Démolition de Deen par banne prédicateurs ducal

Laisse nou analyse ene déclaration erronée de la part ene certain ducal ki dire:

"Ensuite couma nou capave dire untel li ene wali-Allah quand nou pas supposé conné qui sanla lor qui l'état li fine mort".

C'est ene déclaration ki rempli avec méchanceté zisse pou mette dimoune dans l'erreur. Li impé pareil couma ça banne prétextes ki banne voyou servi pou justifié zotte voyouterie quand zotte dire : "personne pas parfait lors la terre." Zotte servi ça pou justifié zotte mauvaise conduite. Couma ça li pas ene bon façon coumsa même servi ça déclaration-là comme ene prétextes pou pas accepté kikene comme ene wali, aussi li ene dernier prétexte futile de banne ki pena la décence pou accepté la vérité et banne ki nepli ena preuve. Parceki si acoze ki ou pas conné ki sanla dans ki l'état li fine mort, empêche ou qualifié kikene de ene wali alors ça pou amène ou pou refuse accepté ene quantité kitchose. Ça li pou ene l'empêchement pou accepté kikene comme ene musulman parceki ou pas conné dans ki l'état li fine mort ou bien dans ki l'état li pou mort. Alors quand ou pé marié ou même ou bien ou zenfant, ou pas conné si avec ene musulman ou pé marié ou bien avec ene ki pas musulman. Ou pas conné si ou même ou ene musulman ou bien ou pas ene musulman parceki ou pas conné dans ki l'état ou pou mort. Ou bizin arrête mange la viande parceki ou pas conné si ça boucher-là li ene musulman. Pas fini! Ou bizin arrête accepté banne hadices parceki ou pas conné ki ça banne narrateurs-là dans ki l'état-là zotte fine mort. Après tout ki manière aussi ou capave accepté ene narrateur comme ene narrateur authentique quand ou ignore conné dans ki l'état li fine mort: En état de iman ou bien dans ene différent l'état? Voila couma ou pou démolir et massacré Deen avec ou banne raisonnements enfantin. Après ça lors ki base ou pou capave dire ki ça Deen-là li authentique? Donc finalement ou pou bizin rejette Deen aussi. Ou pou bizin arrête présente l'opinion ou fatwa tel ou tel Sheikh parceki ou pas conné dans ki l'état zotte fine mort d'après ça raisonnement banale-là. Si kikene dimane ou si eski Hazrat 'Oumar Bin Abdul Azize ti ene wali Allah ou bien si kikene dimane ou eski les 4 Aimmah zotte ti banne Auliya Allah, alors ki ou pou repone? Eski li pou joli si ou repone ki nou pas capave dire ki zotte banne wali Allah parceki nou pas supposé conné dans ki l'état zotte fine mort?

Nou conné ene réponse pareil li impossible vine de la part banne ki ena noor rempli dans zotte le cœur. Mais banne ki dépourvu de "Noor-e-Basweerah" acoze zotte allergie ki zotte ena pou banne pieux, pas pou hésité donne ene réponse aussi grossier.

Si ene wali so wilaayat (l'état d'être wali) li ene kitchose cachiette ki difficile conné, imaan aussi li pas ene kitchose ki écrire lors front ene dimoune. Et si imaan ena banne signes ki indique so présence dans ene dimoune, wali so wilaayat aussi ena banne signes ki indique so présence. Si nou gagne droit traite ene diumoune musulman lors la base banne signes, nou pas comprend ki faire nou pas capave accepté kikene wali lors la base de banne signes. A titre d'exemple si nou croire sincèrement dans wilaayat Sheikh Abdul Qadir Jilani (R), Sheikh Moinuddeen Chisti (R), Sheikh Jalaalouddeen Roumi (R) etc. c'est acoze ki zotte fine passe zotte la vie complètement avec ene taqwa de ene degré très avancé et ça fine témoigné par tout un chacun dans zotte l'époque respective. Astere ene prédicateur ki aveugle spirituellement vine dire ki pas capave dire si zotte Allah Ta'ala so banne Auliya parceki nou pas supposé conné dans ki l'état zotte fine mort! Impossible! Mais nou bizin attane tout ça-là dans la vie et nou bizin pas attane avec banne zenfant ki zotte pou comprend et conne valeur perle diamant. Bizin laisse zotte joué zotte canette. Dans ça l'age-là zotte pas pou comprend plis ki ça. Laisse zotte prend canette même pou perle diamant. Après ça coumaniere nou capave permette nou suive ça ducal-là ki so Imaan même dans balance parceki d'après so propre raisonnement, pas supposé conné dans ki l'état li pou mort.

Ça déclaration erroné-là li pas ene simple déclaration. C'est ene déclaration ki pé attaque la base de l'islam même et pé prépare terrain pou banne délinquants vine rejette hadices lors prétextes ki "nou pas supposé conné ki banne narrateurs-là dans ki l'état zotte fine mort.alors pas capave qualifié aukene hadice de authentique" Parceki normalement nou accepté ene hadice lors confiance ça dimoune ki fine rapporte ça-là. Si nou ignore conné dans ki l'état li fine mort, alors ki manière nou capave faire li confiance? C'est voila comment nou banne prédicateurs ducal sans comprend pé donne l'occasion pou démolir la base de l'Islam. Nou conné ki zotte pas ti conne l'implication de ça déclaration erroné-là. Mais astere quand zotte fine conné, zotte bizin montré zotte assez responsable pou rétracté sans attane pou gagne l'ordre depi zotte maison mère et sans essaye pou faire importe réponse depi dehors comme d'habitude.

[Extrait de Al Jamiat Vol.4 No.6]