Qour’aan, Hadice et Fiqh

Deen Islam li représenté principalement par Qour’aan-e-Kareem et hadice Rassouloullah ‎(Sallallaahou A'laihi Wasallam)‎.

Qour’aan-e-Kareem et banne l’enseignement de Rassouloullah ‎(Sallallaahou A'laihi Wasallam)‎ ki nou appelle hadice fine expliqué, interprété et fine faire adapté avec la vie de tous les jours par banne fouqaha (juristes). Ça l’ouvrage ki banne fouqaha fine faire pou faire Qour’aan et l’enseignements Rassouloullah ‎(Sallallaahou A'laihi Wasallam)‎ adapté dans la vie de tous les jours, appelle li fiqh. Donc fiqh li pas ene kitchose apart Qour’aan et hadice. Li ene kitchose ki sorti depi dans Qour’aan et hadice même. C’est la forme adaptée de Qour’aan et de hadice. Li couma dire l’éclairage soleil ki sorti depi dans soleil même et ki li pas ene kitchose apart soleil. Donc suive fiqh veut dire suive Qour’aan et hadice ! Alors quand ene dimoune suive fiqh, ça veut dire ki li pé suive Deen. Et Deen trouve dans fiqh. Donc pas capave suive Deen sans suive fiqh. Ça montré ki rejette fiqh signifié pas accepté l’éclairage ki sorti depi dans Qour’aan et hadice. Et ça li représente rejette le vrai Deen.

Les 4 mazhabs

Imam Abou Hanifah (R), Imam Malik (R), Imam Shafi (R) et Imam Ahmad Bin Hambal (R) fine interprète Qour’aan-e-Kareem et hadice de Nabi ‎(Sallallaahou A'laihi Wasallam)‎ et fine adapté li avec la vie de tous les jours. Interprétation de Deen ki Imam Abou Hanifah (R) fine faire appelle mazhab Hanafi, ceki Imam Malik (R) fine faire appelle li mazhab Maliki, ceki Imam Shafi’ (R) fine faire appelle li mazhab Shafi’ et ceki Imam Ahmad Bin Hambal (R) fine faire appelle mazhab Hambali. Tous les 4 mazhabs zotte valable et correcte et ça pé pratiqué depi premier et deuxième siècle Hijri par la grande majorité musulmane. Dans chaque mazhab nou ena banne grand grand Oulama ki fine suive ça. Donc ça li ene preuve ki tous les 4 mazhab zotte saheeh (authentique). Quand ene dimoune suive n’importe lequel mazhab dans ça 4 là, li dans correcte et li lors la vérité. Li couma dire 4 différent chemin ki amene vers ene seul destination. Ou bien différent mode de thérapie ki amene vers ene seul guérison. Ou bien plusieurs formules pou ene seul solution.

Ki faire ça 4 mazhab là-même?

Fine ena encore lezot Imam et Mujtahid apart ça 4 grand Imam-là mais zotte l’ouvrage pas fine réussi gagne li ni fine reste préservé dans ene forme complète ki capave satisfaire banne besoins dans chaque circonstance et chaque contexte. Par contre ça 4 mazhab-là zotte préservé dans ene forme complète ki ena provision détaillée de chaque circonstance. Acoze ça, nou suive ça 4 mazhab-là. Nou pas suive ene l’autre apart ça 4 là parceki pendant des siècles, la grande majorité musulmane fine reste attaché avec ça 4 mazhab-là. Dans ce sens, ça 4 mazhab-là représente la grande majorité de musulmans Ahlus-Sunnah Wal Jama’ah. Adopté ene l’autre mazhab apart ça 4 mazhabs-là signifié alle à l’encontre de ceki la grande majorité des musulmans Ahlus-Sunnah Wal Jama’ah fine adopté. Et la grande majorité des musulmans Ahlus-Sunnah Wal Jama’ah li représente ijma (consensus). C’est acoze ça même banne ‘Oulama dire ki sorti en dehors ça 4 mazhab-là li représente sorti en dehors ijma (consensus).

