Boire avec moderation !

Boire avec modération ! Ça li capave applique pou boire de l’eau, du lait ou bien banne jus fruit. Mais tente dimoune pou boire l’alcool et après ça dire boire avec modération, ça nou pé badiné ça.

Quand dimoune-là fine fini boire so l’esprit et li fine fini perdi control, bé astere couma li pou conné ki veut dire modération quand tandis ki li pas ti comprend ça l’heure ki li à jeun.

C’est ene kitchose ki tente ou boucou. Jamais ou senti li assez. So tigite li amène ou vers boucou. Acoze ça Nabi ‎(Sallallaahou A'laihi Wasallam)‎ fine interdit so ene goûte aussi. Selon ene hadice ki trouve dans Tirmizi, Rassouloullah ‎(Sallallaahou A'laihi Wasallam)‎ fine dire :

«Tout ceki so boucou donne soulaison, so tigite aussi li haraam.»

Ça fine faire même pou decontrôle dimoune, pou faire li marche quatre patte et faire li faire toute sort bêtise et banne kitchose malsaine et indécent divant so tifille, so belle-mère et même divant so mama aussi.

Ki profit ena dans boire ene kitchose aussi malpropre et aussi mauvais ki faire dimoune dessane dans niveau zanimau ? Li faire ou perdi ou même. Faire ou perdi ou madame, ou zenfant et ou la famille. Ki faire bizin boire li quand même ene tigite aussi quand nou conné ki li malpropre et impure couma l’urine. Eski li ene l’honneur pou boire l’urine quand même ene goûte aussi ?

La question boire l’alcool avec modération-là pas posé même. Faudré pas gagne embêté avec ça. Na pas tombe dans piège banne égoïste ki oulé faire la monnaie lors ou la tête par ranne ou même, ou la famille et l’humanité en général misérable. C’est banne ki jouir lors malheur dimoune.

[Extrait de Al Jamiat Vol.4 No.12]