Ki sanla sincère ?

Dimoune cause camarade sincère. Mais malheureusement dimoune pencore comprend ki appelle sincère. Eski li ene camarade sincère acoze ki li cause banne parole doux? Eski li sincère acoze ki li faire tout ceki ou dire li faire ? Ça pas banne critères pou testé kikene so sincérité. Parceki tanque ene dimoune pas sincère envers li même, li pas pou capave vine sincère envers lezot. Etre sincère et paraite sincère, c’est deux kitchose. Boucou dimoune paraite sincère mais en réalité zotte pas sincère. Nou dire ki zotte pas sincère c’est acoze ki zotte pas sincère avec celui ki fine crée zotte et accorde zotte tout ceki zotte bizin. Celui ki accepté pou casse l’ordre Allah Ta’ala pou faire ou plaisir par joine ou dans tout coin ki ou invite li, li pas sincère envers Allah Ta’ala. Donc li pas sincère envers li même. Alors ki manière li capave vine sincère envers ou ? Acoze ça nou bizin mette dans nou la tête ki ene dimoune sincère c’est celui ki peur Allah Ta’ala et li obéir so banne commandements. C’est ça qualité dimoune-là ki pou sincère avec ou. Par contre ene dimoune ki pas peur Allah Ta’ala, li paraite sincère et li montré li sincère zisse pou so l’intérêt personnel. Jour ki li trouve ene pli bon, li quitte ou en place. Donc celui ki pas sincère envers Allah Ta’ala, pas capave être sincère envers kikene. L’amitié ki basé lors la piété, c’est ene l’amitié ki pou reste tout le temps.

« Banne camardes intimes ça jour-là, chakene pou vine l’ennemi pou so camarade excepté banne ki ena taqwa (la piété). » (V67/S43)

Acoze ça vaut mieux amertume de la part ene camarade sincère ki banne parole doux de la part ene ki pas sincère.

[Extrait de Al Jamiat Vol.4 No.12]