Certificat pou vive dans haraam

Ene missié ki fine donne so madame tous les trois talaaq ene seul coup, li pas gagne droit continué vive avec so madame. Zotte séparé pou tous les temps.

Ena dimoune capave autorise ou continué vive parceki d’après li c’est necque ene seul talaaq ki compté. Mais ça autorisation pou continué vive malgré ki li fine fini donne tous les trois talaaq, c’est ene certificat pou vive dans haraam. C’est ene façon pou encourage dimoune continué vive dans haraam et dans malédiction Allah Ta’ala. Banne ki pretanne ki zotte ena quelque chose depi dans Qour’aan ou bien depi dans hadice ki approuve ceki zotte pé dire, zotte bizin conné ki ça verset Qour’aan-là et ça hadice-là ti existé dans l’époque Hazrat ‘Oumar ‎(Radiyallahou anhou‎)‎ et banne Sahaba-e-Kiraam. Li pas ene kitchose ki fine découvert zordi. Donc Hazrat ‘Oumar ‎(Radiyallahou anhou‎)‎ et banne Sahaba-e-Kiraam fine comprend ça pli bien ki nou. Et zotte tous fine tombe d’accord ki 3 talaak ki donné dans ene seul coup li compté. Li pas compte ene seul. Li compte 3 même. Eski Hazrat ‘Oumar ‎(Radiyallahou anhou‎)‎ et banne Sahaba-e-Kiraam fine mal comprend Deen ? Eski Hazrat ‘Oumar ‎(Radiyallahou anhou‎)‎ et banne Sahaba-e-Kiraam fine mal applique Deen ? C’est ene dernier imbécile même ki capave repone dans l’affirmative.

Ene jour nou tous ena pou dessane dans Qabar. Tout ceki pé empêche nou pratique Deen ou bien pé faire nou pratique Deen d’après nou l’avantage, pas pou ranne nou service dans Qabar. Nou ena ene compte à rendé cote Allah Ta’ala. Assez vive dans haraam par continué vive après avoir donne 3 talaaq. Vive dans haraam c’est vive dans malédiction et dans colère Allah Ta’ala. Ki faire bizin mette en gage ene la vie éternelle pou ene jouissance et plaisir de quelque jours. Dimoune ki ena l’esprit pas agir coumsa. D’après ene hadice, dimoune vraiment intelligent c’est ene kikene ki travail pou après la mort.

[Extrait de Al Jamiat Vol.5 No.2]