Lazzat-e-Mounajaat

Mounajaat c'est ene conversation ki déroulé entre deux personne dans ene façon tellement discrète ki ene troisième pas conné. Quand ene personne ki pé cause avec so bien-aimée, li pas oulé kikene dérange li. Li oulé la solitude totale avec ene l'atmosphère calme et tranquille. Parfois causé-là li tellement bon et agréable ki ene nuit entier capave traversé couma narien ditout. Li ti à content ki le temps faire ene ti escale pou permette zotte cause ene ti pé encore. Ene personne ki engage li dans Mounajaat avec so Rabb dans au milieu la nuit, li expérience ene la joie plis ki ça. C'est ene la joie inestimable ki pas capave décrire li. Li couma dire goût de ene fruit ki bizin mangé même pou conné. Mille ou faire li comprend ki li coumsa-coumsa mais li na pas pou comprend. Li ene moment tellement délicieux ki dimoune ki conne ça, li attane ça l'heure-là impatiemment depi gramatin même. Li trouve réveil fine arrêté tellement li oulé ki ça l'heure-là vine vite. Et quand l'heure-là arrivé, li senti réveil pé galoupé, tellement li apprécié ça moment-là. Banne personnages pieux ki fine atteine ene degré très avancé de proximité avec Allah Ta'ala, zotte trouvé ki ça le monde-là fine dévalué totalement comparé à la joie et au sentiment de bien-être ki zotte éprouvé dans ça moment-là. C'est pou ça genre de la joie-là même ki Nabi ‎(Sallallaahou A'laihi Wasallam)‎ fine dire:

"جعلت قرة عينى فى الصلاة"

"Fraîcheur mo lizié li trouve dans namaz".

Hazrat 'Oumar ‎(Radiyallahou anhou‎)‎ dire:

"Si pas ti ena ça la joie pose mo font dans sajdah divant mo Rabb, mo ti à souhaité ki Allah Ta'ala lève moi".

Et pou atteine ene stage pareil, ça li nécessite ena l'amitié avec Allah Ta'ala. Et l'amitié avec Allah Ta'ala li trouve dans suive Nabi ‎(Sallallaahou A'laihi Wasallam)‎. Donc suive sounnat Nabi ‎(Sallallaahou A'laihi Wasallam)‎ dans tous banne domaines de la vie, c'est la clé de l'amitié pou Allah Ta'ala. Et ça même c'est la clé de la réussite dans Dounia et dans Aakhirat.

[Extrait de Al Jamiat Vol.3 No.7]