L’information dans sure

Valeur ene kitchose li dépanne lors ça l’intérêt ki ene dimoune ena pou ça kitchose-là. Et ene dimoune pas capave intéressé avec ene kitchose sans ki li conne l’avantage et le bienfait ki li capave récolté apartir ça kitchose-là. Mais li vrai ki ceki ene dimoune conné concernant ene kitchose, li capave vrai couma li capave pas vrai aussi. Ça amène nou pou comprend ki ene dimoune li bizin conné depi ki source li pé gagne so l’information. Si ça source d’information-là li ene source dans sur, alors nou capave assuré ki direction ou stand ki li pé prend concernant ene certaine sujet, li vaut la peine et li bénéfique.

A ça stade-là boucou dimoune arrivé faire l’erreur grave par fini croire ki ceki so l’esprit dire, c’est ça même ki correcte. Et ça li vine encore pli grave quand li arrivé ziska même donne so raisonnement priorité lors Qour’aan et hadice. Or pena aukene source d’information pli authentique ki Qour’aan et hadice.

Acoze ça, ene musulman bizin ena croyance à cent pour cent lors ceki Qour’aan et hadice dire. Parfois ene dimoune capave trouvé ki ça li conte la logique aussi mais ene bon musulman li prend so logique li mette ene coté et li attrape ceki Qour’aan et hadice pé montré. Et faudré pas nou reste sous ça fausse l’impression ki ena kitchose ki pas logique dans Deen. Tout kitchose dans Deen ena sagesse. Tout kitchose dans Deen li logique mais ene qualité logique ki dépasse logique humaine ki pas tout dimoune capave comprend.

Qour’aan-e-Kareem et hadice de Nabi ‎(Sallallaahou A'laihi Wasallam)‎ invite nou pou préserve nou regard, zoreille, la langue et tous banne parti dans le corps conte banne péchés et promette nou banne récompenses énormes. L’autre coté nou le cœur invite nou pou amène ene la vie libre cote pena aukene restriction et ki rempli de sensation et plaisir. Banne ki ena yaqeen et croyance ferme lors ceki Qour’aan et hadice pé dire, zotte suive ceki Qour’aan et hadice pé dire. Et zotte accepté faire ene ti sacrifice pou quelque temps afin pou capave gagne le bien etre pou tout le temps. Par contre banne ki comprend langage zotte le cœur pli bien ki langage Deen, zotte laisse zotte emporté et zotte arrivé prive zotte même de ene bénéfice éternel acoze ene ti plaisir narien di tout. Normalement banne ki fine suive ceki Qour’aan et hadice dire ki pou ena le bien être éternel et le succès réel parceki zotte fine suive ene l’information ki dans sur. Par contre banne ki satisfaire zotte désir, zotte mette zotte bien être en gage. Et pas conné si zotte pou réussi casse li et tire li.

[Extrait de Al Jamiat Vol.4 No.13]