Roza jour ‘Arafah

Li recommandé pou garde roza le jour de ‘Arafah. Le jour de ‘Arafah c’est le 9eme Zulhijjah ou bien la veille Baqr Eid. Selon ene hadice ki trouve dans Saheeh Mouslim, par garde ça jour-là so roza, Allah Ta’ala efface banne péchés ki fine ena l’année d’avant et l’année après. D’après explication banne savants dans Deen, c’est banne péchés mineurs ki effacé. Quant à banne péchés majeurs, en principe bizin faire tawbah pou ça être pardonné. Couma li possible ki Allah Ta’ala li gracié celui ki li oulé sans ki li faire tawbah aussi.

Après tout, ça aussi li possible ki ene dimoune li gagne la volonté repentir et faire tawbah sincère de banne péchés par barakat banne roza nafil et change so la vie pour de bon. Faudré pas nou néglige banne roza nafil par minimise zotte l’importance et par prétexte ki zotte pas obligatoire. Li capave paraite simple acoze li pas obligatoire mais ça pas empêche li vine ene moyen pou dresse la vie ene dimoune. Acoze ça tanque possible nou pas bizin laisse allé banne l’occasion pareil.

Le roza de ‘Arafah li recommandé garde li le 9eme Zulhijjah. Chaque l’endroit et chaque pays so 9eme Zulhijjah li depanne d’après ceki l’autorité concerné de ça pays-là fine décidé et fine décrété. Ça pas nécessaire coïncide avec l’heure ou avec jour ki banne haji zotte dans la plaine ‘Arafah. Ene question pareil ti soulevé dans l’époque Hazrat Aisha ‎(Radiyallahou anha‎)‎. Et Hazrat Aisha ‎(Radiyallahou anha‎)‎ ti montré zotte ki bizin guette d’après l’endroit ki ou pé resté. Selon ene récit ki trouve dans Mousawannaf Abdurazzaaq et Al-Baihaqui, Masrouq fine vine acote Hazrat Aisha ‎(Radiyallahou anha‎)‎ jour ‘Arafah. Hazrat Aisha ‎(Radiyallahou anha‎)‎ fine dimane pou servi Masrooq “Saweeq” (ene l’espèce la crème ou la patte préparé avec du blé et tamme). Ça jour-là si Hazrat Masrooq pas ti garde roza, c’était par mesure de précaution ki ça jour-là ti capave être le jour de Eid. Alors li fine préfère pas garde roza. Quant à Hazrat Aisha ‎(Radiyallahou anha‎)‎, alors li ti garde roza. Hazrat Masrooq fine dimane Hazrat Aisha ‎(Radiyallahou anhou‎)‎ :

“O maman de banne croyants ! Eski ou pé garde roza zordi ? Ki conné li capave être jour Eid zordi ?”

Hazrat Aisha ‎(Radiyallahou anha‎)‎ fine repone :

“Jour Eid c’est ça jour ki le chef d’état et la grande majorité célébré…”

Par ça anecdote-là nou comprend ki nou bizin observe le roza de ‘Arafah ça jour ki tombe le 9eme de Zulhijjah d’après calcul dans nou pays sans prend compte ceki ça capave été pou banne haji dans makkah.

[Extrait de Al Jamiat Vol.2 No.14]