La glace là li divant ou

Ou hésité pou déplaire kikene ki fine ranne ou service mais ou pas honté pou désobéir celui ki fine créé et fine accorde ou tout ceki ou bizin ? Eski ou trouve ena logique dans vine esclave pou ene kikene ki fine faire ou certaine faveur dans ou la vie mais ou vine couma ene rebelle envers celui ki pé verse so faveur lors ou incessamment.

Ene dimoune fine faire ou gagne ene bon travail ou bien li fine capave faire ça avec ou zenfant. Ou vine reconnaissant envers li pendant toute longue ou la vie. Arrivé ene jour li donne ou ene invitation. Ene invitation ki en principe ou pas d’accord avec ça. Mais ou dire ki ou pas capave déplaire li puisque ou doit li boucou pou tout ceki li fine faire pou ou et ou la famille. Mais eski ou fine déjà réalisé ki ça la terre cote ou pé resté, ça l’air ki ou pé respiré 24 lors 24, ça nourriture ki ou pé mette dans ou l’estomac et ça la santé ki ou pé jouir, ki sanla fine accorde ou tout ça-là ? Ou bizin assez intelligent et reconnaissant pou dire ki c’est Allah Ta’ala ki fine accorde ou tout ça-là. Ene grand merci pou ou l’intelligence et ou reconnaissance ki au moins ou encore reconnaite ou Rabb so banne faveurs ki li pé versé lors ou. Alhamdoulillah li encore bon. Mais servi ou l’intelligence ene tigite encore. Eski ou pé bien agir ? Eski ou pé montré ou reconnaissance pou ça banne faveurs-là ? Allah Ta’ala fine faire 5 fois namaz obligatoire lors ou ki ou pé négligé soit par pas faire li di tout même ou bien par pas faire li régulièrement. Ene ti sorti, ene fiançaille, ene mariage, ene ti fatigue, ene ti douleur la tête sufi pou faire ou néglige ou namaz. Ici ou pas réalisé ki ou pé déplaire ou Rabb ki fine donne ou tout. Ou pas hésité pou désobéir so l’ordre. Si ou financé par ene parti politique, ou pas pou osé lève pavillon ene l’autre parti. Si kikene faire li, ou pas pou hesité qualifié li de ene traitre parceki li fine trahir so parti.  Et si ou chauffé ene ti pé, ou pas pou hésité appelle li ene nimak haraam. Astere guette ene coup. Ou pé vive lors la terre Allah Ta’ala. C’est Allah Ta’ala ki pé nourri ou. C’est Allah Ta’ala ki fine donne ou le temps, courage et l’énergie. C’est Allah Ta’ala ki fine accorde ou tous banne facultés et ou capacité. Ça veut dire ou bizin dans parti Allah Ta’ala. Ou bizin faire ceki Allah Ta’ala content. Ou bizin reste dans so l’obéissance. Mais ou fine fête noël. Ou fine fête l’année. Ou fine sonne pétard. Ou fine faire tout ceki lezot faire. Par tout ça-là ou fine lève pavillon ene l’autre parti au lieu marche en bas pavillon Allah Ta’ala. Guetté coumaniere ou pou appelle li. La glace-là li divant ou.

Félicitation

Mais dans tout ça-là, quand même ou mérite ene félicitation ki ou fine réussi préserve ça étincelle de imaan-là ki ou encore ena li dans ou le cœur. Ou carrosserie li capave fine brèche-brèché mais ou moteur li encore bon dans le sens ki li capave réparé et li capave amélioré. Mais si jamais ou contente ou avec ça tigite ki ou ena dans ou le cœur et ou pas faire démarche répare li ou corrige li, ça li capave vine irréparable. Ki Allah Ta’ala pas faire nou trouve ça jour-là. Mais c’est ene vérité ki nou tous bizin conné et nou tous bizin bouge dans ça direction-là. Li pas trop tard. Nou encore ena chance tanque nou lizié pé batté. A nou vine pou Allah Ta’ala. A nou vive pou Allah Ta’ala. Et ça li pou réalisé quand nou pou vive d’après so banne commandements en suivant le mubaarak tareeqah et principe de nou bien aimé Nabi ‎(Radiyallahou anhou‎)‎. Ça li pou empêche nou mélange principe et façon de vive lezot dans ceki pou nou.

[Extrait de Al Jamiat Vol.5 No.1]