Manque de pudeur

Ene dimoune bizin ena la honte mais faudré pas li honté pou faire bon travail. Par exemple li pas bizin honté pou faire namaz quand l’heure namaz fine rentré zisse acoze dimoune pé guette li. Li bizin pas prend dimoune compte et li faire so namaz.

Cote li bizin honté, c’est ki li bizin honté pou faire travail ki pas bizin. Véritable ‘hayaa’ ou bien véritable la honte c’est ça sentiment de hésitation ki faire ene dimoune abstenir et reste loin de banne activités et pratiques ki Allah Ta’ala pas content.

Par exemple ene dimoune bizin couvert so le corps et bizin pas expose ene parti ki bizin cachiette. Zordi jour li bien malheureux pou constaté ki dimoune senti li fier quand li expose so le corps et li senti li honté dans couvert so le corps. Ça permette nou dire ki fine ena ene virage de 180° dans mentalité dimoune. Ça c’est l’état et situation cote ene musulman fine arrivé. Sinon en général l’humanité fine quitte so sommet de noblesse et fine dessane dans ene niveau bestial. Dimoune ki suive actualité pou confirme ça vérité-là sans aukene hésitation.

Dans ene hadice, Rassouloullah ‎(Sallallaahou A'laihi Wasallam)‎ fine bien dire : 

 « Quand ou pena la honte, alors ou capave faire ceki ou envi »

[Extrait de Al Jamiat Vol.4 No.11]