L'état d'esprit dans faire sadaqah

Ene dimoune d'abord li faire li même du bien quand li aide kikene. Parceki dans aide kikene, ene dimoune li récolté énormément. Ça dimoune ki li pé aidé-là li couma dire ene la terre. Par sème quelque chose dans la terre, ene dimoune li faire li même du bien. Parceki so récolte li retourne avec li même. Donc ene dimoune li faire li même du bien par faire sadaqah parceki récompense de ça sadaqah-là li pou retourne avec li même. C'est li même le bénéficiaire principal dans tout ça-là. Li fini mérite la récompense ki fine promette pou gagné necque par faire sadaqah. Alors li pas bizin attane ki la personne ki li fine aidé, faire li kit faveur en retour. Même si li pas faire li aukene faveur ou bien li mal agir avec li, là aussi ça pas affecté ça sadaqah ki li fine faire-là. Continué aide ene dimoune ki pé continué mal agir, li ene signe sincérité de la personne ki pé faire sadaqah parceki ça li montré ki li pé faire ça zisse pou le plaisir Allah Ta'ala; pas pou aukene l'avantage mondaine ou kit faveur personnel. Li pena aukene l'intention passe pou bon ou bien pou gagne kit faveur de la part de qui que ce soit par so sadaqah.

Dimoune capave pose question eski ena ça qualité dimoune-là? Bé nou bizin conné ki l'Islam li pas ene religion de théorie seulement. C'est ene religion ki fine être pratiqué auparavant à 100 pour 100 par 100 pour 100 de banne Sahaba-e-Kiraam et zordi jour aussi li pé bizin être pratiqué à 100 pour 100 mais pas par 100 pour 100 de musulmans. L'essentiel c'est que li ene religion adaptable dans tout banne circonstances et applicable dans tout banne l'époques. Donc nou dire ki ena ça qualité dimoune-là ziska zordi aussi. Li vrai ki longtemps ti ena li boucou et zordi jour ena li tigite. Comme l'exemple nou capave présente l'événement de Hazrat Abou Bakr ‎(Radiyallahou anhou‎)‎.

L'événement Hazrat Abou Bakr ‎(Radiyallahou anhou‎)‎ avec Hazrat Mistah ‎(Radiyallahou anhou‎)‎

Hazrat Abou Bakr ‎(Radiyallahou anhou‎)‎ ti pé aide ene Sahabi. Par l’innocence et simplicité, li fine tombe dans l'erreur par banne hypocrites et li fine alle cause certain causé négatif à l'égard Hazrat Aisha ‎(Radiyallahou anhou‎)‎ ki ti la fille de Hazrat Abou Bakr ‎(Radiyallahou anhou‎)‎. Alors Hazrat Abou Bakr ‎(Radiyallahou anhou‎)‎ fine senti li blessé et li fine arrête aide ça Sahabi-là. Lors ça Allah Ta'ala fine révèle le verset suivant:

"Banne ki ena richesse et ki ena le moyen parmi ou, faudré pas zotte faire serment pou pas aide banne familles proche, banne pauvres et banne ki fine faire hijrat dans chemin Allah. Zotte bizin pardonné et laisse passé. Eski ou pas ti à content ki Allah gracié ou? Et Allah Ta'ala li Grand Pardonneur et rempli de pitié.(V22/ S24)

Quand ça verset-là fine dessane, Hazrat Abou Bakr ‎(Radiyallahou anhou‎)‎ fine recommence aide ça Sahabi-là!

Ça montré ki faudré pas nou attane kitchose en retour de la part ene dimoune ki nou fine aide li. A tel point ki si li pas agir bien aussi, là aussi bizin toujours aide li. Et ça li pou ene garanti et ene signe ki ceki nou pé faire, nou pé faire li zisse acoze Allah Ta'ala. Mais si nou trouvé ki nou aide li capave vine ene source de l’encouragement pou la personne continué so banne mauvais ki li ena dans li, alors dans ça cas-là nou bizin pas aide li dans le but pou arrête le mal.

[Extrait de Al Jamiat Vol.4 No.11]