ranne ene dimoune de plus en plus heureux concernant so la famille et so du bien si li régulier dans so namaz assar. Couma nou capave déduire par ça ki ene dimoune ki ponctuel et régulier lors so namaz assar, Allah Ta’ala donne li la joie, la gaieté et le bien-être comme si li entouré avec so la famille et so du bien. Ça donne nou ene l’idée ki quantité heureux ene dimoune capave vini par accomplir tous les 5 namaz régulièrement. Et ki quantité malheur ena dans pas faire namaz. Bref na perna tranquillité dans néglige namaz.

[Extrait de Al Jamiat Vol.2 No.7]