Ceki bien pas bon avec nou

Nou nepli intéressé avec Deen. Nou plutôt guette pli boucou de coté dounia. Acoze ça bien tigite considération nou donne nou Deen. Nou façon mangé, boire, habillé et nou comportement en général li pas reflecte narien ki dire ki nou ena Deen. Nou copié tout avec lezot couma dire nou Deen pena narien pou donne nou. Nou pas hésité cause menti, embette dimoune et mal agir avec nou prochain.

Bilan de coté namaz li zéro plombage. Ziska tard dans la nuit nou divant ça dajjal ki appelle télévision sans ki nou faire nou namaz Maghrib et namaz Esha. Et gramatin nou dans profond sommeil. Pas fine capave levé pou namaz Fajar parceki fine alle dormi bien tard. Namaz Zohar et Assar li passe dans travail. Ene dimoune sans namaz li couma dire ene cadavre sans la tête. Si physiquement ene dimoune pas capave vive sans la tête, spirituellement parlant, li pas capave reste vivant sans namaz. Mais ça pratique-là fine tellement perdi so l'importance dans nou lizié ki nou capave bavardé lors la rue dans l'heure namaz sans la moindre hésitation et sans gagne la honte.

Ceki nou bizin faire

Nou bizin place nou confiance dans Allah Ta'ala. Bizin attane pou gagne tout ceki nou bizin avec li même. Et nou bizin dimane Allah Ta'ala même. Nou bizin trappe nou Deen bien fort parceki nou succès dans dounia et nou bien être dans aakhirat li trouve uniquement dans suive Deen. Ene dimoune ki croire ki so succès trouve quelque part ailleurs, li vraiment ene pli grand imbécile.

Pou nou capave trappe nou Deen, d'abord nou bizin attrape nou cinq fois namaz. Nou bizin toujours faire le maximum zeffort pou gagne nou cinq fois namaz dans l'heure et avec jamaat dans masjid. Ça li ene moyen pou approche nou avec nou Rabb. Li ene moyen pou garde nou propre physiquement et spirituellement tous les deux.

Essaye toujours pou capave être utile pou lezot. Vive en paix et laisse lezot vive en paix. La mode ki nou bizin suive, c'est la mode de nou bien aimé Nabi ‎(Sallallaahou A'laihi Wasallam)‎. Allah Ta'ala fine envoye nou Nabi ‎(Sallallaahou A'laihi Wasallam)‎ comme ene rahmat et ene bénédiction pou l'humanité en entier. Nou pou bénéficié et profité avec ça rahmat-là par suive li et par suive Deen d'après so l'enseignement.

Nou bizin toujours mette dans nou la tête ki ene jour nou ena pou mort et nou pou alle en bas la terre. Après ça, jour Qiyaamat nou ena pou repone pou tout ceki nou fine faire. Donc nou bizin préparé pou ça jour-là et nou bizin dimane Allah Ta'ala ki li gracié nou par so bonté et so faveur.

[Extrait de Al Jamiat Vol.3 No.14]