Discussion avec banne non musulmans

Banne musulmans zotte perna aukene objection lors kit la loi ou kit règlement dans Deen. Banne musulmans fine accepté l’Islam dans so totalité sans mette en doute kit précepte de l’Islam lors confiance Nabi ‎(Sallallaahou A'laihi Wasallam)‎. C’est necque banne non musulmans ki très souvent ena l’habitude objecté lors l’Islam. Dans ene situation pareil, faudré pas nou trop repone objection ki fine faire lors kit détail dans Deen. Nou discussion avec zotte li bizin lors deux kitchoses : D’abord eski Qour’aan-e-Kareem li ene révélation de coté Allah Ta’ala? Et deuxièmement eski Hazrat Mouhammad ‎(Sallallaahou A'laihi Wasallam)‎ li l’envoyé Allah Ta’ala ? Si ça deux objection-là fine résoudre, veut dire ki tout banne objection pou enlevé automatiquement. Sinon, nou pou reste repone mais objection-là jamais pou fini.

Compromis

Dimoune ki pas convaincu de zotte position ki ena tendance faire compromis avec lezot sous fausse prétexte de la tolérance. Banne Moushrik et banne kaafir ti faire ene requête avec Rassouloullah ‎(Sallallaahou A'laihi Wasallam)‎ ki chakene accepté ene parti dans religion so camarade. Mais Rassouloullah ‎(Sallallaahou A'laihi Wasallam)‎ fine rejette ça l’idée-là catégoriquement. Le sourah Al-Kaafiroune expose ça l’attitude-là dans ene façon claire et explicite. C’est ene l’attitude ki chaque musulman, ki Imaan pé vibré dans so le cœur, bizin adopté.

Le Sahabi Abdullah Bin Salaam ‎(Radiyallahou anhou‎)‎ ki ti ene juif auparavant, ti oulé continué certaines pratiques ki li ti pé pratiqué auparavant. Par exemple li ti pé continué montré respect pou le jour de Sabah (Samedi) ki li ene grand jour pou banne juifs couma jour de Jum’ah li ene grand jour pou banne musulmans. D’ailleurs pas ti ena aukene preuve dans shariah ki ti empêche montré respect pou ça jour-là. Mais Allah Ta’ala pas fine content et fine révèle le verset 208 dans sourah Al-Baqarah ki dire :

“O banne ki fine amene Imaan, rentré entièrement dans l’Islam et pas suive le pas de Shaitaan parceki li ene l’ennemi au clair pou zotte.”

Ça verset-là et le sourah Al-Kaafiroune li ferme la porte de tous compromis ki empêche ene personne reste ene musulman complète. Et faire en sorte ki ou pratique ene ti pé depi dans ou Deen et ene ti pé depi dans ou camarade so Deen, c’est ene façon pou suive shaitaan. A la longue, ça capave amene vers amalgame de banne religions en ene seul religion pou corresponne avec le fameux slogan “Ene sel lepep ene sel nation”. Li capave paraite joli mais li pas islamique et adopté ene l’attitude pareil c’est ene façon pou démolir ceki Rassouloullah ‎(Sallallaahou A'laihi Wasallam)‎, banne Sahaba-e-Kiraam, banne Tabeines, banne Taba-Tabeines et l’Oummah fine bâtir avec tant de sacrifices.

Encourageant mais pas suffisant

Mo conné si avant ou ti pé marche lors la rue avec ou le corps presque découvert et astere-là quand même ou pas coumsa et ou pé couvert ou la tête, ça li très très encourageant, surtout si ou fine ena le courage et la volonté pou faire li dans ene pays non-islamique. En même temps li bon ou conné ki ça quantité-là li encourageant mais pas suffisant. Ki Allah Ta’ala donne ou le courage pou poursuivre ou zeffort dans le but pou ranne li suffisant et satisfaisant.

 [Extrait de Al Jamiat Vol.4 No.8]