Rassouloullah ‎(Sallallaahou A'laihi Wasallam)‎ fine ordonne nou pou suive As-Sawaad-Al-A’zam (la plus grande majorité). Et la plus grande majorité li représenté par ça 4 mazhab-là. Donc d’après Rassouloullah ‎(Sallallaahou A'laihi Wasallam)‎ so l’ordre, banne musulmans bizin suive ça 4 mazhab-là. Pas gagne droit suive ene l’autre apart ça 4 là. C’est dans ce sens même, suive ene mazhab apart ça 4 mazhab-là li représente alle en dehors Ahlus-Sunnah Wal Jama’ah.

Suive ene l’autre mazhab

Suive ene l’autre mazhab apart ça 4 mazhab-là li couma dire suive ene hadice isolé au détriment banne hadices reconnu ki pas gagne droit. Couma ça pas bon, coumsa même pas gagne droit suive ene l’autre mazhab apart ça 4 mazhab-là.

Suive ene seul dans ça 4 mazhab-là

Longtemps banne Sahaba-e-Kiraam ti pé récite Qour’aan-e-Kareem dans plusieurs façons et ça ti permette parceki Qour’aan-e-Kareem même ti révélé en sorte ki permette lire li dans différent façons. Ça fine continué ziska l’époque Hazrat Usmaan ‎(Radiyallahou anhou‎)‎ quand Hazrat Houzaifah ‎(Radiyallahou anhou‎)‎ fine attire so l’attention ki si ça fine continué, alors capave ena dissension et division dans l’Oummah. Hazrat Usmaan ‎(Radiyallahou anhou‎)‎ fine concerté avec banne Sahaba-e-Kiraam et fine unir l’Oummah lors ene seule façon lire et fine abolir banne lezot façon lire. En faisant cela, Hazrat Usmaan ‎(Radiyallahou anhou‎)‎ et banne Sahaba-e-Kiraam en général pas fine contre aukene la loi de Deen parceki tout ceki zotte fine faire, c’était dans le but pou préserve le Deen. Coumsa même ti ena ene l’époque quand banne dimoune ti dimane-dimane banne ‘Oulama et zotte ti pé pratique zotte Deen sans attache zotte avec ene seule mazhab. Etant donné ki banne dimounes dans ça l’époque-là ti sincère et zotte ti ena la volonté pou pratique Deen sans ena kit considération pou zotte l’intérêt personnel ou zotte désir, ça façon pratique Deen-là fine marche bien. Mais banne ‘Oulama fine remarqué ki banne dimounes zotte mentalité nepli couma longtemps, zotte nepli ena la bonne volonté couma longtemps. Si ene dimoune dimane plusieurs ‘Aalim ene seul renseignement, li pas dans le but pou pratique ceki pli correcte d’après shariah. Mais plutôt pou attrape ceki pli accommode li et ceki pli dans so faveur sans prend compte ki ça li paraite pli correcte d’après shariah ou bien non. Ça façon suive Deen-là, appelle li suive Deen pou nom de dire. Mais en réalité ene dimoune li suive so nafs (plaisir/désir) avec couverture de Deen. Suive Deen dans ça façon-là li bien pas bon parceki nou suive Deen pou faire Allah Ta’ala plaisir et dans ça façon suive Deen-là, nou faire nou même plaisir mais nou donne l’impression ki nou pé suive Deen. Et ça c’est ene malhonnête ki nou pé commette envers nou-meme.

Quand banne ‘Oulama fine trouvé ki si donne zotte liberté prend impé ici et prend impé là-bas, zotte pou faire ça ziste pou rode zotte l’intérêt personnel, alors zotte fine impose ene seul mazhab lors ‘Oummah. C'est-à-dire ene dimoune li attrape ene seul mazhab complètement. Li pas gagne droit prend ene tigite ici et ene tigite depi là-bas. Par cela, banne ‘Oulama fine sauve l’Oummah de la bassesse de suive so désir et so plaisir sous couverture de Deen. Et par impose suive ene seule mazhab à la fois, banne ‘Oulama fine faire l’Oummah vive Deen pou le plaisir d’Allah Ta’ala seulement.

