Ene musulman li ene frère pou ene (l'autre) musulman

"Ene musulman li ene frère pou ene (l'autre) musulman. Li bizin pas faire dominere avec li ni li bizin délaisse li (dans kit difficulté ou bien laisse kikene faire dominere avec li). Celui ki reste engagé dans résoudre kit problème de so frère (musulman), alors Allah Ta'ala pou résoudre so problème. Celui ki soulage ene musulman dans ene difficulté, Allah Ta'ala pou soulage li dans ene difficulté parmi banne difficulté de Qiyaamat. Celui ki cachiette (défaut) ene musulman, Allah Ta'ala pou couvert li jour Qiyaamat." (Sahih Boukhari/Sahih Mouslim)

Explication:

Allah Ta'ala fine établir le lien de fraternité entre banne musulmans. De ce fait, ene musulman li supposé vive avec ene l'autre musulman couma li vive avec so propre frère disang. Au contraire, l'Islam considère ça lien de fraternité ki fine établi lors la base de Imaan comme ene lien pli fort ki le lien disang. C'est pou cela ki nou trouvé ki Allah Ta'ala fine refuse accepté Hazrat Nooh ‎(Alaihis Salaam)‎‎ so propre garçon comme ene membre de so la famille zisse acoze ki so garçon li pas ti ene musulman. Donc couma ene dimoune li reste sincère avec so propre frère, coumsa même li bizin reste bien avec so frère musulman. Ene dimoune li soutenir so frère. Coumsa même ene musulman bizin soutenir so frère musulman. Li pas bizin faire dominere avec li ni li laisse kikene faire dominere avec li.

ظلم ou bien dominere signifié prive kikene de ceki li mérité. Chaque musulman so la vie, so l'honneur, so la famille et so du bien li sacré pou ene l'autre musulman. Donc ene musulman perna droit prive ene l'autre musulman de ça droit-là et ni li gagne droit reste insensible quand ça pé être bafoué. Li bizin toujours disposé pou aide so frère musulman d'après so capacité.

Ene personne li profite énormément dans aide so frère musulman. Parceki d'après ça hadice-là, Allah Ta'ala li continué aide ene personne tanque ki li aide so prochain.

Selon ene hadice ki trouve dans Sahih Mouslim, Rassouloullah ‎(Sallallaahou A'laihi Wasallam)‎ fine dire:

"والله فى عون العبد ما كان العبد فى عون اخيه"

"Allah Ta'ala continué reste dans aide ene serviteur tanque ki ça serviteur-là li reste engagé dans aide so frère (musulman)."

Coumsa même ene dimoune ki soulage so frère ki dans problème et ki tire li depi dans la peine, li pou être soulagé jour Qiyaamat dans so difficulté. Donc ene dimoune li ranne li heureux dans ça dounia-là et dans aakhirat par aide so prochain et par soulage li dans so problème. Ça montré ki quand ene dimoune faire so prochain du tort, en réalité li faire li même du tort et li ranne li même misérable parceki li prive li de Allah Ta'ala so l'aide dans dounia et dans aakhirat. C'est ene façon pou tourne le dos avec l'aide Allah Ta'ala quand ene dimoune pas coopéré avec so frère musulman.

… Cachiette défaut ene musulman …

Ene musulman so l'honneur aussi li sacré. Donc ene musulman bizin toujours cachiette défaut so frère musulman et li pas bizin faire kitchose ki pou jette so l'honneur. Ene personne ki cachiette défaut so frère musulman pou gagne le même traitement avec Allah Ta'ala jour Qiyaamat. C'est-à-dire Allah Ta'ala pas pou dévoile so défauts jour Qiyaamat. Allah Ta'ala pou garde so l'honneur pareille couma li fine garde l'honneur so frère musulman. Selon le sens de ene hadice, ene dimoune ki galoupe derrière défaut so camarade, Allah Ta'ala déshonore li quand même li reste cachiette dans so la caze. Ça amène nou pou comprend ki ene dimoune li protége so propre l'honneur par cachiette défaut so camarade. Ene dimoune li faire li même ene du tort immense quand li dévoile péché so camarade et li dénigré li. Ça li couma dire nou tous dans ene seul bateau. Dans coule bateau nou camarade, nou aussi nou pou noyé. Ou bien nou tous pé tini lors ene seul branche. Dans coupe ça branche-là, nou aussi nou pou tombé et nou pou souffert. Ça montré ene dimoune ki faire du tort so prochain, li ene grand imbécile. Li tellement imbécile ki li pas conné ki li pé ranne li même du tort.

… Exception…

Mais ena banne circonstances cote li vine nécessaire pou dévoile ene dimoune so défaut parceki dans cachiette li, nou capave faire ene l'autre dimoune du tort et nou capave induire li dans l'erreur.

• Premier l'exemple:

Ene dimoune ki pas fine apprane Deen mais ki pé déclare être ene grand connaisseur. Alors bizin dénonce ene dimoune pareille pou ça pas vine ene source de fitna et ene moyen de l'égarement.

• 2eme l'exemple

Ene dimoune oulé gagne renseignement concernant ene dimoune cote li pense pou envoye ene demande pou mariage. Li devoir ça dimoune ki pé donne renseignement-là ki li pas cachiette narien et li dire tout la vérité. Faudré pas cachiette kitchose. Dans ene circonstance pareille, cachiette kitchose li représente ene trahison et malhonnêteté envers ça dimoune-là.

Donc en principe bizin cachiette ene dimoune so défaut tanque ki ça pas vine ene menace ou ene danger pou l'intérêt ene l'autre dimoune ou bien pou l'intérêt de Deen.

… Attention!

Mais c'est ene étape très dangereux parceki ene dimoune li capave servi Deen comme prétexte pou assouvir so rancune personnelle. Li capave pé dénonce so frère par ene "grudge" personnel ki li ena mais li passe ça lors nom Deen. Faudré pas nou blié ki Allah Ta'ala li conne nou l'intention et nou ena pou ranne compte cote li.

[Extrait de Al Jamiat Vol.4 No.2]