L’importance namaz

 Namaz li faraz et obligatoire. Bizin faire li 5 fois par jour et tous les jours. Maladie ou voyage li pas ene excuse pou pas faire li. Bizin faire li dans tous l’état ki ou été. Apart dans haiz et dans nifaas, ene dimoune pas gagne droit quitte namaz dans aukene circonstance. Parfois dimoune faire prétexte ki le corps pas propre ou bien so linge sale. Mais ça aussi li pas ene excuse valable. Ena banne principes ki applique dans ça banne circonstance-là aussi afin ki la personne capave adopté li pou capave faire so namaz. Par exemple nou prend ene cas cote ene dimoune li trouve li dans ene l’endroit ki pena dilo ziska ene mille distance ou plis ki ça. Li pena wazou ou bien ghussal. Linge ki lors so le corps li napaak (sale). Li pena l’autre linge apart ça. Ni li ena kit moyen pou nettoye linge sale ki lors li. Dans ene telle condition aussi li bizin pas quitte so namaz. Li bizin faire tayammum pou wazou ou bien pou ghussal et li bizin faire namaz avec ça linge sale-là même. Ça aussi li pas ene excuse valable pou pas faire namaz. Astere si après ki li fine fini faire namaz, li fine arrive dans ene l’endroit cote li fine gagne banne facilités pou mette li propre, dans ça cas-là li pas nécessaire remplace ça namaz ki li fine faire avec so linge sale-là.

Bizin faire namaz et bizin faire li dans so l’heure. Faudré pas post-pone ene namaz. Boucou dimoune ena l’habitude post-pone namaz pou banne raison couma fiançailles, mariage ou bien acoze ene sorti. Et zotte senti zotte satisfait quand zotte remplace li après l’heure. Mais bizin comprend ki déplace ene namaz depi dans so l’heure, li ene péché majeur ki bizin évité à tout prix. Ena ene compte pou rendé acote Allah Ta’ala. Premier question ki pou dimandé jour Qiyaamat, li pou apropos namaz. Si ça li dans l’ordre, alors tout pou roule correct.

[Extrait de Al Jamiat Vol.5 No.2]