Malhonnêteté ou fraude

Ene dimoune capave fine passe so l'examen lors papier mais quand li vine dans la pratique li échoué dans applique ceki li fine apprane. Peut être acoze manque de volonté ou bien acoze ki li juge li pas dans so l'avantage. Abandonne ene bon kitchose pou banne raisons pareille li blâmable. Par exemple li conné ki pas gagne droit consomme ene certaine nourriture. Lors papier l'examen aussi li fine capave explique ça en détail et avec preuve mais quand ça plat-là vine divant li lors la table, li pas capave résisté. Dans ça cas-là li fine passe so l'examen lors ene seul niveau mais au niveau pratique li fine échoué.

Et parfois li conne ene kitchose mais li hésité pou déclare li zisse acoze dans déclare li, li capave vine impopulaire et li risqué trouve li délaissé par so banne partisans et so banne adhérents. Couma parfois li dire ene kitchose sous l'impression ki li correcte mais li hésité rétracté quand li arrivé conné ki li fine faire erreur zisse pou pas perdi la face.

Dans tout ça-là ene bon musulman c'est ene ki pratique ceki li conné. Li pas alle en dehors de ceki li conné. Et li pas hésité pou li rétracté quand li arrivé conné ki li dans l'erreur. Li pou ene malhonnêteté de so part si li persisté tini lors ceki li conné ki li pas conné. Si ene 'Aalim ena ça dans li, nou appelle li ene malhonnêteté intellectuelle et dans langage ene ti pé dire, nou appelle ça ene fraude.

[Extrait de Al Jamiat Vol.4 No.7]