L'amitié et sacrifice

Sacrifice li depanne lors le degré de l'amitié ki ene dimoune ena. Si ene dimoune faire banne sacrifices énormes pou so banne zenfants, c'est acoze ki li content so banne zenfants boucou. Et si li pena la volonté pou faire ene simple "move" pou ene étranger, c'est acoze manque de ça l'amitié-là.

Dans la même façon ene dimoune pou accepté faire sacrifice pou Deen quand li ena l'amitié pou Allah Ta'ala. Pli li ena ça l'amitié-là, pli li pou faire sacrifice. Banne Sahaba-e-Kiraam ti ena boucou l'amitié pou Allah Ta'ala. Acoze ça zotte fine faire boucou sacrifice. Au contraire zotte ti pé senti la joie dans faire sacrifice. A tel point ki zotte ti considère donne zotte la vie dans chemin Allah comme le pli grand succès.

C'est Allah Ta'ala même ki pli mérité ki nou content li et nou ena l'amitié pou li parceki c'est Li même ki fine accorde nou tout ceki nou pé jouir dans nou la vie. Donc c'est Allah Ta'ala même ki mérité ki nou faire toute sorte sacrifice pou faire li plaisir.

Sacrifice ki ene dimoune capave faire pou ene celui ki li bien content, boucou plis ki ça ene musulman bizin prêt pou faire dans l'amitié pou Allah Ta'ala.

Ene dimoune jamais pou osé déplaire so propre zenfant pou faire plaisir zenfant étranger. So l'amitié et l'attachement ki li ena avec so zenfant pou empêche li faire ene kitchose pareil. Couma ene musulman capave permette li casse l'ordre Allah Ta'ala pou faire dimoune plaisir? Couma ene musulman capave autorise li abandonne sounnah Nabi ‎(Sallallaahou A'laihi Wasallam)‎ zisse pou faire li même ou bien ene l'autre kikene plaisir? Si vraiment ene dimoune li content Allah Ta'ala et so Rassoul ‎(Sallallaahou A'laihi Wasallam)‎ plis ki tout, jamais li pou ena le courage faire ça. C'est manque de l'amitié même ki faire li faire ceki pas bizin faire. Et pourtant ene dimoune bizin content Allah Ta'ala et so Rassoul ‎(Sallallaahou A'laihi Wasallam)‎ plis ki tout pou li capave vine ene bon musulman. Dans Qour'aan-e-Kareem Allah Ta'ala faire nou conné ki banne ki ena Iman zotte l'amitié bien fort pou Allah Ta'ala.

Donc l'essentiel c'est ki nou bizin inculqué l'amitié pou Allah Ta'ala. Pou ça vine dans nou, nou bizin faire trois kitchose:

1. Médité lors banne faveurs ki Allah Ta'ala fine donne nou et pé continué donne nou,
2. Tire ene ti le temps pou faire zikrullah. Ça pou mette Noor dans le cœur ki à son tour pou developpe la volonté pou pratique Deen,
3. Reste en compagnie de banne ki ena Mouhabbat pou Allah Ta'ala. Ça li pou recharge nou batterie de Iman ki ena tendance affaibli de temps à autre par l'environnement défavorable.

[Extrait de Al Jamiat Vol.4 No.4]