Faire du tort ene wali

"...من عادى لى وليا فقد آذنته بالحرب ..." (البخارى)

"… Celui ki faire l'ennemi avec ene mo Wali, Mo déclare la guerre conte li..." (Boukhari)

Explication:

Dans ça hadice-là, pé faire conné ki l'ennemité avec ene wali li représente l'ennemité avec Allah Ta'ala parceki l'ennemi so l'ennemi li ene camarade et camarade so l'ennemi li ene l'ennemi. Ene wali li camarade Allah Ta'ala. Donc ene wali so l'ennemi li pou ene l'ennemi pou Allah Ta'ala.

Quand Allah Ta'ala dire ki li déclare la guerre, ça signifié ki li prend la personne pou so l'ennemi. Quand kikene déclare la guerre avec ou et prend ou pou so l'ennemi, ou bizin attane de tout. Coumsa même quand Allah Ta'ala déclare la guerre avec kikene, ça représente ene menace contre tout ceki li ena et surtout contre tout ceki précieux et valeureux. Kitchose pli précieux et pli valeureux ki ene dimoune ena, c'est so imaan. Donc dans ça sens-là, faire l'ennemi avec kit wali, li mette en danger kitchose pli précieux et pli valeureux ki li ena ki appelle Imaan. Acoze ça d'après banne 'Oulama, li pas étonnant si ene dimoune perdi so imaan grâce à so rancune ki li ena pou kit wali. Si rancune avec ene wali li néfaste, c'est ene indication ki l'amitié avec ene wali li très bénéfique et profitable pou ene dimoune so Deen et so Imaan.

[Extrait de Al Jamiat Vol.3 No.13]