Quand dimoune vine dimoune?

Allah Ta'ala fine mette trois facultés principal dans ene dimoune ki appelle:

1. قوة عقلية - Qouwwah Aqliyyah
2. قوة شهوية - Qouwwah Shahwiyyah
3. قوة غضبية - Qouwwah Ghadwabiyyah

Premier-là permette li raisonné. Mais pas tout qualité raisonnement ki valable. Ena raisonnement ki banal couma ena certaine degré raisonnement li plis ki bizin. Par exemple ene dimoune oulé comprend tout kitchose avec so l'esprit limité. Quand li pas réussi comprend, li refuse accepté li et li commence rabassé. L'équilibre entre ça deux l'extrêmes-là appelle حكمة (Hikmah) ou bien la sagesse ki amène nou pou comprend ki pas tout kitchose ki capave comprend avec ça l'esprit-là. Nou l'intelligence ena ene limite cote li arrête raisonné. Apartir ça point-là ena ene l'autre navette ki véhicule nou. C'est la croyance. C'est-à-dire à ça stage-là bizin croire dans banne kitchose ki difficile pou comprend lors confiance ene ki pli comprend.

Ça deuxième faculté-là so fonction c'est pou faire ene dimoune gagne l'envie. Parfois ena dimoune ki perna même aukene gout ni kit désir. Ça aussi li pas normal. Couma ena ene l'autre catégorie ki so désir et so l'envie perna aukene limite à tel point ki li pas différencié entre halaal et haraam. So l'envie et so désir à l'excès faire li pas différencié entre ceki bon et mauvais. Parfois li arrive dans ene stage ki faire li trouve so mama, so tifille, so sœur et so madame tout pareille. Li pas trouve aukene différence.

L'équilibre entre pas envie narien et entre l'excès de l'envie appelle عفة ("Iffah) ou bien la chasteté ki permette nou servi ceki halaal et reste loin de ceki haraam. Ça permette nou différencié entre ceki bon et ceki pas bon. Et li mette ene frein à  nou banne l'excès dans la vie pou garde nou sous contrôle de Shariah.

Et ça troisième-là li servi nou pou résisté et débatte contre banne kitchoses ki nou juge li pas bon. Ici aussi, ena dimoune ki pena courage defanne. Li capave ene poltron à tel degré ki peut être li peur so propre l'ombrage. Ena ene l'autre ki servi ça cote pas bizin servi. Li servi so courage pou faire dominere avec dimoune. Li vine ene danger et ene menace pou toute ene société. Parfois li crée ene climat de terreur ki chaque membre de la société senti li dans l'insécurité. L'équilibre entre les deux appelle شجاعة (Shouja-'ah) ou bien la bravoure ki permette ene dimoune servi so courage pou banne causes nobles couma aide banne ki dans le besoin, defanne l'intérêt banne opprimés, secours banne ki dans difficulté et soutenir banne faible.

Donc ça trois facultés ki Allah Ta'ala fine accorde nou, bizin équilibré zotte. Si pena li ditout, ça aussi li pas bon couma li pas bon si ena li à l'excès aussi. Bizin équilibré ça. Tanque pas équilibré ça, ene dimoune pas vine dimoune dans le vrai sens du mot. Li ena ene manquement ki amène nou pou dire ki li ene dimoune necque de par so forme. Parceki ene vrai dimoune c'est ene ki ena banne bon caractères. Ene dimoune so banne caractères pas capave dressé tanque li pas équilibré ça trois facultés-là. Donc ene dimoune li vine dimoune quand li réussi équilibré ça trois facultés-là.

Quand nou dire dimoune, ça pas signifié so صورة (sourah) ou bien so forme extérieure seulement. Ena ene l'autre kitchose ki encore pli essentiel ki appelle سيرة (seerah) ou bien caractère. Faudré ki so "seerah" ou bien so caractère bon, lerla nou capave appelle li ene Insaan ou bien ene dimoune. Sinon ene dimoune ki boire du sang dimoune pou n'importe ki raison, pas capave être qualifié de ene dimoune. Li capave paraite ene dimoune de par so forme l'extérieure mais de part so manière et so caractère li pas ene dimoune. Li plutôt ene vampire!

Coumsa même nou bizin prend tous banne vilain manière ki ene dimoune capave ena dans li couma l'hypocrisie, la jalousie, l'orgueil, rancune, égoïsme etc. Avec ça vilain manière-là ene dimoune pas reste dimoune dans le vrai sens du mot. Li dessane enbas niveau dimoune pou vine dans ene rang inférieure de banne créatures ki ena ça mauvais manière-là. Parfois quand ene dimoune mal agir, nou dire ki ça pas dimoune ça. C'est parceki d'après nou, ena certaine façon d'agir ki pas digne à ene insaan (dimoune). Li paraite plutôt ene manière ki capave ena dans certaine zanimau. Donc ça montré ki ena certaine manière et caractère ki tire nou depi le niveau noble de insaan (dimoune) pou jette nou dans la bassesse de banne créatures extrêmement inférieur.

[Extrait de Al Jamiat Vol.3 No.15]