Soufi et Soufisme

Le Soufisme c’est ene branche dans Deen pareille couma Tafseer, hadice et fiqh c’est banne branches dans Deen. Fiqh li traite banne sujets et banne problèmes extérieur couma Tahaarat, namaz, roza, hajj, nikah, talaaq, l’héritage etc. Le Soufisme c’est ene branche ki traite la purification de l’intérieur. Ça même ki nou appelle li Tazkiyat-un-nafs ou bien Tahzeeb-ul-akhlaaq. Ene personne ki suive ça traitement-là ou bien ene personne ki dans ça domaine-là nou appelle li ene Soufi. Ça personne ki dispose ça traitement-là li ene Mourshid ou ene Sheikh. Dans le passé nou ena banne personnages couma Hazrat Hassan Basri, Hazrat Ibrahim Bin Ad-ham, Sheikh Abdoul Qadir Jeelani, Sheikh Junaid Al-Baghdaadi, Sheikh Mou-inouddeen Chisti (rahmatoullahi ‘alayhim) ki fine agir comme banne guides spirituels et ki fine dispose ça traitement-là dans zotte l’époque respectif.

Le terme Soufisme ou Soufi c’est ene terme tout à fait correcte. Na perna narien de mal dans servi ça banne termes-là. Ena ki dire ki Rassouloullah ‎(Sallallaahou A'laihi Wasallam)‎, banne Sahaaba-e-Kiraam et banne Tabeïnes zotte pas ti banne Soufi.  Le terme Soufisme pas fine existé dans zotte l’époque. Alors, à coze ça c’est ene innovation et l’égarement. Mais eski banne titres comme Sheikhul-Islam, B.A en Shariah ou M.A en Shariah ti existé à l’époque Rassouloullah ‎(Sallallaahou A'laihi Wasallam)‎? Si Rassouloullah ‎(Sallallaahou A'laihi Wasallam)‎ pas ti ene Soufi, li pas ti aussi ene B.A ou M.A en Shariat. Coumsa même aukene Sahabi aussi pas ti B.A ou M.A en Shariah.

Astere si nou dire ki faire B.A ou bien M.A dans Shariah li ene l’égarement et innovation uniquement acoze ki ça banne termes-là pas existé dans l’époque Rassouloullah ‎(Sallallaahou A'laihi Wasallam)‎, li pou ene causé bien banale. Coumsa même li pas correcte pou qualifié le terme Soufisme ou Soufi de l’égarement. Sinon, nou bizin arrête alle apprane dans l’université, parceki ça pas ti existé. Coumsa même nou pou bizin détruire nou diplôme B.A, M.A parceki ça pas ti existé. Couma banne Sahaba pas ti Soufi, zotte pas ti pé prend la paye aussi pou apprendre Deen dans l’université. Zotte pas ti pé compose l’examen pour gagne certificat. Zotte pas ti pé prend la paye pou propage Deen aussi. Ki quantité ça raisonnement-là li banale, ça pas nécessite assize lors banc pou dire ça ! Si le terme Soufi ou Soufisme li l’égarement, alors ça série de banne kitchose-là aussi bizin qualifié de l’égarement. 

[Extrait de Al Jamiat Vol.2 No.7]