L'engagement

Quand ou promette ene dimoune ki ou pou faire tel kitchose ou bien ou pas pou faire tel kitchose, par cela ou fine prend ene l'engagement.

L'engagement c'est ene kitchose ki bizin respecté li. Perna aukene religion ki autorise pas respecté l'engagement. C'est ene kitchose tellement clair et évident ki dimoune pas conne lire aussi li d'accord avec ça.

Pas respecté l'engagement, c'est ene genre de tricherie et malhonnêté. Ene dimoune sincère pas capave commette ene kitchose aussi bas. C'est ene kitchose ki jette ene dimoune dans la bassesse. Nabi ‎(Sallallaahou A'laihi Wasallam)‎ fine qualifié li de ene parmi banne mauvais manière ki ene hypocrite ena.

Tout ceki nou appelle ene contrat, c'est ene l'engagement couma contrat mariage, contrat travail etc. Donc ça aussi dimane pou respecté li. Ena certaine conditions ki nou mentionné dans contrat. Nou bizin respecté ça banne conditions-là. Apart ça nou ena banne conditions ki li inclure automatiquement dans ene contrat. Ça aussi nou bizin respecté zotte. Par exemple dans ene contrat mariage, jamais nou mentionné ki nou pou donne nou madame mangé boire, logement etc. mais ça banne kitchose-là zotte vine applicable automatiquement quand nou rente dans ene contrat mariage. Coumsa même vive bien avec madame et donne li l'affection, l'amitié etc. pas mentionné dans contrat mais c'est banne kitchose ki bizin respecté parceki ça banne kitchose-là zotte inclus dans contrat automatiquement. Ene dimoune ki pas garde so madame bien, li pas ene bon dimoune parceki li pas pé respecté certaines conditions ki imposé lors li par conclure ene contrat mariage.

Travailleurs et zouvriers

Coumsa même banne travailleurs, zouvriers et banne fonctionneurs ki cachiette le corps dans travail, ki pas respecté l'engagement ki zotte fine prend au moment ki zotte ti prend travail, zotte pé trahir zotte clients et zotte employeurs. C'est ene malhonnêté ki zotte pé commette envers toute ene nation. Zotte pas banne dimoune sérieux.

Banne dirigeants

Similairement banne dirigeants dans ene pays zotte engage zotte avec le peuple ki soutenir zotte par zotte ti la croix dans élection. Mais après élection, souvent arrive le contraire de ceki zotte ti dire avant élection. C'est ene malhonnêté de zotte part et ene trahison envers banne ki fine compte lors zotte pou redresse la situation.

Marqué gardé ki la vie-là li pas termine ici même lors ça le monde-là. Ça match-là pou continué après la mort. C'est necque ene premier mi-temps ki nou pé joué ici. Deuxième mi-temps là nou pou joué li après la mort. Banne ki croire zotte fine réussi embette zotte prochain, en réalité pé embette zotte-même. Finalement ça rôle-là pas pou marché. Pas ça même ki nou habitué dire:

"Cent jours pour le voleur, un jour pour le maître".

Nou bizin comprend ki par embette lezot, nou pé embette nou même. Par triche lezot, nou pé triche nou même et finalement nou pé brise nou l'avenir.

L'avenir trouve dans la sincérité, l'honnêteté et dans respecté l'engagement.

[Extrait de Al Jamiat Vol.3 No.9]