Shariat et Tareeqat

Shariat, c'est le nom ki nou donne à l'ensemble de banne la loi, commandements et pratiques ki imposé lors être humain. Ça l'ensemble-là li comprend deux catégories de commandements:

1. Ene ki nou capave trouve dimoune pé faire li couma namaz, roza, zakaat, hajj etc. Nou appelle ça banne pratiques-là اعمال ظاهره.
2. Et ene deuxième ki nou pas trouvé avec nou lizié. Couma la sincérité, la reconnaissance etc. Ça nou appelle li اعمال باطنه.

Donc le terme Shariat li renferme tous les deux catégories de pratique. Banne 'Oulama auparavant ti pé servi le terme فقه (fiqh) comme le synonyme de Shariat. Imam Abou Hanifah (R) li définir fiqh dans ça terme-là:

"معرفة النفس ما لها وما عليها"

"(Fiqh) c'est la connaissance ki permette nafs conne so banne droits et so banne devoirs …"

Plutard avec l'évolution, فقه fine commence servi pou signifié ça branche ki traite banneاعمال ظاهره  (A'maal Zaahirah) seulement. Et ça domaine ki traite banne اعمال باطنه (A'maal Baatinah) fine reconnaite par علم الاخلاق (Ilm-ul Akhlaaq), تزكية النفس (Tazkiyat-un Nafs) ou bien تصوف (Tassawouf).

Quant à Tareeqat, c'est banne principes et banne règlements ki bizin suive pou dresse banne اعمال باطنه. Tareeqat li ene parti dans Shariat. Li pas ene kitchose ki apart couma boucou oulé faire croire. Ça montré ki Tareeqat li bizin dans banne limites de Shariat. Ene Tareeqat ki en dehors Shariat, c'est l'égarement. Shariat li puisé principalement de Qour'aan et de hadice. Donc Tareeqat li bizin d'après Qour'aan et hadice. Hazrat Junaid Al-Baghdaadi (R) dire:

"Tous banne chemins zotte fermé lors tous dimoune apart ça dimoune ki suive Rassouloullah ‎(Sallallaahou A'laihi Wasallam)‎ pas par pas."

Allaamah An-Nouri (R) dire ki pas bizin approche ene dimoune ki so comportement li en dehors limite de Shariat.

Tous ça-là montré ki Tareeqat li ene parti dans Shariat et ki le Tareeqat valable c'est le Tareeqat ki li dans cadre et d'après Shariat.

[Extrait de Al Jamiat Vol.3 No.8]