Choisir ceki pli bon

Souvent ou capave tanne dimoune ki fine prend ene deux jours leçon dire ki zotte analyse tous les 4 mazhabs et zotte choisir ceki pli bon là-dans. C’est ene parole ki sonne bien bon dans zoreille mais ou pou étonné quand ou conné ki ça déclaration-là li ene fruit et résultat de l’ignorance. D’abord pou analyse et commente ene point de vue dans ene certaine mazhab, bizin maîtrise ça mazhab-là. Bizin au courant de tous banne données ki ene Mujtahid fine prend en considération avant ki li fine donne so point de vue. Allaamah An-Nawawi, ene célèbre et éminent savant de 7eme siècle fine trouve presque impossible pou gagne ene personne dans ene tel calibre dans so l’époque.

Nou capave trouve ene hadice authentique et nou capave trouve le point de vue ene certaine Mujtahid en désaccord avec ça hadice-là. Mais eski nou capave dire dans ene façon catégorique ki le Mujtahid concerné pas fine gagne ça hadice-là ou bien li pas fine bien comprend ça hadice-là ? Ça c’est ene kitchose ki ene Mujtahid même capave prononce lors là ou bien ene dernier ignorant même pou hasardé pou dire ene “Oui” catégorique dans ene façon bien irresponsable. Donc tanque nou pas conne ça banne données-là, la question de choisir et pratiqué pas posé même parceki ça li dimane ene certaine stage et ene certaine capacité ki banne ‘Aalim, prédicateurs et banne enseignements de nos jours, pas possède li. Si ou fine gagne l’impression ou kit enseignant fine faire ou croire ki li maîtrise tous les 4 mazhab, alors ou bizin conné ki ça li pas vrai. Si jamais ou conne l’opinion et point de vue de tous les 4 mazhab concernant ene certaine sujet, faudré pas ou embette ou même pou croire ki ou maîtrise ça banne mazhab-là. Bizin ena impé la décence et la dignité pou pas faire dimoune croire ceki ou pas été. C’est ça même manière ki fine faire tout ignorant ki fine prend ¼ leçon dans deux ti boute page en créole, prend Deen dans so la main et lance banne critiques vulgaires à l’égard banne savants de Deen couma les 4 Imam. Et ça même manière ki fine pousse banne musulmans vers l’anarchie à tel point ki zotte nepli trouve aukene différence et aukene barrière entre l’Islam et lezot la religion. Donc ça façon analyse tous les 4 mazhab et pratique ceki ou juge pli bon, li ene façon erroné pou pratique Deen parceki ou perna capacité pou faire ene travail pareil et par faire li ou pou invente ene cinquième mazhab. Banne ki pou vine après ou, zotte aussi zotte pou faire pareil couma ou et zotte pou invente ene sixième mazhab. Et ça li pou continué. Ou même réalisé, ki ça Deen-là pou vini ?

Ene conseil!

Attache ou avec ene seul mazhab entre ça 4 là ki valable et authentique. Ou sure ou pou gagne ou destination. Pas amalgame tous les 4. Ou ena toute chance perdi, ziska ou risqué quitte Deen aussi. A Maurice, la grande majorité de la population musulmane fine toujours pratique Deen d’après mazhab et interprétation de Imam Abou Hanifah (R). Donc par ce fait zotte Hanafi. Le mazhab Hanafi li ene façon authentique et correct pou pratique Deen ki en vigueur depi le premier siècle hijri ziska jordi. Fine ena banne irresponsable ces derniers temps ki fine mette doute dans l’esprit banne dimoune concernant ça mazhab-là. Zotte fine divise et subdivise l’Oummah sous fausse prétexte ki zotte pé prêche la vérité. Mais la vérité c’est ki zotte dans l’erreur. Zotte oulé détache ou avec recherche Imam Abou Hanifah (R) et invite ou vers zotte propre recherche. Ki kitchose capave pli banale ki ça ? Quitte recherche banne érudits pou suive banne ignorants ! A Maurice, suive mazhab Hanafi li garantie l’harmonie et l’unité au sein de la communauté musulmane. Combatte et critique mazhab Hanafi li narien apart crée désordre et handicap l’avancement de l’Oummah.

Réflexion !

Si Imam Abou Hanifah (R) capave faire erreur, bé eski ou pas pé faire erreur dans ou jugement ki Imam Abou Hanifah (R) fine faire erreur ? Guette bien, mo pli sure ki ou l’esprit courte pé faire ou trouve Imam Abou Hanifah (R) dans l’erreur. 

[Extrait de Al Jamiat Vol.2 No.10]