Respect pou banne 'Oulama

Nabi ‎(Sallallaahou A'laihi Wasallam)‎ fine qualifié banne 'Oulama de banne héritiers de banne prophètes. Banne 'Oulama zotte banne héritiers de banne prophètes dans le sens ki zotte bizin faire travail de Deen et continué mission de da'wah ki zotte fine quitté. Donc banne ki pé faire travail de da'wah d'après le principe, zotte mérite tout le respect.

Manque de respect pou banne 'Oulama li vine par manquement de Deen ki ene dimoune ena dans li. Ene dimoune ki content so Deen, pou toujours ena l'amitié et l'attachement pou banne 'Oulama. Selon ene hadice ki trouve dans Mousnad Ahmad, Nabi ‎(Sallallaahou A'laihi Wasallam)‎ fine dire:

"Celui ki pena respect pou nou banne grands, pena pitié pou nou banne tipti et pas reconnaite valeur nou banne 'Oulama, li pas forme parti dans mo Oummah."

D'après ça hadice-là, li bien grave si ene dimoune li éprouve l'ennemité ou rancune pou banne 'Oulama. Li ena chance perdi so Imaan sans ki li conné.

Souvent dimoune dire ki pena bon aalim. Mais eski ça banne dimoune-là fine gagne l'occasion pou guette zotte même si zotte bon ou bien pas bon. Nou bizin comprend ki banne Sahaba-e-Kiraam zotte ti bon par excellence, donc zotte fine gagne Nabi ‎(Sallallaahou A'laihi Wasallam)‎. Alors ki faire nou pas dire ki nou pena bon aalim acoze ki nou même nou pas bon! Eski li pas vrai ki nou choisir nou banne zenfant pli faible et pli pas bon pou vine haafiz ou bien pou vine aalim? Eski li pas vrai ki tanque capave nou pousse nou zenfant dans domaine séculaire?

C'est ene vérité ki jamais nou pou capave refuse accepté. Quand nou trouve nou zenfant intelligent et brillant, nou pense toujours pou faire li vine ene docteur, ene ingénieur ou faire kit degré dans l'université. Bien rare nou pense pou mette ça l'intelligence-là au service de Deen. Si nou accepté ki nou pena banne bon aalim, alors nou bizin accepté ki c'est nou même ki fautif et coupable de ceki pé arrivé. Et nou bizin tire chapeau lors travail ki ça banne institutions islamiques pé faire. Dans pas narien zotte pé donne nou banne bon résultats. Zotte pé réussi faire banne éléments ki considéré comme faible dans la société vine banne personnages solide et digne.

D'après tendance général, zordi jour ene bon aalim, c'est ene ki repone ou banne questions et donne ou banne réponses d'après ceki ou oulé. Et ene mauvais aalim d'après ça tendance-là, c'est ene ki empêche ou faire ceki ou envi faire. Par exemple si ene dimoune envi conné eski li permette pou ene madame mette pantalon jean, mette ene chemisier et après mette ene fouloir lors so la tête et si eski ça li satisfaire les normes de pardah ki Shariah fine exigé? En réponse si ou dire oui, veut dire ki ou ene grand et ene bon aalim. Et si pou cause la vérité ou dire non, veut dire ki ou pas ene bon aalim parceki ou pas laisse dimoune-là vive d'après so désir et so plaisir. Mais nou tous conné ki ça deuxième personne-là, c'est ça même ki bon aalim. Parceki li pé montré ceki Shariah pé dire. Et ça premier-là li plutôt ene égaré ki pé satisfaire tendance le public en général pou être adoré finalement.

Coumsa même si ou dire ene dimoune ki li gagne droit ramasse so madame après ki li fine donne li tout les trois talaaq, veut dire ki ou ene grand aalim et ene bon aalim. Mais ou pou vine boucou mauvais et ou pou être qualifié de pas conne narien si ou dire non. Dans tout ça-là ene bon aalim c'est ene kikene ki fine apprane Deen avec banne ki conne Deen et li propage d'après le principe avec toute clarté sans induire dimoune dans confusion ou dans l'imbuigité. Li pas prend compte banne critiques ki banne dimoune faire lors li. Li dire ceki li ena pou dire avec sincérité et avec l'unique but pou faire Allah Ta'ala plaisir. C'est ça même ki nou appelle ene bon aalim et ça même façon faire da'wah ki d'après le principe de Nabi ‎(Sallallaahou A'laihi Wasallam)‎.

[Extrait de Al Jamiat Vol.4 No.10]