Banne points important lors Talaaq

Talaaq li ene kitchose ki bizin pas donné. Si fine bizin même donné, bizin pas donne tous les trois talaaq ene seul coup. Bizin donne ene seul talaaq. Avec ene seul talaaq aussi, ene madame capave sorti en dehors Nikah so missié et ça li sufi pou permette li faire so l'avenir ailleurs si li oulé. Pas nécessaire donne tous les trois talaaq.

Bizin ena ene raison valable pou donne talaaq. Mais si sans ene raison valable, ene missié fine donne so madame talaaq, eski ça talaaq-là li compté? D'après shariah, ça talaaq-là pou compté malgré ki ça dimoune-là fine faire ene erreur grave par donne so madame talaaq sans ene raison valable. Li pas nécessaire ena ene raison valable pou talaaq compté.

Dans ene situation pareil, souvent banne madames zotte bouleversé et zotte vine en dehors contrôle ki faire zotte dire kitchose ki pas bizin. Ziska même zotte objecté lors Allah Ta'ala et zotte mette la loi islamique en question. Ça li bien grave parceki ene dimoune li capave perdi imaan par banne façon pareil. Eski li vaut la peine ki nou perdi nou Imaan aussi précieux acoze ene cadavre ki demain pé disparaite dans la terre?

Li capave ena so valeur mais li pas capave être pli valeureux ki ça fortune ki appelle Imaan.

Banne missié madame zotte commette ene erreur grave quand zotte alle rode kikene ki capave dire zotte ki zotte capave continué vive ensemble malgré ki zotte fine fini donne tous les trois talaaq. Bizin mette bien dans la tête ki ça banne missié madame-là et banne ki donne ça patente-là, zotte tous dans l'égarement.

[Extrait de Al Jamiat Vol.3 No.11]